މާރާމާރި ހިންގި ބިދޭސީން ހޯދައި ފިޔަވަޅު އަޅާނަން: އިމިގްރޭޝަން ކޮންޓްރޯލަރ ޝަމްއާން

އާރޓިފިޝަލް ބީޗު ސަރަހައްދުގައި މާރާމާރީ ހިންގައި އާއްމު މަސްލަހަތު ނަގާލުމުގައި ބައިވެރިވެފައިވާ ބިދޭސީންގެ މައްސަލަ ޓާސްކް ފޯހުން މިހާރު ބަލަމުންދާ ކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުހަންމަދު ޝަމްއާން ވަހީދު ވިދާޅުވެޖެއެވެ.

އެކްސްގައި ކުރެއްވި ޕޯސްޓެއްގައި ޝަމްއާން ވިދާޅުވެފައިވަނީ އިއްޔެ އިރުއޮއްސުނު ވަގުތު އާރޓިފިޝަލް ބީޗު ސަރަހައްދުގައި މާރާމާރީ ހިންގައި އާއްމު މަސްލަހަތު ނަގާލުމުގައި ބައިވެރިވެފައިވާ ބިދޭސީންގެ މައްސަލަ ޓާސްކް ފޯހުން މިހާރު ބަލަމުންދާ ކަމަށެވެ. އަދި މިކަމުގަ ޝާމިލުވެފައިވާ ބިދޭސީންނަށް ފިޔަވަޅު އަޅާނެ ކަމުގެ ޔަޤީންކަން ކޮންޓްރޯލަރ ޝަމްއާން ދެއްވާފައި ވެއެވެ.

އިއްޔެ އިރުއޮއްސި 06:22 ގައި އާޓިފިޝަލް ބީޗު ސަރަހައްދުގައި ބަޔަކު މާރާމާރީ ހިންގި މައްސަލައެއް ފުލުހުންނަށް ރިޕޯޓު ކޮށްފައިވާ ކަމަށާއި، މި މައްސަލައާ ގުޅިގެން ބަލަން ޖެހޭ ކަންކަން ފުލުހުން ބަލަމުންދާ ކަމަށް ފުލުހުން ވަނީ ބުނެފައެވެ.

މި މާރާމާރީއާ ގުޅިގެން ސޯޝަލް މީޑިއާގައި ދައުރުވަމުން އަންނަ ވީޑިއޯއިން ފެންނަ މަންޒަރަށް ބަލާއިރު އެވަގުތު އެ ސަރަހައްދުގައި ގިނަ އަދަދެއްގެ މީހުން އެއްވެ ތިއްބެވެ. އޭގެތެރޭގައި ކުޑަކުދިން ވެސް ތިބިކަން ފާހަގަކޮށް ލެވެއެވެ.