"މަދިރިން ރައްކާ" ކެމްޕޭން ފޭސް 1 ގެ ނެއިބަހޫޑް ތިނެއް ސަރަހައްދު ސާފުކޮށްފި

ހުޅުމާލޭގައި މަދިރި އުފެދޭ ތަންތަން ނައްތާލައި ވެށި ސާފުތާހިރުކޮށް ބޭއްވުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ކުރިއަށްގެންދާ ހާއްސަ ހަރަކާތްތަކުގެ ތެރެއިން، މިއަދު ހެނދުނު ހުޅުމާލެ ފޭސް އެކެއްގެ ނެއިބަހޫޑް ތިނެއް ސަރަހައްދު އެއްކޮށް ސާފުކޮށްފިއެވެ.

މިއީ އެޗްޑީސީން ކުރިއަށްގެންދާ "މަދިރިން ރައްކާ" ކެމްޕޭނުގެ ދަށުން ބޭއްވި ހަރަކާތެކެވެ. މިއަދު ކުރިއަށްދިޔަ މި މަސައްކަތުގައި އަމަލީ ގޮތުން އެ ކޯޕަރޭޝަންގެ ގިނަ އަދަދެއްގެ މުވައްޒަފުން ވަނީ ބައިވެރިވެފައެވެ. އޭގެ ތެރޭގައި އެޗްޑީސީގެ ސްޓްރެޓީޖިކް މެނޭޖްމަންޓް، ސޭލްސް، ފައިނޭންޝަލް އޮޕަރޭޝަންސް، ކޮންޓްރެކްޓް މެނޭޖްމަންޓް އަދި ގުޅީފަޅު އޮޕަރޭޝަންސް ޑިޕާޓްމަންޓުގެ މުވައްޒަފުން ހިމެނެއެވެ.

މި ޕްރޮގްރާމުގެ ދަށުން ވޭތުވެދިޔަ ދެ ހަފުތާއިން ފެށިގެން ކޮންމެ ހޮނިހިރު ދުވަހަކު ވެސް ހުޅުމާލޭގެ ވަކި ސަރަހައްދުތަކެއް ސާފުކުރުމުގެ އިތުރުން، މަދިރި ނައްތާލުމަށް ފޮގް ކުރުމުގެ މަސައްކަތް އެޗްޑީސީން އަންނަނީ މެދުކެނޑުމެއްނެތި ކުރަމުންނެވެ.

އެ ކޯޕަރޭޝަނުން މައުލޫމާތު ދޭ ގޮތުގައި، ސިލްސިލާކޮށް މިފަދަ ހަރަކާތްތައް ހިންގުމުގެ މައިގަނޑު ބޭނުމަކީ ތިމާވެށި ރައްކާތެރިކުރުމުގައި މުޖުތަމައުގެ ފަރުދީ ޒިންމާ އިތުރުކޮށް، އާންމު ސާފުތާހިރުކަމަށް ރައްޔިތުން އަހުލުވެރިކުރުވުމެވެ.

މަދިރީގެ ޒަރިއްޔާއިން ފެތުރޭ ނުރައްކާތެރި ބަލިތައް ކޮންޓްރޯލް ކުރުމުގެ ގޮތުން މިއަހަރުގެ ޖެނުއަރީ މަހުން ފެށިގެން ޖުލައި މަހުގެ ނިޔަލަށް ވެސް، ހުޅުމާލެ ފޭސް އެކެއް އަދި ފޭސް ދޭއް ހިމެނޭހެން ގިނަ ހަރަކާތްތަކެއް އެޗްޑީސީން ވަނީ ކާމިޔާބުކަމާއެކު ކުރިއަށް ގެންގޮސްފައެވެ.