އައްޑޫ ސިޓީގެ އިހުތިސާސުން ސަވާހެލި ވަކިކޮށްފި

ފަތުރުވެރިކަން ކުރިއެރުވުމުގެ މަގުސަދުގައި، އައްޑޫ ސިޓީގެ އިދާރީ އިހްތިސާސްގެ ތެރޭގައި ހިމެނޭ "ސަވާހެލި" އެ ސިޓީގެ އިހްތިސާސުން ވަކިކުރެއްވުމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ނިންމަވައިފިއެވެ.

ރައީސުލްޖުމްހޫރިއްޔާގެ މި ނިންމެވުމަކީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން، ރަށްރަށާއި ސިޓީތަކުގެ އިހްތިސާސް ކަނޑައެޅުމަށް އެމަނިކުފާނަށް ލިބިވަޑައިގަންނަވާ އިހްތިޔާރުގެ ދަށުން ނިންމެވި ނިންމެވުމެކެވެ.

މިކަމާ ގުޅޭ ރަސްމީ ގަރާރު މިހާރު ވަނީ ސަރުކާރުގެ ގެޒެޓުގައި ޝާއިޢުކުރައްވާފައެވެ.

މި އިސްލާހާއެކު އައްޑޫ ސިޓީގެ އިދާރީ ދާއިރާއަށް އައި ބަދަލުތައް ހިމެނޭ ޗާޓު، ގަރާރުގެ ޖަދުވަލުގައި ވަނީ ތަފްސީލުކޮށްދެއްވާފައެވެ.