އެޗްޑީސީ އާއި ތެލެސީމިއާ ސޮސައިޓީ އާއި ދެމެދު އެއްބަސްވުމެއްގައި ސޮއިކޮށްފި

ހުޅުމާލޭގައި ތެލެސީމިއާއަށް ހޭލުންތެރިކުރުމުގެ ހަރަކާތްތައް ހިންގުމަށްޓަކައި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް ތެލެސީމިއާ ސޮސައިޓީއާ ދެމެދު މުހިންމު އެއްބަސްވުމެއްގައި ސޮއިކޮށްފިއެވެ.

މި އިއްޔެ އެޗްޑީސީގެ ހެޑް އޮފީހުގައި ބޭއްވުނު ޚާއްޞަ ރަސްމިއްޔާތެއްގައި، އެ ކުންފުނީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރ ބްރިގޭޑިއަރ ޖެނެރަލް (ރިޓަޔަރޑް) ޢަލީ ޒުހައިރެވެ. ތެލެސީމިއާ ސޮސައިޓީގެ ފަރާތުން ސޮއިކުރެއްވީ އެ ޖަމްޢިއްޔާގެ ޗެއަރޕާސަން އިމާން މުޙައްމަދެވެ.

އެއް އަހަރު ދުވަހުގެ މުއްދަތަށް އަމަލުކުރުމަށް ހަމަޖެހިފައިވާ މި އެއްބަސްވުމުގެ ދަށުން، ތެލެސީމިއާ ސޮސައިޓީގެ އިދާރީ މަސައްކަތްތަކަށް ބޭނުންވާ އޮފީސް ޖާގަ ހުޅުމާލެއިން ހަމަޖައްސައިދިނުމަށް އެޗްޑީސީން ވަނީ ނިންމާފައެވެ. މީގެ އިތުރުން، ހުޅުމާލޭގެ ފުރަތަމަ ފިޔަވަހި އަދި ދެވަނަ ފިޔަވަހީގައި ދިރިއުޅޭ ރައްޔިތުންނަށް އަމާޒުކޮށްގެން، ތެލެސީމިއާއަށް ހޭލުންތެރިކުރުމުގެ ސެޝަންތައް އެޗްޑީސީއާ ގުޅިގެން ކުރިއަށް ގެންދިއުމަށްވެސް ވަނީ އެއްބަސްވެފައެވެ.

މި އެއްބަސްވުމުގެ މައިގަނޑު މަޤްޞަދަކީ ތެލެސީމިއާއާ ބެހޭ މަޢުލޫމާތު ވީހާވެސް ފުޅާ ދާއިރާއެއްގައި އާންމުންނަށް ފޯރުކޮށްދިނުމެވެ. އަދި މި ބަލީގެ ނުރައްކަލަށް ހޭލުންތެރިކަން އިތުރުކޮށް، ރާއްޖޭގައި ތެލެސީމިއާ ކުދިން އުފަންވާ ނިސްބަތް ދަށްކުރުމަށް މަސައްކަތް ކުރުމެވެ.

އެޗްޑީސީން ހާމަކުރި ގޮތުގައި، ކުރިއަށް އޮތް ތަނުގައިވެސް މުޖުތަމަޢުގެ ލާބަޔާއި މަންފާއަށްޓަކައި މިފަދަ އިޖުތިމާޢީ ޕްރޮގްރާމުތަކަށް އެ ކުންފުނިން އަބަދުވެސް އެއްބާރުލުން ދެމުންދާނެއެވެ.