"ދުޅަހެޔޮ އިސްރަށްވެހިން”ގެ ނަމުގައި ހާއްސަ ޕްރޮގުރާމެއް ފަށައިފި

ހުޅުމާލޭގައި ދިރިއުޅޭ އިސްރަށްވެހިންގެ ސިއްހީ އަދި ނަފްސާނީ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ބަދަހިކުރުމުގެ މަގްސަދުގައި “ދުޅަހެޔޮ އިސްރަށްވެހިން”ގެ ނަމުގައި ހާއްސަ ޕްރޮގްރާމެއް މިއަދު ރަސްމީކޮށް އިފްތިތާހުކޮށްފިއެވެ.

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މިނިސްޓްރީ އޮފް ހެލްތު ގުޅިގެން ކުރިއަށްގެންދާ މި ޕްރޮގްރާމް އިފްތިތާހުކޮށްދެއްވީ، މިއަދު ފާހަގަކުރަމުންދާ އިސްރަށްވެހިންގެ ދުވަހާ ގުޅުވައިގެން މިއަދު ހެނދުނު ހުޅުމާލޭ ސެންޓްރަލް ޕާކުގައި ބޭއްވި ހާއްސަ ރަސްމިއްޔާތެއްގައި ހެލްތު މިނިސްޓަރު ގީލާ އަލީ ނުވަތަ މިނިސްޓްރީގެ އިސް ވެރިންނެވެ. މި ޕްރޮގްރާމަކީ އިސްރަށްވެހިން އަބަދު ގޭގައި ތިބެންޖެހޭ ޖެހުން ނައްތާލައި، އެ ފަރާތްތަކަށް އުފާވެރި އަދި ހަރަކާތްތެރި ދިރިއުޅުމެއް ހޯދައިދިނުމަށް ރޭވިގެން ކުރިއަށްގެންދާ، މުޅިން ހިލޭ ބައިވެރިވެވޭ ޕްރޮގްރާމެކެވެ.

މި ޕްރޮގްރާމްގެ ދަށުން ގިނަ ހަރަކާތްތަކެއް ހިންގުމަށް ވަނީ ރޭވިފައެވެ. އެގޮތުން ކޮންމެ ހަފްތާއަކު ތިން ދުވަހު، އިސްރަށްވެހިންގެ އުމުރާ ގުޅޭ ލުއި ކަސްރަތުތަކާއި، ހިނގުމާއި، ސްޓްރެޗިންގ އަދި ނޭވާލުމުގެ ކަސްރަތުތައް ކުރިއަށްދާނެއެވެ. މީގެއިތުރުން “ގޯލްޑަން އަވާ”ގެ ނަމުގައި ހަފްތާއަކު އެއްފަހަރު ނުވަތަ ދެ ހަފްތާއިން އެއްފަހަރު އިސްރަށްވެހިންނަށް ހާއްސަ ހަވީރުގެ ސައެއް ބޭއްވުމަށް ވަނީ ހަމަޖެހިފައެވެ. އަދި މަހަކު އެއްފަހަރު ކުޑަގިރި ނުވަތަ އެނޫންވެސް ހިތްފަސޭހަ ކައިރި ރަށަކަށް ދަތުރުގޮސް މަޖާ މާހައުލެއްގައި ވަގުތު ހޭދަކުރުމުގެ ފުރުސަތު ލިބިގެންދާނެއެވެ. މީގެ އިތުރުން ކޮންމެ ތިން މަހުން އެއްމަހު މެޑިކަލް ޗެކަޕްތައް ހެދުމާއި، ކުޑަކުދިންނާއި ޒުވާނުންނަށް ދިވެހި ސަގާފީ އަދި ތާރީޚީ މައުލޫމާތުތައް ހިއްސާކުރުމުގެ ހަރަކާތްތައްވެސް ކުރިއަށް ގެންދިއުމަށް ވަނީ ހަމަޖެހިފައެވެ.

އެޗްޑީސީން ހާމަކުރި ގޮތުގައި މި ޕްރޮގްރާމްގެ މައިގަނޑު އަމާޒަކީ ހުޅުމާލެއަކީ ހުރިހާ އުމުރުފުރައެއްގެ ރައްޔިތުންނަށް، ހާއްސަކޮށް އިސްރަށްވެހިންނަށްވެސް، އުފަލާއި ހިތްހަމަޖެހުމާއެކު އުޅެވޭނެ އޯގާތެރި އަދި ހިތްފަސޭހަ މުޖުތަމައަކަށް ހެދުމެވެ.