މިވީ 2 އަހަރު ތެރޭ ޖަލުގެ ޖާގަ އިތުރުކޮށްފިން: ވަޒީރު އިހުސާން

މިވީ 2 އަހަރު ތެރޭ ޖަލުގެ ޖާގަ އިތުރުކޮށްފައިވާނެ ކަމަށް ދާހިލީ ސަލާމަތާއި ފަންނިއްޔަތާއި ބެހޭ ވަޒީރު އަލީ އިހްސާން ވިދާޅުވެއްޖެއެވެ.

ރައީސް އޮފީހުގައި ކުރިއަށްދިޔަ ނޫސްްވެރިންގެ ބައްދަލުވުމުގައި އިހްސާން ވިދާޅުވީ މި ދެ އަހަތުގެތެރޭގައި ޖަލަށް އިތުރު 400 ގައިދީންގެ ޖާގަ އިރުކޮށް، ކުރީ ސަރުކާރުގައި މާލެ ޖަލު އުވާލި މައްސަލައިގައި ދޫވި މީހުން އަނބުރާ ޖަލަށް ގެނައުމުގެ މަސައްކަތް ކުރަމުންދާކަމަށެވެ.

ވަޒީރު ފާހަގަކުރެއްވި ގޮތުގައި، މީގެ ކުރިން ނަތީޖާ ނެރެމުންދިޔަ މާލޭ ޖަލާއި ކަސްޓޯޑިއަލް ފެސިލިޓީ، ނިމިދިޔަ ސަރުކާރުން ވަނީ މުޅިން އުވާލާފައެވެ.

ވަޒީރު އިތުރަށް ވިދާޅުވީ، އޭރު ހުރި މާލޭ ޖަލަކީ ރާއްޖޭގައި ހުރި އެންމެ ފެންވަރު ރަނގަޅު، ވަސީލަތްތައް ފުރިހަމަ އެއް ޖަލު ކަމަށެވެ. 350 މީހުންގެ ޖާގަ ހިމެނޭ އެ ޖަލާ އިންވެގެން ސްކޫލެއް ބިނާކޮށް، ޖަލު ބަންދުކުރުމުގެ ސަބަބުން ގިނަ އަދަދެއްގެ ކުށްވެރިން ދޫވެގެން ދިޔަކަން ވަޒީރު ފާހަގަކުރެއްވިއެވެ. މީގެ އިތުރުން، 100 މީހުންގެ ޖާގައިގެ ކަސްޓޯޑިއަލް ޖަލު ތަޅާލުމުން އެ ޖާގަވެސް މުޅިން ގެއްލިފައިވާކަމަށް އިޙްސާން ވިދާޅުވިއެވެ.

ހުޅުމާލެ ޖަލުގައި 100 މީހުންގެ ޖާގަ އިތުރުކުރުމަށް ފަށާފައިވާ މަޝްރޫޢަކީވެސް، ނިސްބަތުން އިންތިހާއަށް އަގުބޮޑުކޮށް ހަވާލުކޮށްފައިވާ މަސައްކަތެއްކަން ވަޒީރު ހާމަކުރެއްވިއެވެ.

ޖުމްލަ 450 މީހުންގެ ޖަލު ޖާގަ ގެއްލި، ގިނަ އަދަދެއްގެ ގައިދީން މުޖުތަމަޢަށް ދޫވެފައިވާއިރު، އެމީހުން އަނބުރާ ޖަލަށް ގެނައުމަށްޓަކައި ބޭނުންވާ ޖާގަ އިތުރުކުރުމުގެ މަސައްކަތް ބާރުމިނުގައި ކުރިއަށްދާކަމަށް ވަޒީރު ވިދާޅުވިއެވެ. އަދި މި މަސައްކަތުގެ ތެރެއިން މިހާތަނަށް ބޮޑެތި ކުރިއެރުންތަކެއް ހާސިލުކުރެވިފައިވާކަންވެސް ވަޒީރު ފާހަގަކުރެއްވިއެވެ.

ޖަލުތަކުން ފޯރުކޮށްދޭ ޚިދުމަތްތައް އިތުރަށް ހަރުދަނާކުރުމުގެ ގޮތުން، މީގެކުރިން އިދާރާތަކަށް ހާޒިރުވެގެން ދަތިތަކާއެކު ހޯދަމުންދިޔަ ހިދުމަތްތައް، މިހާރު ކޮންމެ ތަނެއްގައި ހުރެގެންވެސް އޮންލައިންކޮށް ފަސޭހަކަމާއެކު ލިބޭނެ އިންތިޒާމު ޕޯޓަލްއެއް މެދުވެރިކޮށް ވަނީ ހަމަޖައްސާފައެވެ.

މީގެ އިތުރުން، ރާއްޖޭގެ އެންމެ ބޮޑު ޖަލު ކަމަށްވާ މާފުށީ ޖަލުގެ ސަލާމަތީ ކަންކަން ވަރުގަދަކުރުމުގެ މަގުސަދުގައި، އެ ތަނުގައި އަލަށް ބޮޑީ ސްކޭނަރުތައް ބަހައްޓައި ބޭނުންކުރަން ވަނީ ފަށާފައެވެ.