ގްރީންހައުސް ގޭސް ރިޕޯޓިންގ އާ ގުޅޭ ޑޭޓާ އެއްކުރުމުގެ މަސައްކަތް ހަރުދަނާކުރުމަށްޓަކައި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އާއި މޯލްޑިވްސް ބިއުރޯ އޮފް ސްޓެޓިސްޓިކްސް އަދި ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ) އާ ދެމެދު އެމްއޯޔޫއެއްގައި ސޮއިކޮށްފިއެވެ.
މި އެއްބަސްވުމުގެ މަޤްޞަދަކީ ރާއްޖޭގައި އެނަރޖީއާ ގުޅޭ ޑޭޓާ އެއްކުރުމުގެ މަސައްކަތް އިތުރަށް ހަރުދަނާކޮށް، ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ) އާއި ޕެރިސް އެގްރީމެންޓްގެ ދަށުން މޫސުމަށް އަންނަ ބަދަލުތަކާ ގުޅޭގޮތުން ހާމަކުރަންޖެހޭ މަޢުލޫމާތު ހާމަކުރުމުގައި ރާއްޖެއިން އަދާކުރަންޖެހޭ ޒިންމާތައް އަދާކުރުމަށް އެހީތެރިވެދިނުމެވެ.
އެންވަޔަރަމަންޓް މިނިސްޓްރީ އަދި ޔޫއާރުއޭގެ ފަރާތުން މި އެމްއޯޔޫގައި ސޮއިކުރެއްވީ އެންވަޔަރަންމަންޓް މިނިސަްޓަރު ތާރިޤް އިބްރާހީމެވެ. އަދި އެމްބީއެސްގެ ފަރާތުން ސޮއިކުރެއްވީ މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް، ޑރ. ޢަލީ ޙައިދަރު އަޙްމަދެވެ.
މި އެމްއޯޔޫގައި ސޮއިކުރެވިފައިވަނީ ކެޕޭސިޓީ ސްޓްރެންތެނިންގ ފޯ އިމްޕްރޫވްޑް ޓްރާންސްޕޭރަންސީ އޮފް ކްލައިމެޓް ޗޭންޖް މިޓިގޭޝަން އެންޑް އެޑަޕްޓޭޝަން އެކްޝަންސް އިން ދަ މޯލްޑިވްސް (ސީބީއައިޓީ މޯލްޑިވްސް) ޕްރޮޖެކްޓްގެ ދަށުންނެވެ. މި މަޝްރޫޢަށް ފަންޑު ހަމަޖައްސައިދެނީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) އިން ކަމަށާއި، މަޝްރޫޢު ތަންފީޒުކުރުމުގައި ޔުނައިޓެޑް ނޭޝަންސް އެންވަޔަރަންމަންޓް ޕްރޮގްރާމް (ޔޫއެން އެންވަޔަރަންމަންޓް) އިން އެހީތެރިކަން ފޯރުކޮށްދޭކަމަށް މިނިސްޓްރީން ބުނެފައިވެއެވެ.
މި އެއްބަސްވުމުގެ ސަބަބުން ރާއްޖޭގައި އެނަރޖީއާ ގުޅޭ ޑޭޓާ އެއްކުރުމުގެ މަސައްކަތް އިތުރަށް ހަރުދަނާވެ، މޫސުމަށް އަންނަ ބަދަލުތަކާ ގުޅޭގޮތުން ކުރިއަށް ގެންދޭބައިނަލްއަޤްވާމީ މުޖުތަމަޢުއަށް ހާމަކުރަންޖެހޭ މަޢުލޫމާތު އިތުރަށް ފުރިހަމަވެގެންދާނެ ކަމަށް ވެސް މިނިސްޓްރީން ބުންޏެވެ.
މި އެއްބަސްވުމަކީ ރާއްޖޭގެ މޫސުމަށް އަންނަ ބަދަލުތަކާ ގުޅޭ މަސައްކަތްތައް އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއް. މިއާއެކު، އަޅުގަނޑުމެންނަށް ޖީއެޗްޖީ ރިޕޯޓިންގ އާ ގުޅޭ ޑޭޓާ އެއްކުރުމުގެ މަސައްކަތް އިތުރަށް ހަރުދަނާކޮށް، ބައިނަލްއަޤްވާމީ މުޖުތަމަޢުއަށް ހާމަކުރަންޖެހޭ މަޢުލޫމާތު އިތުރަށް ފުރިހަމަކުރެވޭނެ، - މިނިސްޓަރ ތާރިޤް އިބްރާހީމް
މިިިނިސްޓަރ ވިދާޅުވީ ވިދާޅުވީ މޫސުމަށް އަންނަ ބަދަލުތަކާ ގުޅޭ ފިޔަވަޅުތައް އެޅުމަށް ރަނގަޅު މަޢުލޫމާތު ބޭނުންވާ ކަމަށެވެ. އަދި މި އެމް.އޯ.ޔޫ އަކީ ޕެރިސް އެއްބަސްވުމުގެ އެންހޭންސްޑް ޓްރާންސްޕޭރަންސީ ފްރޭމްވަރކާ އެއްގޮތަށް ހާމަކަން ބޮޑު އަދި ޖަވާބުދާރީވާންޖެހޭ ރިޕޯޓިންގ އޮނިގަނޑެއް އެކުލަވާލުމަށް އެޅޭ މުހިންމު ފިޔަވަޅެއް ކަމުގައި ވިދާޅުވިއެވެ.
މި އެއްބަސްވުމުގެ ސަބަބުން އެމްބީއެސްއަށް ލިބޭ މަޢުލޫމާތުގެ ފުރިހަމަކަން އިތުރުވެ، ރާއްޖޭގެ ތަފާސްހިސާބުތައް އިތުރަށް ފުރިހަމަވެގެންދާނެ. މިއީ ރާއްޖޭގެ ތަރައްޤީއަށް ވަރަށް މުހިންމު ކަމެއް، - ޑރ. ޢަލީ ޙައިދަރު އަޙްމަދު
މި އެއްބަސްވުމުގެ ދަށުން ތިން އިދާރާގެ މެދުގައި މަޢުލޫމާތު ބަދަލުކުރުމާއި، ޑޭޓާ އެއްކުރުމުގެ މަސައްކަތްތައް ވިލަރެސްކުރުން ހަރުދަނާވެގެންދާނެ ކަމަށް ބެލެވޭ ކަމަށް ތިމާވެއްޓާ ބެހޭ ވުޒާރާއިން ބުނެއެވެ. އަދި މިކަމުގެ ސަބަބުން ރާއްޖޭގެ އެނަރޖީ ސެކްޓަރާ ގުޅޭ ތަފާސްހިސާބުތަކުގެ ފުރިހަމަކަން އިތުރުވެ، މޫސުމަށް އަންނަ ބަދަލުތަކާ ގުޅޭ ސިޔާސަތުތައް އެކުލަވާލުމަށް ބޭނުންވާ މަޢުލޫމާތު އިތުރަށް ފުރިހަމަވެގެންދާނެ ކަމަށްވެސް ލަފާކުރެވޭ ކަމަށސް ވެސް އެ މިނިސްޓްރީން ބުންޏެވެ.
ބުދަދުވަހު ބޭއްވުނު ސޮއިކުރުމުގެ ރަސްމިއްޔާތުގައި ކްލައިމެޓް ޗޭންޖަށް ޚާއްޞަ ރައީސުލްޖުމްހޫރިއްޔާގެ އެންވޮއީ އަލީ ޝަރީފް، އެމް.ސީ.ސީ.އީ.އީގެ ޑެޕިއުޓީ މިނިސްޓަރ ޙުސައިން އަގީލު ނަޞީރު، އެމް.ސީ.ސީ.އީ.އީގެ ޕަރމަނަންޓް ސެކްރެޓަރީ އަޖުވަދު މުޞްޠަފާ، މިނިސްޓްރީ އޮފް ހައުސިންގ، ލޭންޑް އެންޑް އާރބަން ޑިވެލޮޕްމަންޓްގެ ޕަރމަނަންޓް ސެކްރެޓަރީ ޒީނިޔާ އަޙްމަދު ޙަމީދު، މޯލްޑިވްސް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓީޝަން އާއިޝަތު ޙަސަން، އަދި ޔަދި ޔުޓިލިޓީ ރެގިއުލޭޓަރީ އޮތޯރިޓީގެ ޑެޕިއުޓީ ޑިރެކްޓަރ ޖެނެރަލް މުއާވިޔަތު ޝަރީފްގެ އިތުރުން އެމް.ސީ.ސީ.އީ.އީ، އެމް.ބީ.އެސް، އަދި ޔޫ.އާރް.އޭގެ އިސް ބޭފުޅުން ބައިވެރިވެ ވަޑައިގެންނެވިއެވެ.
މިނިސްޓްރީން ބުނީ މި އެމް.އޯ.ޔޫގެ ދަށުން، އެމް.ސީ.ސީ.އީ.އީ، އެމް.ބީ.އެސް، އަދި ޔޫ.އާރް.އޭ އިން މިހާރު އެމް.ބީ.އެސް އިން ކުރިއަށްގެންދާ ފަތުރުވެރިކަމުގެ ތަފާސްހިސާބުގެ ސަރވޭ ހަރުދަނާކޮށް، ރާއްޖޭގެ ރިސޯޓުތަކުގެ ހަކަތައިގެ މުހިންމު މަޢުލޫމާތު ހިމެނުމަށް މަސައްކަތް ކުރާނެ ކަމަށެވެ.
އަދި އެ މިނިސްޓްރީން ފަތުރުވެރިކަމުގެ ތަފާސްހިސާބުގެ ސަރވޭ ފޯމު އަޕްޑޭޓްކުރުމަށް ޓެކްނިކަލް އެހީތެރިކަން ފޯރުކޮށްދީ، އަޕްޑޭޓްކުރެވޭ ސަރވޭ ތަންފީޒުކުރުމަށް އެހީތެރިވެދޭނެ ކަމަށާ މި އިސްލާހުގެ ސަބަބުން މަޢުލޫމާތު އެއްކުރުމުގެ މަސައްކަތް ހަރުދަނާވެ، ތަކުރާރުވުން މަދުވެ، އަދި ގްރީންހައުސް ގޭސް އިންވެންޓްރީ އާއި ހަކަތައިގެ ދާއިރާގައި ސިޔާސަތުތައް އެކުލަވާލުމަށް ބޭނުންވާ ސައްހަ މަޢުލޫމާތު އެއްކުރެވޭނެކަން ކަށަވަރުވާނެ ކަމަށެވެ.
