ކުރީގެ ފޮރިންގ މިނިސްޓަރު ޝާހިދުގެ ބަންދަށް 30 ދުވަސް!

މޯލްޑިވިއަން ޑިމޮކްރަޓިކް ޕާޓީ، އެމްޑީޕީގެ ކުރީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު 30 ދުވަހުގެ މުއްދަތަށް ބަންދުގައި ބަހައްޓަން ކޯޓުން އަމުރުކޮށްފިއެވެ.

ކުޑަކުއްޖަކަށް ޖިންސީ ގޯނާކުރިކަމުގެ ތުހުމަތުގައި ކޯޓު އަމުރެއްގެ ދަށުން ފުލުހުންގެ ބެލުމުގެ ދަށަށް ޝާހިދު ގެންގޮސްފައިވަނީ ހޯމަ ދުވަހުގެ ރޭގެ ވަގުތެއްގައެވެ. ފުލުހުން ބުނީ، ހ. ރަބީއީމަންޒިލް، އަބްދުﷲ ޝާހިދު (64އ) ހައްޔަރުކުރީ 18 އަހަރުން ދަށުގެ ކުޑަކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއްގައެވެ.

ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ޝާހިދު ހައްޔަރުކޮށްފައި މިވަނީ، 2028 ވަނަ އަހަރު ބާއްވާ ރިޔާސީ އިންތިހާބުގައި ވާދަކުރެއްވުމަށް އެމްޑީޕީގެ ޕްރައިމަރީގައި ވާދަކުރައްވާނެކަން އޭނާ ރަސްމީކޮށް އިއުލާނު ކުރައްވާފައި ވަނިކޮށެވެ. އަދި އޭނާ ގެންދެވީ އެ އިންތިހަބުގެ ކެމްޕޭން ހަރަކާތްތައް ފައްޓަވައި، މާލޭގެ އިތުރުން އަތޮޅުތެރޭގެ އެކި ރަށްރަށަށް ޒިޔާރަތްކުރައްވަމުންކަން ވެސް ފާހަގަކޮށްލަންޖެހެއެވެ.

މި މައްސަލަ ފުލުހުން ތަހުގީގުކުރަމުން އަންނައިރު، މިއީ ދައުލަތުގެ މަތީ މަގާމެއް އަދާކުރައްވާފައިވާ އިސް ބޭފުޅަކު މިބާވަތުގެ ސީރިއަސް ކުށެއްގެ ތުހުމަތުގައި ރާއްޖޭގައި ހައްޔަރުކުރި ފުރަތަމަ ފަހަރެވެ.