ލ އަދި މ އަތޮޅުގައި ފެރީގެ ހިދުމަތް ފަށަނީ

މި ހިނގާ މާރިޗު މަސް ނިމުމުގެ ކުރިން މ. އަތޮޅާއި ލ. އަތޮޅުގައި ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ހިދުމަތް ފެށުމަށް މަސައްކަތް ކުރަމުންދާ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަމީން ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރައްވާފައިވާ ފަދައިން، ކުރިއަށް އޮތް ހަ މަސްދުވަހުގެ ތެރޭގައި ރާއްޖޭގެ ހުރިހާ އަތޮޅެއް ހައިސްޕީޑް ފެރީގެ ނިޒާމުން ގުޅާލުމަށް ބާރުސްޕީޑުގައި މަސައްކަތް ކުރަމުންދާ ކަމަށެވެ.

އެގޮތުން، މާރިޗު މަސް ނިމުމުގެ ކުރިން މ. އަތޮޅާއި ލ. އަތޮޅުގައި މި ހިދުމަތް ރަސްމީކޮށް ފެށޭނެ ކަމުގެ ޔަގީންކަން މިނިސްޓަރު ދެއްވިއެވެ. އަދި މި ހިދުމަތް ފަށާނެ ސީދާ ތާރީހެއް ކުރިއަށް އޮތް ދެ ދުވަހެއްގެ ތެރޭގައި ކަނޑައަޅައި، ރަސްމީކޮށް އިއުލާނު ކުރައްވާނެ ކަމަށްވެސް އަމީން ފާހަގަކުރެއްވިއެވެ.

މިހާތަނަށް ރާއްޖޭގެ 14 އަތޮޅެއްގެ 132 ރަށެއްގައި އާރްޓީއެލްގެ ހިދުމަތް ފޯރުކޮށްދެމުންދާއިރު، އެންމެ ފަހުން މި ނިޒާމުން ގުޅާލާފައިވަނީ ފ. އަތޮޅާއި ދ. އަތޮޅެވެ. އެ ދެ އަތޮޅުގައި ހިދުމަތް ދޭން ފަށާފައިވަނީ މިދިޔަ ފެބްރުއަރީ މަހުގެ 17 ވަނަ ދުވަހުއެވެ.