ހަނގުރާމަ ހުއްޓާލުމުގެ އެއްބަސްވުމަށްފަހު ވެސް ގައްޒާއިން 1,262 މީހުން ޝަހީދުކޮށްލައިފި

2025 އޮކްޓޯބަރުގައި ހަމަލާބަދަލުކުރުން ހުއްޓާލުމުގެ އެއްބަސްވުމަށް އަމަލުކުރަން ފެށި ފަހުންވެސް، އިސްރާއީލުން އެއްބަސްވުމާ ހިލާފަށް ދެމުންދާ ހަމަލާތަކުގައި ފަލަސްތީނުގެ 1,262 މީހުން ޝަހީދުވެ، 4,168 މީހުން ޒަހަމްކޮށްލައިފިއެވެ.

ޣައްޒާގެ ހެލްތު މިނިސްޓްރީން ހާމަކޮށްފައިވާ ތަފާސްހިސާބުތަކަށް ބަލާއިރު، މި މުއްދަތުގެ ތެރޭގައި ޝަހީދުވެފައިވާ 808 މީހެއްގެ ހަށިގަނޑު ފެނިފައިވާ ކަމަށްވެސް އެ މިނިސްޓްރީން މައުލޫމާތު ދެއެވެ.

މި ހަމަލާތަކުގެ ސަބަބުން، ހަމަލާބަދަލުކުރުން ހުއްޓާލުމުގެ އެއްބަސްވުން މިހާރު އޮތީ ނާޒުކު ފައްތަރެއްގައެވެ. އާދީއްތަ ދުވަހު ދީރުލް ބަލާހްގައި ސައިކަލަކަށް އަމާޒުކޮށް އިސްރާއީލުން ދިން ޑްރޯން ހަމަލާއެއްގައި ފަލަސްތީނުގެ ތިން މީހަކު ޒަހަމްވެފައިވާ ކަމަށް އަނަޑޯލޫ އެޖެންސީން ރިޕޯޓުކޮށްފައިވާއިރު، އޭގެ ތެރެއިން އެކެއްގެ ހާލު ސީރިއަސް ކަމަށް މެޑިކަލް މަސްދަރުތަކުން ބުނެއެވެ.

މަންޒަރު ދުށް މީހުންނާ ހަވާލާދީ ލިބޭ ރިޕޯޓުތަކުން އެނގޭ ގޮތުގައި، ރަފަހާއި ޣައްޒާ ސިޓީގެ އެކި ސަރަހައްދުތަކުގައި ގޮއްވުންތަކާއި އިމާރާތްތައް ތަޅާލުމުގެ އަމަލުތައް ހިންގަމުންދާއިރު، ޒައިތޫން އަވަށާ ކައިރި ހިސާބުތަކަށް އިސްރާއީލް ސިފައިން ދަނީ ބަޑީގެ ހަމަލާތައް ދެމުންނެވެ. މި ނުރައްކާތެރި ހާދިސާތަކުގެ ސަބަބުން މަސްލަހަތު އިތުރަށް ގޯސްވެ، އެއްބަސްވުން ދެމިއޮތުމާ މެދު ބޮޑެތި ސުވާލުތަކެއް ވަނީ އުފެދިފައެވެ.

ރޮއިޓާސް އިން ރިޕޯޓުކުރި ގޮތުގައި، މިދިޔަ އޮގަސްޓް 13 ވަނަ ދުވަހު އިސްރާއީލުން ޣައްޒާއަށް ދިން ހަމަލާތަކެއްގައި ފަލަސްތީނުގެ ދެ މީހަކު ޝަހީދުވެފައިވެއެވެ. މިއީ ހަފުތާއަކަށްވުރެ ގިނަ ދުވަސް ފަހުން މީހުން މަރުވި ކަމަށް ރިޕޯޓުކުރެވުނު ފުރަތަމަ ފަހަރެވެ. އިސްރާއީލުން ދައުވާކުރާ ގޮތުގައި މި ހަމަލާ އަމާޒުކުރީ ހަމަލާއެއް ދޭން އުޅޭ ކަމަށް ތުހުމަތުކުރެވޭ ހަމާސްގެ ކޮމާންޑަރަކަށެވެ.

ޣައްޒާގެ އިންސާނީ ހާލަތު މިހާރު އޮތީ އިންތިހާއަށް ދަތި ހާލަތެއްގައެވެ. ސިއްހީ ނިޒާމަށް ލިބިފައިވާ ބޮޑެތި ގެއްލުންތަކުގެ ސަބަބުން ބަލިމީހުންނަށް ފަރުވާ ދިނުމުގައާއި، ހަނގުރާމައިގެ ސަބަބުން ވަދެނުވެވޭ ގޮތަށް ހުރި ސަރަހައްދުތަކުން ޝަހީދުންގެ ހަށިގަނޑުތައް ނެރުމުގައި ސިއްހީ ހިދުމަތްތެރިންނަށް ވަނީ ވަސީލަތްތަކުގެ ދަތިކަމާއި ނުހަނު ގިނަ ހުރަސްތަކާ ކުރިމަތިލާން ޖެހިފައެވެ.

ޣައްޒާގައި ހިނގަމުންދާ ލޭއޮހޮރުވުންތަކުގައި ޝަހީދުވި މީހުންގެ އަދަދު އިންތިހާއަށް އިތުރުވަމުންދާއިރު، އެ ސަރަހައްދުގެ ސިއްހީ އިދާރާތަކުން މިއަދު އާންމުކުރި ތަފާސްހިސާބުތަކަށް ބަލާއިރު، 2023 އޮކްޓޫބަރު 7 އިން ފެށިގެން މިހާތަނަށް 73,391 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައެވެ. މީގެ އިތުރުން، ޒަޚަމްވި މީހުންގެ އަދަދު 174,000 އަށްވުރެ މައްޗަށް އަރާފައިވާއިރު، މީގެ ތެރޭގައި ހަމަލާ ބަދަލުކުރުން ހުއްޓާލުމުގެ އެކި މަރުހަލާތަކުގައި ޝަހީދުވި މީހުންވެސް ހިމެނެއެވެ.