ރައީސް ޑރ މުހައްމަދު މުއިއްޒުގެ ސަރުކާރުން ގާނޫނުއަސާސީ ގެނައި އަދި ކުރިއަށް ގެންނާނެ އިސްލާހްތަކަކީވެސް ދައުލަތާއި އަދި ރައްޔިތުންވެސް އިތުރަށް ބާރުވެރި ކުރުވަން ގެންނަވާ އިސްލާހްތަކެކެވެ. ސަރުކާރުން ހުށަހަޅައި ގާނޫނުއަސާސީއަށް ގެނައި ފުރަތަމަ އިސްލާހްތަކާ ގުޅިގެން އިދިކޮޅު އެމްޑީޕީން ދަނީ ވަރަށް ބޮޑަށް ނުރުހުން ފާޅުކުރަމުންނެވެ. އެގޮތުން އަންނަ މަހުގެ 10 ވަނަ ދުވަހު "ގާނޫނުއަސާސީގެ ދިފާޢުގައި" އެއްވުމެއް ބާއްވަން ވެސް އެމްޑީޕީން ވަނީ އިއުލާންކޮށްފައެވެ. ސުވާލަކީ އެމްޑީޕީން މިއުޅެނީ ކޯއްޗެއް ސާބިތުކޮށްދެންތޯއެވެ؟ އާދައިގެ މަތިން ދޮގު ފަތުރައިގެން، ރައްޔިތުންގެ ލޮލުގައި އަނދުން އެޅުވުން ނޫން އެހެންކަމެއް ނޫނެވެ. އެނޫން ބޭނުމެއްވެސް އޮވެގެނެއް ނޫނެވެ.
ގާނޫނުއަސާސީއަށް މިސަރުކާރުން ގެނައި މައިގަނޑު ތިން އިސްލާހު:
- މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
- ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން
- ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން
ރައީސް ޑރ މުހައްމަދު މުއިއްޒު ވެރިކަމާއި ހަވާލުވިއިރު، އެމްޑީޕީން އޮތީ ރާއްޖޭ އިގްތިސާދީ ސަރަހައްދުން އެއްބައި ދޫކޮށްލާފައެވެ. ރާއްޖޭގެ އެކިކަންކޮޅުތަކުގައި ތިބީ އިންޑިއާ ސިފައިންނެވެ. ރައީސް ޑރ މުހައްމަދު މުއިއްޒު ވެރިކަމާއި ހަވާލުވެގެން އެންމެ ފުރަތަމަ ވެސް ކުރެއްވި މަސައްކަތްޕުޅަކީވެސް އިންޑިއާ ސިފައިން ރާއްޖެއިން ބޭރުކުރުމެވެ. ގައުމުގެ މިނިވަންކަމާއި ސިޔާދަތު ގެއްލުވާލުމަށް އެމްޑީޕީން ކިތަންމެ ވަރަކަށްވެސް މަސައްކަތްކުރިއެވެ.
ގޮނޑި ގެއްލޭ އިސްލާހު ބާތިލްކުރުމަށް ވެސް އެމްޑީޕީން ވަނީ ހަޑިތަކެއް ހާވާފައެވެ. ރައްޔިތުންގެ މަޖިލީހުގެ ތަޅުމުގައި މުޒާހަރާވެސް ކުރިއެވެ.
އެމްޑީޕީގެ ޝަކުވާއަކީ ރައީސް ޑރ މުހައްމަދު މުއިއްޒު ވެރިކަމަށް ވަޑައިގެން ގާނޫނަށް އިސްލާހުތަކެއް ގެނައުމެވެ. ނަމަވެސް، މިދިޔަ ދައުރުގައި ވެރިކަން ލިބުނުއިރަށް އެމްޑީޕީން ފުރަތަމަވެސް ބެލީ ދިވެހިރާއްޖޭގެ ޖުމުހޫއަސާސީއަށް ބަދަލުކުރެވޭތޯއެވެ. އެގޮތުން، ފުލުފުލު ކަހަލަ ގޮތަކަށް ގާނޫނުއަސާސީއަށް އިސްލާހްތައް ހުށަހަޅައި ގެންނަމުންދިޔައެވެ. އެގޮތުން 9 ފަހަރެއްގެމަތިން އެމްޑީޕީން ބޭނުންވި އިސްލާހްތަކެއް ގާނޫނުއަސާސީއަށް ގެނައެވެ.
އެމްޑީޕީއަށް މިހާރު މައްސަލައަކަށް ވެގެން އުޅެނީ 19 ވަނަ ރައްޔިތުންގެ މަޖިލީހުން، އެމްޑީޕީގެ މެޖޯރިޓީއަކާއެކު ފާސްކުރި ބިލެއް، ބާރުވެރިކޮށް މި ސަރުކާރުން މަޖިލީހަށް ހުށަހަޅައި ރައީސް ތަސްދީގު ކުރެއްވުމުންނެވެ.އެންޓި ޑިފެކްޝަން ގާނޫނު ނެތުމުން ޕާޓީގެ ބާރުވެރިކަން ގެއްލޭ ކަމަށް ބުނެ އެ ގާނޫނު އުފެއްދީވެސް ހަމަ އެ އެމްޑީޕީއިންނެވެ. އެކަމަކު މިހާރު މި ކިޔަނީ ކީކޭ ހެއްޔެވެ؟
އެމްޑީޕީން މިއުޅެނީ ގާނޫނުއަސާސީއޭ ކިޔައިގެން އަނެއްކާވެސް ރާއްޖޭގެ މަސްލަހަތު ނަގާލާށެވެ. ގައުމު ހަލަބޮލިކޮށް ބޮޑު ހައިޖާނުގަނޑަކަށް މިކަންތައް ހަދާށެވެ. ގާނޫނުއަސާސީގެ ދިފާއުގައި އެމްޑީޕީން ނިކުތުން ވެގެންދާނީ ވަރަށް ހެއްވާކަމަށެވެ. ގާނޫނުއަސާސީ އެފުށް މިފުށަށް ޖަހައި، ގައުމު ދަރުވާލައި، ގައުމު ވިއްކާލާފައި ދެން ކޮން ގާނޫނުއަސާސިއެކޭ ކިޔާކަށް ހެއްޔެވެ؟ ގާނޫނުއަސާސީގެ ދިފާއުގައޭ ކިޔާފައި މަގުމައްޗަށް ނިކުންނަން އެމްޑީޕީން ލަދުގަންނަން ޖެހެއެވެ. ގާނޫނުއަސާސީގެ ދިފާއުގައި އެމްޑީޕީން މި ނިކުންނަނީ ކޮން ހައިސިއްޔަތަކުންތޯ ސުވާލު ކުރަންޖެހޭހާ ފަތިފުށް ހަޑި ވެރިަކަމެއް ކުރި ބައެކެވެ.
