ސުޕްރީމް ކޯޓުގެ އައު އިމާރާތް އެޅުމަށް މާލެއިން ބިމެއް!

ދިވެހިރާއްޖޭގެ ސުޕްރީމް ކޯޓު ހިންގުމަށް ޚާއްސަ އައު އިމާރާތެއް އެޅުމަށްޓަކައި، މާލޭގެ އެންމެ މުހިންމު އެއް ސަރަޙައްދުން (ޕްރައިމް ލޮކޭޝަނުން) ސަރުކާރުން ބިމެއް ހަމަޖައްސައިދީފިއެވެ.

މިކަން ހާމަކުރެއްވީ ދިވެހިރާއްޖޭގެ ސުޕްރީމް ކޯޓަށް 18 އަހަރު ފުރުން ފާހަގަކުރުމުގެ ގޮތުން ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުން އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާނެވެ. އެމަނިކުފާނު ވިދާޅުވީ، ސުޕްރީމް ކޯޓަށް އައު އިމާރާތެއް ބިނާކުރުމަށް ސަރުކާރުން މި ބިން ހަމަޖައްސައިދެއްވާފައިވަނީ މި ހިނގާ މަހުގެ ތެރޭގައި ކަމަށެވެ.

އުއްތަމަ ފަނޑިޔާރުގެ ވާހަކަފުޅުގައި، ރާއްޖޭގެ އެހެން ކޯޓުތަކެކޭ އެއްފަދައިން ޝަރުޢީ ދާއިރާއަށް އަދި ޚާއްސަކޮށް ސުޕްރީމް ކޯޓަށްވެސް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ ޖާގައިގެ ދަތިކަންކަން ފާހަގަކުރެއްވިއެވެ. ކޯޓުތައް ޤާއިމުވެފައި ހުރުމުގެ މައިގަނޑު އަސްލަކީ ރައްޔިތުންނަށް އަދުލު އިންސާފު ޤާއިމުކޮށްދިނުން ކަމަށްވާއިރު، އެ ޚިދުމަތް އެކަށީގެންވާ އަވަސް މިނެއްގައި ރައްޔިތުންނަށް ފޯރުކޮށްދިނުމަކީ މިވަގުތު އޮތް އެންމެ ބޮޑު އެއް ޒިންމާ ކަމުގައި ވިދާޅުވިއެވެ.

މި އަމާޒަށް ވާސިލުވުމަށްޓަކައި، މުޅި ރާއްޖޭގެ އެކި ކަންކޮޅުތަކުގައިވާ ކޯޓުތަކުގައި އެއް އަހަރަށްވުރެ ގިނަ ދުވަސްވެ، ނުނިމި ހުރި މައްސަލަތަކުގެ ސަބަބުތައް ދެނެގަނެ، އެކަންކަން ވީއެންމެ އަވަހަކަށް ހައްލުކުރުމުގެ މަސައްކަތްތައް ކުރެވެމުންދާކަން އުއްތަމަ ފަނޑިޔާރު ހާމަކުރެއްވިއެވެ. އަދި މައްސަލަތައް ދިގުލައިގެން ދިއުމުގައި އިދާރީ އަދި ނިޒާމީ ގޮތުން ދިމާވި ސަބަބުތައް ހުރިކަން ފާހަގަކުރައްވައި، އެ ހުރަސްތައް ނައްތާލުމަށް މުހިންމު ފިޔަވަޅުތަކެއް އެޅެމުންދާ ކަމަށްވެސް ވިދާޅުވިއެވެ.

ދިވެހިރާއްޖޭގެ ޝަރުޢީ ދާއިރާގެ ތާރީޚަށް ބަލާއިރު، ޝަރުޢީ ކޯޓުތަކަށް އެކަށީގެންވާ ޖާގައާއި ޒަމާނީ ވަސީލަތްތައް ނެތުމަކީ ޒަމާނުއްސުރެ ދިމާވެފައިވާ ބޮޑު ގޮންޖެހުމެކެވެ. ޚާއްސަކޮށް 2008 ވަނަ އަހަރު ތަސްދީޤުކުރެވުނު ފެހި ޤާނޫނުއަސާސީގެ ދަށުން އަދުލު އިންސާފުގެ އެންމެ މަތީ ބާރުގެ ގޮތުގައި ސުޕްރީމް ކޯޓު އުފެދިގެން އައި ފަހުން، އެ ކޯޓުގެ އިދާރީ އަދި ޝަރީޢަތުގެ މަސައްކަތްތައް ފުޅާވެގެން ދިޔަނަމަވެސް، ޒަމާނީ ފެންވަރުގެ އަމިއްލަ ވަކި އިމާރާތެއް މިހާތަނަށް ލިބިފައެއް ނުވެއެވެ.

މާލޭގައި ހިންގާ ސުޕީރިއަރ ކޯޓުތައްވެސް ތަފާތު އެކި އިމާރާތްތަކުގައި ޖާގައިގެ ދަތިކަމާއެކު ހިންގަމުންދާތީ، މައްސަލަތައް އަވަހަށް ނިންމުމަށާއި، ރައްކާތެރިކަމާއެކު ލިޔެކިޔުންތައް ބެލެހެއްޓުމަށް އަބަދުވެސް ދިޔައީ ހުރަސްތައް އެޅެމުންނެވެ. ސަރުކާރުން މިހާރު ފައްޓަވާފައިވާ ކޯޓު ކޮމްޕްލެކްސްގެ މަސައްކަތާއި ސުޕްރީމް ކޯޓަށް އަލަށް ހަމަޖެހުނު ބިމަކީ، ރާއްޖޭގެ އަދުލުގެ ނިޒާމު ހަރުދަނާކޮށް، އަވަސް އަދި އިތުބާރުހުރި ޚިދުމަތެއް ރައްޔިތުންނަށް ފޯރުކޮށްދިނުމަށް އެޅިގެންދާ ވަރަށް މުހިންމު ތާރީޚީ ފިޔަވަޅެކެވެ.