އަންނަ ނޮވެމްބަރު މަހުގެ ކުރީކޮޅު ކެޓް ޝެލްޓަރ ހުޅުވަން މިހާރު ތައްޔާރުވެފައިވާ ކަމަށް މާލެ ސިޓީގެ ޑެޕިއުޓީ މޭޔަރު، އަހުމަދު ނަރީޝް ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ނަރީޝް ވިދާޅުވީ މާލެ ސަރަހައްދުގައި ބުޅާ ގިނަވެ، ބައެއް މީހުންނަށް އޭގެ ސަބަބުން އުނދަގޫވެ، މަގުމަތި ހަޑިވުމުގެ މައްސަލައަކީ އެކި ސަރުކާރުތަކުން ދައްކަމުން އައި ވާހަކައެއް ކަމަށެވެ. ނަމަވެސް އެކަމަށް ދާއިމީ ހައްލެއް ގެންނަން އަމަލީ މަސައްކަތް ފެށުނީ މާލޭ ސިޓީ މޭޔަރަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުންނަވާ ފެއްޓެވި މަސައްކަތުން ކަމަށެވެ.
ނަރީޝް ވދާޅުވީ ކައުންސިލްގައި ރައީސް މުއިއްޒު ހުންނަވާ އެ މައްސަލައަށް ޓޯޓަލް ސޮލިއުޝަން ހޯއްދަވަން ކުރެއްވި މަސައްކަތް ހުއްޓުނީ ކުރީ ސަރުކާރުން އެކަމަށް ދެންޖެހޭ ބިން ނުދިނުމުން ކަމަށެވެ.
އެމަނިކުފާނު ރައީސް ކަމަށް އިންތިހާބު ވުމާއި އެކު ފުރަތަމަ އަހަރު ތެރޭ މިނިސްޓްރީ އޮފް އެގްރިކަލްޗަރ އެން އެނިމަލް ވެލްފެއާރ އާއި ހަވާލުކޮށްގެން މަލޭ ސިޓީ ކައުންސިލްގެ އެހީތެރިކަމާއި އެކު ސަރުކާރުން ހުޅުމާލެ އިން ފަހިކޮށްދިން ބިމުގައި މިހާރު ކެޓް ޝެލްޓަރ އެއް އަޅާ ނިމިފައިވާ ކަމަށް ފާހަގަކުރައްވާ ނަރީޝް ވިދާޅުވީ އަންނަ މަހުގެ ކުރީކޮޅު އެތަން ހުޅުވަން މިހާރު ތައްޔާރުވެފައިވާ ކަމަށެވެ.
މިއީ ސީދާ ރައީސް މުއިއްޒުގެ އިރުޝާދުގެ ދަށުން މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ އިން ކުރިޔަށް ގެންދިޔަ ސަރުކާރުގެ ޕްރޮޖެކްޓެއް ކަމަށް ވެސް ނަރީޝް ވިދާޅުވިއެވެ. ނަރީޝް ވިދާޅުވީ ކެޓް ޝެލްޓަރ ބިނާކުރުމުގެ މަސައްކަތް ސަރުކާރުން އެދުނު ގޮތަށް ކޮށްދިނީ ސިޓީ ކައުންސިލުން ކަމަށެވެ. އަދި މާލޭ ގެ ރައްޔިތުންގެ މިބޮޑު ކަންބޮޑުވުމަށް ގެނެސްދެއްވި އަވަސް ހައްލަށް ރައީސް މުއިއްޒަށް ޝުކުރު ދަންނަވާ ކަމަށެވެ.
