ހުޅުމާލޭގައި ތަރައްގީކުރާ ބުޅާ ފެސިލިޓީ އަށް ޑޮކްޓަރުންނާއި ނަރުހުން ހޯދަން އިއުލާން ކޮށްފިއެވެ.
މާލެ ސިޓީ ކައުންސިލާއި މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއާ ގުޅިގެން ހުޅުމާލޭގެ ފޭސް 2 ގައި ހަދާ ކެޓް ޝެލްޓަރގެ މަސައްކަތް މިހާރު ވަނީ ނިމުމަކާ ގާތް ވެފައެވެ.
ސިޓީ ކައުންސިލުން އިއްޔެ އިއުލާން ކޮށްފައިވަނީ ކެޓް ޝެލްޓަރއަށް ޖަނަވާރުންގެ ޑޮކްޓަރަކާއި، ނަރުހެއް އަދި ކޯޑިނޭޓަރެއް ހޯދުމަށެވެ. އެ އިއުލާނުގައިވާ ގޮތުން ޑޮކްޓަރެއްގެ މުސާރައަކީ 35،000ރ އެވެ.
ޑޮކްޓަރުންގެ ޒިންމާތަކުގެ ތެރޭގައި ހުޅުމާލޭގައި ހުންނަ ޕެޓްކެއަރ ފެސިލިޓީއަށް ވެޓްރިނަރީ ޚިދުމަށް ހޯދުމަށް އަންނަ ފަރާތްތަކަށް ޚިދުމަތް ދިނުން، ޕެޓްކެއަރ ފެސިލިޓީއަށް ގެނެވޭ ބުޅާތަކުގެ މެޑިކަލް އެގްޒެމިނޭޝަން ހެދުމާއި، ޞިއްޙީ ޙާލަތު ބެލެހެއްޓުން އަދި ވެޓްރިނަރީ ޚިދުމަތް ބޭނުންވާ މާލޭގެ އަވަށްތަކަށް ޒިޔާރަތްކޮށް ޚިދުމަތް ދިނުމުގެ އިތުރަށް މާލެ ސިޓީއަށް އެތެރެކުރާ ދިރޭ ޖަނަވާރު އެތެރެ ކުރުން މެނޭޖު ކުރުމަށްޓަކައި ހަދަންޖެހޭ އިޖުރާތްތައް ފުރިހަމަ ކުރުންފަދަ މަސައްކަތްތައް ހިމެނެއެވެ.
ޖަނަވާރުންގެ ޑޮކްޓަރަކަށް ވުމުގެ ޝަރުތުތަކުގެ ތެރޭގައި ހިމެނެނީ މަޤާމުގެ މަސައްކަތާގުޅޭ ތަޢުލީމީ ރޮނގަގުން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 7 ނުވަތަ 8 ގެ ސަނަދެއް ހާސިލްކޮށްފައިވުމާއެކު މަޤާމުގެ ދާއިރާއެއްގައި މަދުވެގެން 6 އަހަރު ދުވަހުގެ ތަޖުރިބާ ލިބިފައިވުމެވެ.
މީގެ އިތުރަށް ނަރުހެއް ހޯދަން އިއުލާންކޮށްފައިވާއިރު، ނަރުހުންގެ މުސާރައަކީ 8،130ރ އެވެ. އަދި މަސައްކަތްކުރާ ކޮންމެ ދުވަހަކަށް ސަރވިސް އެލަވަންސްގެ ގޮތުގައި ކޮންމެ ދުވަހަކަށް 100ރ ލިބެ އެވެ.
ނަރުހުން ޝަރުތުތަކުގެ ތެރޭގައި ހިމެނެނީ ނަރސިންގެ ދާއިރާއިން ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 5 ނުވަތަ 6 ގެ ސަނަދެއް ހާސިލްކޮއްފައިވުން. އަދި ނަރސިންގ ދާއިރާއިން ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 4 ގެ ސަނަދެއް ހާސިލްކޮށްފައިވުމާއިއެކު، 2 އަހަރުގެ ތަޖުރިބާ ލިބިފައިވުމެވެ.
