ހުޅުމާލޭގައި އަލަށް ގާއިމްކުރާ 1000 ފްލެޓްތަކުގެ އަގު ހެޔޮވާނެ: ވަޒީރު މުއްތަލިބު

ބޭންކު ލޯނު މެދުވެރިކޮށް ލުއި ގޮތްތަކެއްގެ މަތިން އަމިއްލަ ބޯހިޔާވަހިކަން ހޯދުމުގެ ފުރުސަތު ފަހިކޮށްދިނުމަށް ސަރުކާރުން ތައާރަފުކުރި އެފޯޑަބަލް ހޯމް އޯނާޝިޕް ޕްރޮގުރާމް ގެ ދަށުން ހުޅުމާލޭގައި ތަރައްގީކުރާ ފްލެޓުތަކުގެ އަގުތައް ސަރުކާރުން އިއުލާނުކޮށްފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން، އިމާރާތްކުރުމާއި ބިނާރާއި ގެދޮރުވެރިކަމާ ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވީ، މި މަޝްރޫއުގެ ދަށުން އިމާރާތްކުރާ 1,000 ފްލެޓުގެ އަގުތައް ވަކި އިންތަކެއްގެ ތެރޭގައި ހިފަހައްޓާނެ ކަމަށެވެ. އެގޮތުން، ދެ ކޮޓަރީގެ އެޕާޓްމަންޓެއްގެ އަގު 1.8 މިލިއަން ރުފިޔާއަށްވުރެ ބޮޑުނުވާނެ ކަމަށާއި، ތިން ކޮޓަރީގެ އެޕާޓްމަންޓެއްގެ އަގު 2.3 މިލިއަން ރުފިޔާއަށްވުރެ ބޮޑުނުވާނެ ކަމަށް ވަޒީރު ވިދާޅުވިއެވެ.

މިހާރު ރާއްޖޭގެ މާކެޓުގައި އަމިއްލަ ކުންފުނިތަކުން ވިއްކާ ފްލެޓުތަކުގެ އަގަށް ބަލާއިރު، ދެ ކޮޓަރީގެ އެޕާޓްމަންޓެއްގެ އަގު އުޅެނީ 2 މިލިއަނާއި 3 މިލިއަން ރުފިޔާއާ ދެމެދުގައެވެ. އަދި ތިން ކޮޓަރީގެ އެޕާޓްމަންޓްތަކުގެ އަގު އާންމުކޮށް އުޅެނީ 3 މިލިއަނާއި 4 މިލިއަން ރުފިޔާއާ ދެމެދު ނުވަތަ އެއަށްވުރެވެސް މަތީގައެވެ.

ވަޒީރު އިތުރަށް ބަޔާންކުރެއްވި ގޮތުގައި، މި ޕްރޮގުރާމަކީ ހައުސިން މޯގޭޖު މެދުވެރިކޮށް ބޭންކު ލޯނު ނަގައިގެން ގެދޮރު ގަތުމުގެ މާލީ ގާބިލުކަން ހުރި އާއިލާތަކަށް ހާއްސަކޮށްގެން ހިންގާ މަޝްރޫއެކެވެ. މި މަޝްރޫއުގެ ދަށުން ފްލެޓުތައް ތަރައްގީކުރުމަށް ޝައުގުވެރިވާ އަމިއްލަ ކުންފުނިތަކަށް މިހާރު ވަނީ ފުރުސަތު ހުޅުވާލާފައެވެ.

ޑރ. މުއްތަލިބު ފާހަގަކުރެއްވި ގޮތުގައި، މިހާރު މާކެޓުގައި ގެދޮރު ލިބެން ހުރި އަގުތަކާ އަޅާބަލާއިރު، ސަރުކާރުން ކަނޑައެޅި މި އަގުތަކަކީ އާންމުންނަށް ބޮޑެތި ލުއިތަކެއް ލިބިގެންދާނެ، އެކަށީގެންވާ ހެޔޮ އަގުތަކެކެވެ.