އަލްއަބްރާރް ހައްޖު އެންޑް އުމްރާ ގްރޫޕުގެ ހުއްދަ ވަގުތީ ގޮތުން ހިފަހައްޓައިފި

އަލްއަބްރާރް ޙައްޖު އެންޑް ޢުމްރާ ގްރޫޕަށް ދޫކޮށްފައިވާ ޢުމްރާއަށް މީހުން ގެންދިއުމުގެ ހުއްދަ، އިސްލާމިކް މިނިސްޓްރީން ވަގުތީ ގޮތުން ހިފަހައްޓައިފިއެވެ.

މި ފިޔަވަޅު އަޅާފައިވަނީ، މި މަހުގެ 3 އިން 26 އަށް އެ ގްރޫޕުގެ ފަރާތުން އިންތިޒާމުކުރި ރަމަޟާން ޢުމްރާ ދަތުރު، ފުރަން ކުޑަދުވަސްކޮޅަކަށް ވެފައި ވަނިކޮށް ކެންސަލްކުރުމާ ގުޅިގެން ހުށަހެޅުނު ޝަކުވާތަކާ ގުޅިގެންނެވެ.

އިސްލާމިކް މިނިސްޓްރީން ބުނި ގޮތުގައި، މި މައްސަލައިގައި މިހާތަނަށް ބެލި ބެލުމުން، އެ ކުންފުންޏުން ޢުމްރާއަށް މީހުން ގެންދިއުމާބެހޭ އުސޫލުތަކާ ޚިލާފުވެފައިވާކަން ވަނީ ފާހަގަކުރެވިފައެވެ.

މި މައްސަލައާ ގުޅިގެން އެ ކުންފުނީގެ ހުއްދަ ވަގުތީ ގޮތުން ހިފަހައްޓާފައިވާކަން މިހާރު ވަނީ އެ ކުންފުންޏަށް އަންގާފައެވެ. އަދި މިކަމުގައި އިތުރަށް ސާފުކުރަންޖެހޭ ކަންކަން ބަލައި، ކަނޑައެޅިފައިވާ އުސޫލުތަކުގެ ތެރެއިން އަޅަންޖެހޭ އެންމެހައި ފިޔަވަޅުތައް އެ ގްރޫޕާ މެދު އަޅާނެ ކަމަށްވެސް މިނިސްޓްރީން ހާމަކުރެއެވެ.

މި މައްސަލައިގައި އިސްލާމިކް މިނިސްޓްރީއާއި މޯލްޑިވްސް ހައްޖު ކޯޕްރޭޝަނުން އަންނަނީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން އުމްރާވެރިން ފުރުމުގެ ކަންތައް ހަމަޖެއްސުމަށް ޗާޓަރު ފްލައިޓެއް ހަމަޖެއްސުމަށް މަސައްކަތް ކުރަމުން ކަމަށްވެސް އިސްލާމިކް މިނިސްޓްރީން ބުނެއެވެ.