މެދުއިރުމަތީގެ ހަނގުރާމައިގެ އަސަރުކުރޭ، ހައްލުހޯދަން މިދަނީ މަސައްކަތްކުރަމުން: އަމީން

މެދުއިރުމަތީގައި މިހާރު ހިނގަމުންދާ އަސްކަރީ ހަމަނުޖެހުންތަކުގެ ސަބަބުން ރާއްޖެއަށް ކުރިމަތިވަމުންދާ ގޮންޖެހުންތައް ހައްލުކުރުމަށް ސަރުކާރުން ހާއްސަ މަސައްކަތްތަކެއް ކުރައްވަމުންދާ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން، މުޙައްމަދު އަމީން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވަނީ، މެދުއިރުމަތީގެ މަސްރަޙަށް އައިސްފައިވާ ބަދަލުތަކުގެ ސަބަބުން ދަތުރުފަތުރާއި މަދަނީ އޭވިއޭޝަންގެ ދާއިރާއަށް ކުރިމަތިވަމުންދާ ދަތިތަކުގެ ތަފުސީލު ހިއްސާކުރައްވާފައެވެ.

ކުރިއަށް އޮތް ދުވަސްތަކުގައި މި ހާލަތުން އަރައިގަތުމަށް ސަރުކާރުން އެކުލަވާލާފައިވާ އުސޫލުތަކާއި ކުރަމުންދާ މަސައްކަތްތަކުގެ ޚުލާސާއެއް އެމަނިކުފާނު ހުށަހެޅުއްވިއެވެ.

މިނިސްޓަރު ފާހަގަކުރެއްވި ގޮތުގައި، މި ހަނގުރާމައިގެ ސަބަބުން ރާއްޖޭގެ ވައިގެ ދަތުރުފަތުރަށް ވަނީ ބޮޑެތި ބުރޫތަކެއް އަރާފައެވެ. އެގޮތުން، މިއަދު ރާއްޖެއަށް އައުމަށް ހަމަޖެހިފައިވާ 53 ޝެޑިއުލް ފްލައިޓްގެ ތެރެއިން 18 ފްލައިޓެއް ކެންސަލްވެފައިވާކަން އެމަނިކުފާނު ހާމަކުރެއްވިއެވެ.

މީގެ ތެރޭގައި ހިމެނެނީ ދުބާއީ، އަބޫދާބީ، ދޯހާ، ޝާރްޖާ އަދި ބަހްރޭނުން ރާއްޖެއަށް ދަތުރުކުރަން އޮތް ފްލައިޓްތަކެވެ.

ވަޒީރު އިތުރަށް ވިދާޅުވީ، ފާއިތުވި ދުވަސްތަކުގައިވެސް މިފަދަ ގިނަ އަދަދެއްގެ ފްލައިޓްތައް ކެންސަލްވުމަކީ ރާއްޖޭގެ ފަތުރުވެރިކަމަށް އެކަމުގެ ނޭދެވޭ އަސަރު ފޯރާނެ ކަމެއް ކަމަށެވެ.

މި ހާލަތުގެ ސަބަބުން، ރާއްޖޭގައި ތިބި ފަތުރުވެރިން އަނބުރާ ގައުމަށް ދިއުމުގައި ދަތިތަކާ ކުރިމަތިލާން ޖެހިފައިވާ ކަމަށާއި، މިހާތަނަށް ގާތްގަނޑަކަށް 379 ފަތުރުވެރިން ފުރޭނެ ގޮތެއް ނެތި މަޑުކުރަން ޖެހިފައިވާ ކަމަށްވެސް މިނިސްޓަރު ވިދާޅުވިއެވެ.