އެމްޑީޕީ ވުޖޫދުވެގެން ދިއުމަކީ ދިވެހިރާއްޖޭގެ ހަލާކު ކަމަށް މިނިސްޓަރ އޮފް ސްޓޭޓް ފޮރ ހޯމް ލޭންޑް ސެކިއުރިޓީ އެންޑް ޓެކްނޮލޮޖީ އަލްއުސްތާޛް އަހުމަދު ޞިއްދީގު ވިދާޅުވެއްޖެއެެވެ.
އަސްލުޓީވީގެ 'ބާބު' ޕްރޮގްރާމްގައި ވާޙަކަދައްކަވަމުން ސިއްދީގު ވިދާޅުވީ ދިވެހިރާއްޖޭގެ ހަލާކަކީ އެމްޑީޕީ ކަމަށެވެ. މިކަމާ މެދު ބަހުސް ކުރާކަށް އެއްވެސް ޖާގައެއް ނޯންނާނެ. ކަމަށެވެ. ސިއްދީގު ވިދާޅުވީ އެ ޕާޓީ ވުޖޫވި ހިސާބުން ފެށިގެން ހުރިހާ ރަނގަޅު އާދަތަކެއް މިގައުމުން ފޮހެވިގެން ގޮސްފައިވާ ކަމަށެވެ.
އެ އާދަތައް އެ ޕާޓީން ފޮހެލީ ސިޔާސީ ބޭނުމަށްޓަކައި ކަން ފާހަގަކުރައްވާ ސްޓޭޓް މިނިސްޓަރު ސިއްދީގު ވިދާޅުވީ ރައްޔިތުންގެ ސިކުނޑިއާ ކުޅެލެވޭ ކަހަލަ މައުލޫއެއް ލިބުމާއެކު އެކަމުންވެސް ސިޔާސީ މަންފާއެއް ހާސިލުކުރުމަށް ރައްޔިތުންގެ ބޮލަށް ނުބައި ވިސްނުމެއް ވެއްދުމަށް އެމްޑީޕީން މަސައްކަތް ކުރާކަމާ މެދު ޝައްކު ނުކުރައްވާ ކަމަށެވެ. އެހެން ވިދާޅުވެ، ސިއްދީގު ވަނީ އިޒްރޭލް ޕާސްޕޯޓް މަނާކުރުމުގެ މައްސަލައަށް އަލިއަޅުއްވާލައްވާފައެވެ.
ސިއްދީގު ވިދާޅުވީ އެމްޑީޕީގެ ސުޕަރ މެޖޯރިޓީ އޮވެގެން އެ ޕާޓީއަށް ލިބުނު ވަގުތުގައި ކަންތައް ކުރި ގޮތް އެންމެނަށް ވެސް ފެނިފައިވާ ކަމަށެވެ. އެގޮތުން އިޒްރޭލު މީހުން މި ގައުމަށް ގެނެސް، ގައުމުގައި ބައިތިއްބާ ކަންތައް ކުރީ 'ހަންފެތުރުމުގެ' އުސޫލުން ކަންތައްތައް ހިނގާ ފަދައަކުން ކަމަށް ސިއްދީގު ވިދާޅުވިއެވެ. އަދި އެ މީހުންނާ ގުޅުން ހުރި ފަރާތްތަކަށް ދައުވަތުދީ ރައީސް އޮފީހުގެ ތެރޭގައި ވެސް މަސައްކަތްތަކެއް ކުރި ކަމަށެވެ.
އިތުރަށް ވާހަކަދައްކަވަމުން ސްޓޭޓް މިނިސްޓަރު ވިދާޅުވީ އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އިޒްރޭލުގެ ޕާސްޕޯޓު މަނާކުރާނެ ކަމަށް ސާފުކޮށް، ނިކަން ކެރިވަޑައިގެން ވިދާޅުވާ ކަމަށެވެ.
އެއޮތީ އަޅުގަނޑުމެންގެ ސްޓޭޓްމަންޓް ނެރެވިފަ. އެއޮތީ ދިވެހިރާއްޖޭގެ ސިޔާސަތު މިކަމުގަ ކަނޑައެޅިފަ. - މިނިސްޓަރ އޮފް ސްޓޭޓް ފޮރ ހޯމް ލޭންޑް ސެކިއުރިޓީ އެންޑް ޓެކްނޮލޮޖީ އަލްއުސްތާޛް އަހުމަދު ޞިއްދީގު
ސިއްދީގު ވިދާޅުވީ ރައީސް އެހެން ވިދާޅުވުމުގެ މާނައަކީ ދިވެހިރާއްޖޭގެ ސިޔާސަތަކީ އަދި ދިވެހި ދައުލަތުގެ ސިޔާސަތަކީ ވެސް އެއީ ކަމަށެވެ. އަދި އެ ސިޔާސަތު ތަންފީޒު ކުރެވިގެންދާނެ ކަމާ މެދު ޝައްކު ނުކުރައްވާ ކަމަށް ވެސް ސްޓޭޓް މިނިސްޓަރު ވިދާޅުވިއެވެ.
ފިތުނަ އުފެއްދުމަށްޓަކައި އެމްޑީޕީން ކެނޑިނޭޅި މަސައްކަތް ކުރަމުންދާ ކަން ފާހަގަކުރައްވާ ސިއްދީގު ވިދާޅުވީ އެ ޕާޓީން ރައްޔިތުންގެ ވިސްނުމަށް ނުރަނގަޅު ބަދަލެއް ގެނައުމަށް އެންމެ ގިނައިން ދައްކާ އެއް ވާހަކައަކީ މިކަމަށް ދިގު މުއްދަތެއް ފާއިތުވެއްޖެ ކަމަށް ބުނުން ކަމަށެވެ. ނަމަވެސް މޫލާފައިވާ ކަމެއް މުލުން ލުހެލުމަށްޓަކައި މުއްދަތުތަކެއް ނަގާނެ ކަމަށް ވިދާޅުވިއެވެ. އަދި ވިދާޅުވީ ކުއްލިއަކަށް އަޅާ ފިޔަވަޅަކީ އެންމެ އެކަށީގެންވާ، ގައުމަށް އެންމެ ރަނގަޅު ފިޔަވަޅަށް ނުވެ ހިނގައިދާނެ ކަމަށެވެ.
މިއީ ޒަމާންވީ މަސައްލައެއް ކަމަށާ، މިކަމަށް އަޅާ ފިޔަވަޅެއްގެ ސަބަބުން މިގައުމުގެ ރައްޔިތުންނަށް ބޮޑު ދަތިކަމެއް ނުވަތަ އުނދަގުލެއް އަދި ނުތަނަވަސްކަމެއް ލިބިދާނެ ހެން ހީވާނަމަ، އެކަމަށްޓަކައި އަޅަންޖެހޭނީ ވަރަށް ހިކުމަތްތެރި ފިޔަވަޅުތަކެއް ކަމަށް ސިއްދީގު ވިދާޅުވިއެވެ. އަދި އެއީ 24 ގަޑިއިރުން ނިންމާލެވޭ ނިންމުމަކަށް ވެގެން ނުވާނެ ކަމަށް ވެސް ވިދާޅުވިއެވެ.
އިޒްރޭލު ޕާސްޕޯޓު މައްސަލައިގައި އެންމެ ވަރުގަދަ އެއް ސްޓޭންޑެއް ނެގި އެއް ގައުމަކީ ދިވެހިރާއްޖެ ކަމަށާ މި ކުޑަކުޑަ އާބާދީން އދ. ގަ ވަރަށް ސާފުކޮށް ވަރަށް ރީތިކޮށް، އިޒްރޭލުން އެ ކަންތައްކުރާ ގޮތް ކުށްވެރިކޮށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސަތާ އެއްގޮތަށް ދިވެހި ދައުލަތުން ވަކާލާތުކޮށް އިޒްރޭލަކީ ދިވެހިންނަށް ކޮން ބައެއްކަން ދައްކުވައިދީފައިވާ ކަމަށެވެ.
ސިއްދީގު ވިދާޅުވީ އިޒްރޭލުން އެކުރަމުންދާ ލާއިންސާނީ އަމަލުތައް ސާފުކޮށް މިގައުމުން ކުއްވެރި ކުރަމުންދާ ކަމަށެވެ. އެހެންކަމުން އެކަމަށް ވެރިވެގަތުމުގެ ހައްގެއް އެމްޑީޕީއަކަށް ނޯންނާނެ ކަމަށް ސިއްދީގު ވިދާޅުވިއެވެ.
