މޯލްޑިވިއަން މެދުވެރިކޮށް އޮސްޓްރޭލިއާއަށް ފަށާ ދަތުރުތަކާއެކު އެޤައުމުން 11،000 ފަތުރުވެރިން ގެނެވޭނެ: މޯލްޑިވިއަން

އޮސްޓްރޭލިއާއަށް ފަށާ ދަތުރުތަކާއެކު ރާއްޖެއަށް އަހަރެއްގެތެރޭ 11،000 ފަތުރުވެރިން އެޤައުމުން ގެނެވޭނެ ކަމަށް މޯލްޑިވިއަނުން ލަފާކޮށްފިއެވެ.

އޮސްޓްރޭލިއާއަށް ދަތުރު ފެށުމަށް ނިންމީ ވަރަށް ބޮޑަށް ދިރާސާ ކުރުމަށްފަހުގައި ކަމަށާއި، މި ދަތުރުތަކުގެ ސަބަބުން ރާއްޖެއަށް އެއްގޮތަށްވުރެ ގިނަ ގޮތްގޮތުން ފައިދާ ކުރާނެ ކަމަށާއި، މި ދަތުރުތައް ކުރަނީ، އޮސްޓްރޭލިއާގެ މެލްބަންއިން ރާއްޖެއަށް ކަމަށް މޯލްޑިވިއަންއިން ވަނީ ބުނެފައެވެ.

މޯލްޑިވިއަނުން ހަފުތާއަކު 1 ދަތުރު ކުރުމަށް ވަނީ ހަމަޖެހިފަވެއެވެ. އެގޮތުން ރާއްޖެއިން އޮސްޓްރޭލިއާއަށް ދަތުރުކުރާނީ، އާދިއްތަ ދުވަހުއެވެ. އަދި އޮސްޓްރޭލިއާއިން އެނބުރި ރާއްޖެއަށް އަންނާނީ، އަންގާރަ ދުވަހުއެވެ. މިއީ، 11 ގަޑިއިރުގެ ދިގު ދަތުރެކެވެ.

މޯލްޑިވިއަނުން އޮސްޓްރޭލިއާއަށް ފަށާ ސީދާ ދަތުރުތަކަށް ޑިމާންޑް ވަރަށް ބޮޑު ކަމަށާއި، އެގޮތުން ފްލައިޓްތައް މިހާރުވެސް %50 ފުލްވެފައިވާ ކަމަށް މޯލްޑިވިއަންއިން ވަނީ ބުނެފައެވެ.

މޯލްޑިވިއަނުން ފާހަގަކުރާ ގޮތުގައި މި ދަތުރުތަކާއިއެކު ދައުލަތުގެ ޓެކްސް އާމްދަނީވެސް އިތުރު ވެގެންދާނެ ކަމަށެވެ. އޮސްޓްރޭލިއާއިން ރާއްޖެއަށް ކުރާ ފުރަތަމަ ދަތުރުކުރުމަށް ހަމަޖެހިފައިވަނީ މިމަހުގެ 19 ވަނަ ދުވަހުއެވެ.