ފުވައްމުލައް ސިޓީގައި ވަާލުގެ އުނދަގޫ ބޮޑުވެ، ވައު މަދުކުރުމުގެ ޕްރޮގްރާމެއް އެމްއެންޑީއެފްގެ އެހީތެރިކަމާއެކު ސިޓީ ކައުންސިލުން ފަށައިފިއެވެ.
އެމްއެންޑީއެފުން ބުނީ ސަދަން އޭރިއާ ކޮމާންޑުން އޮޕަރޭޝަނެއް ފެށީ ފުވައްމުލައް ސިޓީގައި ވައު ގިނަވެ އާންމު ފަރުދުންނަށް އުނދަގޫތަކާ ކުރިމަތިލާން ޖެހިފައިވުމާއެކު ކަމަށާއި މި އޮޕަރޭޝަން ފެށީ ސެޕްޓެންބަރު 28 ވަނަ ދުވަހު ކަމަށެވެ.
މިޕްރޮގްރާމުގައި، ކޮންމެ ދުވަހަކުވެސް އެ ސިޓީގެ އެކި ސަރަހައްދުތަކުގައި ބަޑި ޖަހައިގެން ވައު މަދުކުރުން ކުރިއަށް ގެންދިއުމަށް ހަމަޖެހިފައިވާ ކަމަށް ބުނެފައި ވެއެވެ.
މި ޕްރޮގްރާމުގައި ހަރަކާތްތެރިވަނީ އެމްއެންޑީއެފް ސަދަން އޭރިއާ ކޮމާންޑް، ފުވައްމުލަކު ޕޯސްޓުގައި މަސައްކަތްކުރާ ސިފައިންނެވެ.
ފުވައްމުލައް ސިޓީގައި ވައު ގިނަވެ އޭގެ ސަބަބުން ދަނޑުބިންތަކަށާއި ގަސްތަކަށް ގެއްލުންވުމުގެ އިތުރުން ރަށުގެ އެކި ހިސާބުތަކުގައި ދިރިއުޅެމުންދާ ރައްޔިތުންނަށް ވެސް އެކި ވަރުގެ އުނދަގޫތަކާ ކުރިމަތިވާކަމުގެ ޝަކުވާތައް ލިބެމުން އަންނަ ކަމަށް ސިޓީ ކައުންސިލުން ވަނީ ބުނެފައެވެ. އެގޮތުން، އެ ރަށުގެ އަނބުގަސްތަކުގައި އަޅާ އަނބުތައް ކާ މައްސަލަ ވެސް ބޮޑެވެ. ފުވައްމުލަކަކީ އަނބު ހެއްދުމުގައި މަޝްހޫރު ރަށެކެވެ.
ފުވައްމުލައް ސީޓިއަކީ، ދަނޑުވެރިކަން ކުރާ ސިޓީއަކަށްވުމުން ވައު ގިނަވުމުގެ ސަބަބުން އޭގެ އެންމެ ބޮޑު އުނދަގޫ ފޯރާނީ ދަނޑުވެރިންނަށެވެ.
ކައުންސިލުން ބުނެފައިވާ ގޮތުގައި ފުވައްމުލަކުގެ އެކި ސަރަހައްދުތަކުގެ ދަނޑުވެރިންނާއި ގޭގޭގައި ހުންނަ ގަސްތަކަށް ވާލުގެ އުނދަގޫ ވަރަށް ބޮޑެވެ.
ބަޑިޖަހައިގެން ވައު މެރުމަކީ ސިފައިން މީގެކުރިންވެސް ކޮށް އުޅޭ ކަމެކެވެ. މިފަދަ އޮޕަރޭޝަންތައް ރާއްޖޭގެ ބައެއް ރަށްރަށުގައި މީގެ ކުރިންވެސް ކުރިއަށް ގެންދެއެވެ.
