ގާނޫނު އަސާސީއަށް ގެނައި ހަ ވަނަ އިސްލާހާއެކު ބަޔާން ކޮށްދެނީ ރައްޔިތުންގެ މަޖިލީހުގެ މެންބަރުން ވަކިކުރެވޭނެ އުސޫލެއް ކަމަށް ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު ވިދާޅުވެއްޖެއެވެ.
އަސްލުޓީވީގެ ‘ބާބު’ ޕްރޮގްރާމްގައި ވާހަކަ ދައްކަވަމުން މެމްބަރު ވިދާޅުވީ ރައްޔިތުންގެ މަޖިލީހުގެ މެމްބަރުންނަށް ދީފަ އޮތް ބާރާ މިނިވަންކަމުގެ ތެރެއިން މިހާރު މި ޕްރެކްޓިސް ކުރާ ނިޒާމުގެ ތެރޭގައި ގިނަ މަޖިލިސް މެމްބަރުންތައް ހޮވެމުން އައީ ޕާޓީއަކުން ކަމަށެވެ.
އެގޮތުން ގިނަ މެމްބަރުން ހޮވެނީ ޕާޓީ ފިކުރުގައި، ޕާޓީތަކުން ގާނޫނުގަ ބުނާ މިންވަރަށް ޚަރަދު ކޮށްގެން. ޕާޓީގެ ފިކުރު ވިއްކައިގެން ، ޕާޓީގެ ސިޔާސަތުތައް ވިއްކައިގެން. އަދި ޕާޓީގެ އެންމެ އިސް ފަރާތްތަކުން މަސައްކަތް ވެސް ކޮށްގެން ކަމަށެވެ.
މާޒީއަށް ބަލާއިރު ހަމަ މިގޮތަށް މެންބަރުން ހޮވިގެން އައިސް ރައްޔިތުންގެ މަޖިލީހަށް އަންނަ މުހިއްމު ވޯޓުތަކާ އަދި ޚާއްސަކޮށް ގާނޫނު ތަންނުދޭ ކަންކަން ކުރުމަށް ފައިސާ އެބަދޭ. ބައެއް މެންބަރުންނަށް އެބަ އާދޭ ރިޝަވަތުގެ ތުހުމަތު ވެސް. އެބަކުރެ އެހިސާބުން ރައްޔިތުން ބުނަން ފެށީ ކީއްވެގެންހޭ ވަކި ޕާޓީއަކުން އައިސް އެއްވެސް ކަހަލަ މަންފާއެްއް ނެތި އެހެން ޕާޓީއަކަށް ބަދަލުވެދާނެހޭ. - ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު
މެމްބަރު ވިދާޅުވީ ގާނޫނު އަސާސީގައި ރައީސުލްޖުމްހޫރިއްޔާ ވެސް ވަކިކުރެވޭނެ އުސޫލެއް އޮތް ނަމަވެސް މަޖިލިސް މެމްބަރުން އިންތިޚާބުވުމަށް ފަހު ކޮންމެ ކަމެއް ކުރިކަމުގައި ވީނަމަވެސް ވަކި ކުރެވޭނެ އެއްވެސް އުސޫލެއް ނެތް ކަމަށެވެ.
ނަމަވެސް ގާނޫނު މީގެ ކުރިން އެ ބާރު އެއްވެސް ބަޔަކަށް ނެތް. މެންބަރުންގެ މި ގެނެވުނު އިސްލާހަގަ. މުތުލަގުކޮށް ޕާޓީއަކަށް ބާރެް ނުލިބޭ މެންބަރުން ވަކި ކުރާކަށް. ގާނޫނާ އެއްގޮަށް ޕާޓީން ވަކި ކޮށްފިއްޔާ. ކޯޓަށް ދިއުމުގެ ހައްގު އޮންނާނެ. އެކަން ޖެހޭނީ ގެންނަން. ޕާޓީތަކާ ބެހޭ ގާނޫނަށް އެބައި ގެންނަން. ގާނޫނު އަސާސީގަ ބުނެފަ ނެތިއްޔާ އެބަ ގެންނަން ޖެހޭ. މެންބަރުންވެސް ވަކި ކުރެވިދާނެ ގޮތްތަކެއް މި ބަޔާންކުރީ. މި ގާނޫނު ހެދިގެން ދާއިރުގަ މެންބަރުން ވަކިވުމުގައި ވެސް ހަރުދަނާ އުސޫލުތަކެއް ކަނޑައެޅިގެން ދާނެ. - ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު
މެމްބަރު ވިދާޅުވީ ގާނޫނު އަސާސީ އިސްލާހުކުރުން ވެސް އޮންނަނީ ހަމަ އާންމުކޮށް ބިލެއް ހުށަހަޅާ އުސޫލުން ހަތަރު ކިޔުން ކިޔައިގެން އެ އިޖުރާއަތުތައް ފުރިހަމަ ކޮށްގެން ކަމަށެވެ. ނަމަވެސް އެ ގެންދާ އަވަސް ލަސްމިން ބިނާ ވަނީ މެމްބަރުން ބަހުސް ކުރާ ވަގުތާ، ޕާޓީތަކުން އެ ބޭނުންކުރާ ވަގުތާ، އެ ކަންކަމުގެ މައްޗަށް ކަމަށެވެ.
ގާނޫނު އަސާސީގެ 267 ވަނަ މާއްދާގައި ގާނޫނު އަސާސީއަށް އިސްލާހު ގެނެސްގެން ނުވާނެ ވަގުތު ބަޔާންކޮށްފައިވާއިރު، ކުއްލި ނުރައްކަލުގެ ހާލަތު އިއުލާނު ކޮށްފައި ވަނިކޮށް ގާނޫނު އަސާސީއަކަށް އިސްލާހެއް ނުގެނެވޭނެ ކަން މެމްބަރު ފާޙަގަކުރެއްވިއެވެ.
އެހެންވީމަ ފުރަތަމަ ކަމަކަށް، ގާނޫނު އަސާސީއަށް އިސްލާހު ގެނައި ވަގުތު ނުވަތަ އޭގެ ޑިއުރޭޝަން ،އެކަމާ މެދު ގާނޫނީ ގޮތުން ކުރެވޭނެ އެއްވެސް ބަހުސެއް ނެތް. ވަރަށް ސާފު އެއްޗެއް އެއީ. ދެން އަވަސް ލަސްމިނާ ބެހޭގޮތުން ވާހަކަދެއްކިދާނެ ބުއްދީގެ ގޮތުން. ފުރުސަތު ނުދެއޭ. ބައެއް މީހުން އިސްލާހު ހުށަހަޅާނެ ފުރުސަތު ނުދެއޭ. އެ ކަންބޮޑުވުންފާޅު ކޮށްފަ އެބަހުއްޓޭ. - ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު
މެމްބަރު ވިދާޅުވީ އެހެންކަމުން ގާނޫނު އަސާސީއަށް ހަ ވަނަ އިސްލާހު ގެނެސްފައިވަނީ ގާނޫނު އަސާސީގެ ބަޔާންކޮށްފައިވާ އިޖުރާއަތުތަކާ އެއްގޮތަށް ކަމަށެވެ.
