ލާމަރުކަޒީ ގާނޫނު ވަރުގަދަކޮށްފިނަމަ ރާއްޖެ ބާރަށް ކުރިއަށްދާނެ: މޭޔަރު އާޒިމް

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު އިތުރަށް ވަރުގަދަކުރެވިއްޖެނަމަ، ދިވެހިރާއްޖެ ވަރަށް ބާރު ސްޕީޑުގައި ކުރިއަށްދާނެ ކަމާމެދު އެއްވެސް ޝައްކެއް ނެތް ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

މޭޔަރު މިހެން ވިދާޅުވީ، އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަސްވަނަ ކޮންގްރެސް ކާމިޔާބުކަމާއެކު ނިންމާލުމަށްޓަކައި ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ.

އާޒިމް ވިދާޅުވީ، ޤާނޫނުތަކުގެ ތެރެއިން ކަންކަން ހަރުދަނާކޮށް ކުރިއަށް ގެންދެވޭނަމަ ރާއްޖެއަށް ބޮޑެތި ކުރިއެރުންތަކެއް ލިބިގެންދާނެ ކަމީ މިއަދު ތަޖުރިބާއިން ފެންނަން އޮތް ޙަޤީޤަތެއް ކަމަށެވެ. އެގޮތުން ކައުންސިލްތަކަށް ޚާއްސަކުރެވިފައިވާ ފަސް ޕަސެންޓް ބަޖެޓުގެ ހިސާބުތަކާއި ކަންކަން ބަރާބަރަށް ބެލެހެއްޓި، ލޯކަލް ގަވަމަންޓް އޮތޯރިޓީ (އެލްޖީއޭ) އާއި ފިނޭންސް މިނިސްޓްރީ މެދުވެރިކޮށް އޮޑިޓް ކުރެވެމުންދާކަން އޭނާ ފާހަގަކުރެއްވިއެވެ.

ނަމަވެސް، ދައުލަތުގެ ބަޖެޓުގެ ބާކީ އޮތް 95 ޕަސެންޓަށް ވީގޮތެއް ރާއްޖޭގެ ރައްޔިތަކަށް ސާފުނުވާ ކަމަށް ވިދާޅުވެ، މޭޔަރު ވަނީ ކަންބޮޑުވުން ފާޅުކުރައްވާފައެވެ. އާޒިމް ވިދާޅުވީ، ބަޖެޓުގެ 95 ޕަސެންޓުން ރައްޔިތުންނަށް ލިބުނު ފައިދާއެއް ނުވަތަ މަންފާއެއް ފެންނަން ނެތް ކަމަށާއި، އެ ފައިސާއަށް ވާގޮތެއް ބެލޭނެ އެކަށީގެންވާ ނިޒާމެއްވެސް ނެތް ކަމަށެވެ.

މީގެއިތުރުން، ލާމަރުކަޒީ ނިޒާމަށް އަންނަމުންދާ ބަދަލުތަކުގެ ތެރެއިން ކައުންސިލްތަކަށް ދޭ ފަސް ޕަސެންޓް ބަޖެޓު ހިފަހައްޓައި ނުވަތަ ބަންދުކޮށްފިނަމަ ވާނެ ގޮތުގެ މައްޗަށްވެސް އޭނާ އަލިއަޅުއްވާލެއްވިއެވެ. އާޒިމް ވިދާޅުވީ، ރަށްރަށުގެ ކަންކަން ނިންމުމުގެ ބާރު ކައުންސިލްތަކަށް ލިބި، ރަށްތައް އަމިއްލަ ފައިމައްޗަށް ތެދުވެއްޖެނަމަ، މަރުކަޒީ ސަރުކާރަށް ބަރޯސާނުވެ ވަރަށް ބާރު ސްޕީޑުގައި ތަރައްޤީގެ އަމަލީ މަސައްކަތްތައް ކުރިއަށް ގެންދެވޭނެ ކަމުގެ ފުރިހަމަ ޔަޤީންކަން އެބައޮތް ކަމަށެވެ.