logo

މުޅި ރަފަޙް ސިޓީ ހުސްކުރަން، އިސްތިއުމާރީ ސިފައިން އަމުރުކޮށްފި

profile

ސައިފް އަޒުހަރު - 31 މާރިޗު 2025 - 08:49

ޣައްޒާގެ ދެކުނުގެ މުޅި ރަފަޙް ސިޓީ ހުސްކުރަން، އިސްތިއުމާރީ ސިފައިން އަމުރުކޮށްފިއެވެ.

https://wamco.com.mv/

ރަފަޙް ސިޓީއަކީ ގާތްގަނޑަކަށް ތިންލައްކައަށްވުރެ ގިނަ މީހުން އުޅޭ ސިޓީއެކެވެ.

ރަފަޙް ސިޓީގެ ހުރިހާ ހިސާބަކަށް އިސްތިއުމާރީ ޓެރަރިސްޓުން މިހާރުވެސް ވައިގެ މަގުން ބޮންއަޅައި ކޮންމެ ދުވަހަކު އެތައް ބަޔަކު ޝަހީދު ކުރަމުން ގެންދާއިރު، އެއްގަމުމަގުން އަރައިގަނެ ބޮޑެތި ގަތުލުއާންމުތައް ހިންގަމުން ގެންދެއެވެ.

ރަފަޙް ސިޓީ ހުސްކޮށް، އެ ސިޓީގައި ތިބި އެންމެން ދިއުމަށް ޓެރަރިސްޓުން އަމުރުކުރަމުން ގެންދަނީ، ރަފަޙް ސިޓީގެ އުތުރުން އަލް މަވާސީ ސަރަހައްދަށެވެ.

އަލް މަވާސީ ސަރައްދަކީ، ޣައްޒާއާ ދެކޮޅަށް ހަނގުރާމަ ފެށިފަހުން ޓެރަރިސްޓުން ބޮޑެތި ގަތުލުއާންމު ހިންގާފައިވާ ސަރަހަދެކެވެ. "ރައްކާތެރި" ކަމަށް ބުނެ އަލް މަވާސީ ސަރަހައްދަށް މީހުން ޖަމާކޮށް ހަމަލާދީ މިހާތަނަށް އެތައްބަޔަކު ޝަހީދު ކޮށްލާފައި ވެއެވެ.

އިސްތިއުމާރީ އަސްކަރިއްޔާގެ ތަރުޖަމާނު ބުނެފައިވަނީ، ރަފަޙް ސިޓީގައި ސިފައިން "އޮޕަރޭޝަނެއް" ހިންގަން އުޅޭ ކަމަށާއި، އެހެންވެ އެކަކުވެސް ރަފަޙްގައި ހުރެގެން ނުވާނޭ ކަމަށެވެ.

ރަފަޙްގައި މިހާރުވެސް ބޮޑެތި ގަތުލުއާންމުތަކާއި، ލާއިންސާނީ އެތައް ޖަރީމާތަކެއް ހިންގާފައިވާކަން ފަޅާއަރައި، މީޑިއާއިން ރިޕޯޓްކުރަމުން އެބަ ގެންދެއެވެ.

ތަފާތު ހުއްޖަތްތައް ދައްކައި، ޣައްޒާގެ އާންމުން ގެދޮރުން ނެރެ، މަގުމަތިކޮށް އެއްތަނުން އަނެއްތަނަށް ފައްސައި، ހަމަލާދީ ޝަހީދުކުރުމަކީ ޓެރަރިސްޓުން އާންމުކޮށް ހިންގާ ޖަރީމާތަކެކެވެ.

ޣައްޒާގެ އެއްވެސް ހިސާބެއް ރައްކާތެރިއެއް ނޫނެވެ. މިއަދުވެސް އިރު ނާރަނީސް އަދި އިރު އެރިފަހުންވެސް ޣައްޒާގެ ހުރިހާ ހިސާބަކަށް ގެންދަނީ ހަމަލާތައް ދެމުންނެވެ.

ޣައްޒާގެ އުތުރުން ޚާން ޔޫނިސްއަށް ވަރުގަދަ ވައިގެ ހަމަލާތައް ދެމުން ގެންދާއިރު، ޣައްޒާގެ މެދުތެރެއިން ނުސައިރަތަށާއި، ދީރުލް ބަލާހަށްވެސް އެތައް ހަމަލާއެއް ދީފައި ވެއެވެ.

މި ހަމަލާތަކުގައި އެތައް ކުޑަކުދީންނާއި، އާންމުންވަނީ ޝަހީދުކޮށްލާފައެވެ. މިއަދުގެ މިހާތަނަށް ޣައްޒާއިން 9 މީހުން ޝަހީދުކޮށްލާފައި ވާއިރު، އެތައްބަޔަކު ޒަޚަމްވެފައި ވެއެވެ.

https://etukuri.mv/
https://eportal.mwsc.com.mv/e-pay