ގިނަ އަނބީން ހޯދާނީ ކިހިނެތް؟

ިވެހިރާއްޖޭގެ މާޙަލު އޮތްގޮތުން ފިރިހެނަކު އިތުރު ކައިވެންޏެއް ކުރުމަކީ އޭނާއަށް ނަފްސާނީ ގޮތުންނާއި ޖިސްމާނީ ގޮތުން ދަތިތަކާ ކުރުމަތިވާނެ ކަމެކެވެ. އެހެންކަމުން އެކަމަށް ހިތްއެދޭމީހާ ޙާއްޞަ އުކުޅުތަކެއް ގެންގުޅެގެންނޫނީ ދެވަނަ ނުވަތަ ތިންވަނަ ކައިވެނި ކުރެވޭނެ ފަސޭހަ މަގެއް ފެންނަން އޮންނާނެ ކަމަކަށް ނުބެލެވެއެވެ. މިގޮތުން ސަމާލުކަން ދޭންޖެހޭ ކަންކަން އެނގިތިބެ އެފަދަ ކަމަކާ ކުރިމަތިލުމަކީ ނުހަނު ބޭނުންތެރި ކަމެކެވެ.

ދީނީގޮތުން އަންހެނުން ހޭލުންތެރިކުރުވައިގެން ގިނައަނބިންނާއި އިނުމުގެ ފުރުސަތު ފަހިކުރެވިދާނެއެވެ. މިގޮތުން ގިނަ އަނބިންނާ އިނުމުގެ ފައިދާތަކާއި އެކަމުގެ ސަބަބުން އާއިލާއަށް ލިބޭނެ ފަސޭހަތައް ހިއްސާކުރެވިދާނެއެވެ. އަދި މާތްﷲ ޙަލާލްކުރައްވާފައިވާ ކަމެއް ހަރާމްކުރުމަކީ ބޮޑުވެގެންވާ ފާފައެއްކަމާއި އެއީ ޤިޔާމަތްދުވަހުން އެކަލާނގެ ޢަޒާބާ ކުރިމަތި ލާންޖެހޭނެ ކަމެއްކަން ހަނދާން ކޮށްދެވިދާނެއެވެ. ހިތައް ބިރުވެރިކަން ވައްދާ ތަޤުވާވެރިކަން އިތުރު ކުރުމަށް މަގުފަހި ކޮށްދެވިދާނެއެވެ.

ގިނަ އަނބިންނާއި ކައިވެނިކޮންގެން އުޅޭ ކާމިޔާބު މީޙުންގެ ވާހަކަތައް ކިޔައިދީ ދިރިއުޅުމަށް އަންނާނެ ހެޔޮބަދަލުތައް ހިއްސާކުރުމަކީ ގިނައަނބިންނާއި ކައިވެނިކުރުމަށް ފަހިކުރެވޭ ފުރުސަތަކަށް ނޫނީ ނުވާނެއެވެ. އަދި އެކުވެރިންގެ ތެރެއިން އިތުބާރުކުރެވޭ މީހުންނާ ދެއަތްބަށް އިނުމަށް ރުހޭތޯ ބެލިދާނެއެވެ. އޭރުން ހިތުގައި އޮންނަ ޝައްކުތައްފިލާ އިތުރު ކައިވެއްޏެއް ކުރަން ހުޅުވޭ ދޮރަކަށްވެސް ވެދާނެއެވެ.

ކައިވެންނަކީ މާތްﷲ އެކަލާނގެ ދީން މިބިންމަތީ ފެތުރިގެން ދިއުމަށް ލައްވާފައިވާ ރަޙްމަތެވެ. ކެރިކުޅަދާނަވެގެންވާ މީހާއަށް ކައިވެނި ކުރަން ފަށަން އެކަލާނގެ އެންގެވީވެސް ދެއަކުންނެވެ. މިއިންވެސް މާތްﷲގެ ޙަޞްރަތުގައި މިކަމުގެ މާތްކަމާއި އަހަންމިއްޔަތު ދޭހަކޮށްދެއެވެ. މާތްﷲ ހަލާލްކުރައްވާފައިވާ ކަމެއް ޙަރާމްކުރުމަކީ އެއްވެސް އިންސާނަކަށް ކުރެވޭނެ ކަމެއްނޫނެވެ. ތިމާ ނުރުހުނަސް އެކަމާ ގޮތްކިޔާ ފާޑު ކިއުމެއްނެތެވެ. އެހެނީ އެކަލާނގެ ހުއްދަކުރައްވާފައިވާ ކޮންމެ ކަމެއްވެސް އަދި ޙަރާމް ކުރައްވާފައިވާ ކޮށްމެ ކަމެއްގައިވެސް އަޅުތަކުންނަށް ހެވާލާބަ ލައްވާފައި ވާނޭކަން ކަށަވަރެވެ. ގިނަ އަނބީންނާއި ކައިވެނި ކުރުމަކީ މުޖުތަމައު ބަލައިނުގަންނަ ކަމަކަށްވިޔަސް އެކަމަށް އެއްވެސް މީހަކު ހުރަސް އެޅުމަކީ މާތްﷲގެ ހުކުމްފުޅަށް ގޮންޖެހުން ކަމުގައި ނޫނީ ނުވާނެއެވެ. އަނބީން ކިތަންމެ ނުރުހުނަސް ފިރިމީހާގެ ޙައްޤަށް އުނިކަން ލިބޭފަދަ އެއްވެސް ކަމެއް ކުރުމަކީ އެކަނބަލުންނަށް ހުއްދަވާނޭ ކަމެއްނޫނެވެ. އެންމެ ހެޔޮގޮތަކީ ދީން އުނގެނި ދަސްކޮށް މިފަދަ ކަންކަމާ ގުޅޭގޮތުން ފިރިންނަށް ލިބިދޭ ޙައްޤުތައް ލިބިދިނުމެވެ. މާތްﷲއަށްޓަކައި ކުރާހެޔޮކަމެއް އެކަލާނގެ ގެއްލެނި ނުކުރައްވާނެއެވެ. އެހެންކަމުން އަޅުތަކުންނަށް އޮތީ މިފަދަ ކަންކަމުގައި ކެތްތެރިކަން އިސްކޮށް މާތްﷲ އަންގަވާފައިވާ ގޮތުގެ މަތީން ޢަމަލުކުރުމެވެ. ކާމިޔާބައި ފަލާޙު ލިބޭނީ މިމަގުން އަމަލުތައް ބަހައްޓައިގެންކަން ކަށަވަރެވެ.

ހުވަފަތްވެފައި ތިބޭ އަންހެނުންނާއި އަޅާލުމާއި އެހީތެރިކަން ބޭނުންވެފައި ތިބޭ މީހުނާއި އިނުމުގެ ޝައުޤުވެރިކަން ފާޅުކުރެވިދާނެއެވެ. އަދި އެމީހުން ރުހޭނަމަ އެމީހުން މެދުވެރިކޮށް ހާލުގެ ވާހަކަ ކިޔައިދީ ހެދިދާނެއެވެ. އަދި އެއަށްފަހު ފިރިމީހާ އަނބިމީހާއަށް އޭނާ އެދޭއެދުން ހިއްސާކުރެވިދާނެއެވެ. މިކަމުގެ ސަބަބުން އަނބިމީހާގެ ހިތްމަޑުވެ ފިރިމީހާ އިތުރު ކައިވެންޏެއް ކުރުމަށް އިއުތިރާޒު ނުކުރާ ދަރަޖައަށް ދިޔުމަކީ އެކަށީގެންވާ ކަމެކެވެ.

އިތުރު ކައިވެންޏެއް ކުރަން ބޭނުންވާ މީހާގެ އަމިއްލަ އެކައުންޓަށް ހަމަސްދުވަސް ވަންދެން 10ނޫނީ 15 ހާސް ރުފިޔާ ޖަމާވޭތޯ، ރާއްޖޭގެ ބައެއް ކޯޓްތަކުން ބަލައެވެ. އަދި މިކަން ޔަޤީންކުރުމަށް ރުފިޔާ ޖަމާވި ކަމުގެ ބޭންކު ސްޓޭޓުމަންޓު ބޭނުންވާނެއެވެ. އެހެންނޫންނަމަ އިތުރު ކައިވެއްޏެއް ކުރުމަށް ދަތިތަކާކުރިމަތިވެއެވެ. ކުޑަ ހިތްވަރެއްލައިގެން ނަމަވެސް އިތުރު އާމްދަނީއެއް ހޯދާ ތަނަވަސްކަން އިތުރު ކުރެވިދާނެއެވެ. ނުވަތަ އަމިއްލަ އެކައުންޓަށް 10 ނޫނީ 15 ހާސް ޖަމާވާނެ އިތުރު ގޮތްތަކެއް ހޯދިދާނެއެވެ. އަހަރެއްހާ ދުވަހު މިގޮތަށް ހިފަހައްޓާލެވިއްޖެނަމަ ޤާނޫނީ އިޖުރާޢަތް ފުރިހަމަވެ އިތުރު ކައިވެއްޏެއްގެ ފޮނިމީރުކަން ލިބުމަކީ ދުރުގައިވާ ކަމެއްނޫނެވެ. ބޭނުންވަނީ ހިތްވަރާއެކު މަސައްކަތްކޮށްލުމެވެ.