ވަޒީރުން ބަދަލުވުން ފިޔަވައި ޞިއްޙަތަކަށް ލުޔެއް ނެތް!

ދިވެހިރާއްޖޭގެ ޞިއްޙީ ދާއިރާއަކީ ރައްޔިތުންގެ ފުރާނައާ ސީދާ ގުޅިފައިވާ އެންމެ މުހިންމު ޚިދުމަތެވެ. ނަމަވެސް، ވެރިކަމަށް ތިންއަހަރު ވެގެންދާއިރު ފެންނަމުން މިދަނީ ޞިއްޙީ ނިޒާމު ބޮއްސުންލައި، ސަރުކާރުގެ ނާޤާބިލުކަމުގެ ސަބަބުން އާންމު ރައްޔިތުންގެ ޒަރޫރީ ޙައްޤުތައް ފޭރިގަންނަމުންދާ މަންޒަރެވެ. ޞިއްޙީ ކާރިޘާއެއްގެ ތުންފަތްމައްޗަށް ޤައުމު ވެއްޓިފައިވާއިރު، ރައްޔިތުންގެ މެދުގައި ސަރުކާރާމެދު އޮތް ރުޅިވެރިކަމާއި ނުރުހުން މިހާރު ވަނީ އިންތިހާއަށް ގޮސް، ކެތްތެރިކަން ކޮޅުންލާފައެވެ.

މި ނާކާމިޔާބީގެ އެންމެ ބޮޑު އެއް ސަބަބަކީ ޞިއްޙީ ވުޒާރާގެ ހިންގުން ސިޔާސީ ކުޅިވަރަކަށް ހަދައި، ވަޒީރުން ތަކުރާރުކޮށް ބަދަލުކުރުމެވެ. މި ސަރުކާރު ފެށުނުއިރު ވަޒީރަކަށް ހުންނެވި ޑރ. ޢަބްދުﷲ ޚަލީލް ސެޕްޓެމްބަރު 2024 ގައި ޚާރިޖީ ވަޒީރުކަމަށް ބަދަލުކުރެއްވިއެވެ. އޭގެފަހުން ވަޑައިގެންނެވި ޢަބްދުﷲ ނާޒިމް އިބްރާހީމް ވެސް އޭޕްރީލް 2026 ގައި ކެބިނެޓް ޑައުންސައިޒް ކުރުމުގެ ނަމުގައި މަޤާމުން ވަކިކުރެއްވިއެވެ. އަދި މިނިސްޓްރީތައް އެއްކޮށްލުމަށްފަހު ޤީލާ ޢަލީއާ ވުޒާރާ ޙަވާލުކުރެއްވި ނަމަވެސް، މި ބަދަލުތަކުން ނިކުތް އެއްވެސް ހެޔޮ ނަތީޖާއެއް ނެތެވެ. މި ހުރިހާ ހަލަބޮލިކަމެއްގެ އަޑީގައި، މުޅި ޞިއްޙީ ނިޒާމުގެ ހިންގުމަށާއި، އިސް މަޤާމުތަކަށް މީހުން އައްޔަންކުރުމާއި ސިޔާސަތުތައް އެކަށައެޅުމުގައި ފަސްޓްލޭޑީ ފޯރުވަމުންދާ ނޭދެވޭ ނުފޫޒު އިންތިހާއަށް ބޮޑުވެފައިވާ ކަމުގެ ޝަކުވާ ވަނީ އާންމުވެފައެވެ. މިފަދަ ނުފޫޒުތަކުގެ ސަބަބުން، ޞިއްޙީ ދާއިރާގައި ގިނަ ދުވަސްތަކެއް ވަންދެން ޚިދުމަތްކުރައްވާފައިވާ ޤާބިލު އަދި ތަޖުރިބާހުރި އިސް ބޭފުޅުންގެ މެދުގައި ވެސް ވަނީ ބޮޑު ނުތަނަވަސްކަމަކާއި މާޔޫސްކަމެއް އުފެދިފައެވެ. ފަންނީ ޤާބިލުކަމަށްވުރެ ބޮޑަށް ވަކި ފަރާތެއްގެ ރުހުމާއި ނުފޫޒަށް ބަރޯސާވެގެން ނިޒާމު ހިންގަން އުޅުމަކީ އިދާރީ ހިންގުން ބޮއްސުންލައި، މުޅި ދާއިރާގެ އިތުބާރު ގެއްލިގެން ދިޔަ މައިގަނޑު އެއް ސަބަބެވެ.

ހަމައެއާއެކު، ބަޖެޓު ހަމަޖެއްސުމުގެ ބަހަނާގައި މަހަކު 60،000 ރުފިޔާއަށްވުރެ މަތިން އާމްދަނީ ލިބޭ މީހުންގެ އާސަންދަ ކަނޑާލައި 'ކޯ-ޕޭމަންޓް' ތަޢާރަފްކުރަން ނިންމި ނިންމުމަކީ މެދުފަންތީގެ އާއިލާތަކަށްވި ވަރަށް ބޮޑު އިހުމާލެކެވެ. ޚާއްޞަކޮށް ބޮޑެތި ބަލިތަކަށް ފަރުވާ ހޯދާ މީހުން މާލީ އަނދަވަޅަކަށް ވެއްޓިފައިވާއިރު، ރައްޔިތުންގެ ޖީބަށް ބޮޑު ބުރައެއް ޖައްސައިގެން ސަރުކާރު ހިންގަން އުޅޭތީ އާންމުން ތިބީ އިންތިހާއަށް ނުރުހުންވެ، ރުޅިގަދަވެފައެވެ.

މީގެ އިތުރުން، ސަރުކާރުގެ ދޯހަޅި މާލީ އަދި އިމްޕޯޓް ސިޔާސަތުތަކުގެ ސަބަބުން މުޅި ޤައުމުން ޒަރޫރީ އެތައް ބޭހެއް ކެނޑިނޭޅި ހުސްވަމުންދާ މައްސަލައަކީ ރައްޔިތުންގެ ފުރާނައަށް ވެވޭ ބޮޑު އިހުމާލެކެވެ. ބޭސްފޮއްޗެއް ނުލިބިގެން ފާމަސީތަކަށް ސަލާންޖަހަން ޖެހުމަކީ ރައްޔިތުންގެ ކެތްތެރިކަން ކޮޅުންލައި، ސަރުކާރުގެ ނާޤާބިލުކަމާ މެދު އިންތިހާއަށް ރުޅިގަދަވެފައިވާ މައިގަނޑު އެއް ސަބަބެވެ. ރައްޔިތުންގެ އަސާސީ މިފަދަ ޙައްޤުތައް ވެސް ރައްކާތެރިކޮށްނުދެވި، ފުރާނައަށް ނުރައްކާވާ ހިސާބަށް ކަންކަން ދޫކޮށްލާފައިވާތީ މުޅި ސަރުކާރާމެދު އޮތް އިތުބާރު މިހާރު ވަނީ އެއްކޮށް ގެއްލިފައެވެ.

އަނެއްކޮޅުން، އަތޮޅުތެރޭގެ ޞިއްޙީ ޚިދުމަތް ދޭ ތަންތާގެ ލެބޯޓްރީތަކުން ޒަރޫރީ ޓެސްޓުތައް ނުހެދި، އެކަމަށް ބޭނުންވާ އަސާސީ ކޮންސިއުމަބަލްސް ކެނޑިނޭޅި ހުސްވަމުންދާ މައްސަލައަކީ ރަށްރަށުގެ ރައްޔިތުންނަށް ކުރިމަތިވެފައިވާ ބޮޑު ތަކުލީފެކެވެ. އެންމެ އާދައިގެ ޓެސްޓެއް ނުވަތަ ޑައިގްނޯސްޓިކް ޚިދުމަތެއް ހޯދުމަށްވެސް ބޮޑު ޚަރަދުކޮށްފައި މާލެއަށް ބަރޯސާވާންޖެހުމަކީ ރައްޔިތުންގެ ރުޅިވެރިކަން އިންތިހާއަށް އިތުރުވެގެންދާ ކަމެކެވެ. ސަރުކާރުން "ޑިޖިޓަލް ހެލްތު" ފަދަ ބޮޑެތި ޕްލޭންތަކުގެ ވާހަކަ ދައްކައިގެން ރައްޔިތުންގެ ލޮލުގައި އަނދުންއަޅުވަން އުޅުނު ނަމަވެސް، އެންމެ އަސާސީ ޚިދުމަތްތައް ވެސް ފޯރުކޮށްނުދެވި ނިޒާމު ފޭލްވެފައިވާތީ، މުޅި ސަރުކާރާމެދު ރައްޔިތުން މިއަދު ތިބީ އިންތިހާއަށް މާޔޫސްވެ، ނިހާޔަތަށް ނުރުހުންވެފައެވެ.

ޙަޤީޤަތަކީ، ވެރިކަމުގެ މިވީ މުއްދަތުގައި ސަރުކާރަށް ކުރެވުނުހާވެސް ކަމަކީ ވަޒީރުން ބަދަލުކުރުމާއި ސިޔާސީ އޮނިގަނޑުތައް އަލުން އެކުލަވައިލުމެވެ. އެކަމަކު، އެއިން އެއްވެސް ބަދަލަކުން ރައްޔިތުމީހާގެ ޞިއްޙަތަކަށް، ތަޙައްމަލުކުރަމުންދާ ވޭނަކަށް ލިބުނު އެއްވެސް ލުޔެއް ނެތެވެ. ސިޔާސީ ނުފޫޒާއި ދޯހަޅި ސިޔާސަތުތަކުގެ ތެރޭގައި ޤައުމުގެ ޞިއްޙީ ނިޒާމު ސުންނާފަތިވަމުންދާއިރު، ރައްޔިތުންގެ ފުރާނައަކީ ސަރުކާރުގެ މިފަދަ ނާޤާބިލު ތަޖުރިބާތަކުގެ އަގެއް ނޫނެވެ. ދޮގު ޕްލޭންތަކުން ލޮލުގައި އަނދުންއަޅުވައި، ރައްޔިތުންގެ ޙައްޤުތަކަށް އިހުމާލުވުން ދެން އިތުރަށް ބަލައިގަންނާކަށް މި ޤައުމުގެ ރައްޔިތުން ކެތެއް ނުކުރާނެއެވެ. ސަރުކާރުން ދަންނަންވީ ކަމަކީ، ޞިއްޙީ ނިޒާމު އިޞްލާޙުވާނީ ވަޒީރުން ބަދަލުކޮށްގެން ނޫން ކަމާއި، ރައްޔިތުންގެ ފުރާނަ ސަލާމަތްކުރުމަށް ޒިންމާދާރު، އިޚްލާޞްތެރި އަދި ވަރުގަދަ ޢަމަލީ ފިޔަވަޅުތަކެއް އަޅައިގެން ކަމެވެ!