ހެންވޭރު އުތުރު ދާއިރާގެ ޖަގަހަ މެޑަމް ސާޖިދާ ހުޅުއްވައިދެއްވައިފި

ޕީއެންސީގެ ހެންވޭރު އުތުރު ދާއިރާގެ ކެމްޕޭން ޖަގަހަ، ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ރަސްމީކޮށް ހުޅުއްވައިދެއްވައިފިއެވެ.

ހުސްނުހީނާމަގުގައި ހުންނަ ގ. ހެޕީސައިޑްގައި ގާއިމުކޮށްފައިވާ މި ޖަގަހަ ހުޅުއްވައިދެއްވުމުގެ ރަސްމިއްޔާތުގައި، ކޮންގްރެސް ޕާޓީގެ ޕީޖީ ލީޑަރު އަދި ކެމްޕޭން މެނޭޖަރު އިބްރާހީމް ފަލާޙްގެ އިތުރުން ޕާޓީގެ އިސް ބޭފުޅުން ބައިވެރިވެވަޑައިގެންނެވިއެވެ.

މި ޙަފްލާގައި، މާލޭ ސިޓީގެ މޭޔަރުކަމަށް އެ ޕާޓީގެ ފަރާތުން ވާދަކުރައްވާ މޫސާ ޢަލީ ޖަލީލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާކަމަށް ވާދަކުރައްވާ އަލްއުސްތާޛާ އާޝިޔަތު އަލައިކާ އަދުނާންގެ އިތުރުން ހެންވޭރު އުތުރު ދާއިރާގެ ކެންޑިޑޭޓުން ބައިވެރިވެވަޑައިގެންނެވިއެވެ.

އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ތާވަލުކުރެވިފައިވާ މި އިންތިޚާބުގައި އެންމެ ގިނަ ކެންޑިޑޭޓުން ކުރިމަތިލާފައިވަނީ ކޮންގްރެސް ޕާޓީގެ ފަރާތުންނެވެ.

މުޅި ރާއްޖެއާއި ޚާއްޞަކޮށް މާލެ ސަރަޙައްދުގައި ޕީއެންސީ އިން އަންނަނީ ކެމްޕޭން ހަރަކާތް ހިންގައި ޑޯޓުޑޯ ހަރަކާތްތައް ބާއްވަމުންނެވެ.