މި ވާހަކަ ދެއްކޭނެ ޖާގައެއް ނެތް!

2021 ވަނަ އަހަރެވެ. ސިވިލް ސާވިސްގެ ގާނޫނަށް ސަރުކާރުން ގެނައި އެ އިސްލާހަށް އާއްމުންގެ ފާޑުކިޔުން އަމާޒުވެ، ރައްޔިތުންގެ މަޖިލީސްވެސް ހޫނުފެނަށް ވެއްޓުނެވެ. ވީ ކިހިނެއްތޯ ބަލާލިއިރު، ސިވިލް ސާވިސްގެ ރައީސް އަދި ނައިބު ރައީސް އައްޔަނުކުރުމުގެ ބާރު ސީދާ ރައިސުލްޖުމްހޫރިއްޔާއަށް ދެވުނީ އެވެ.

އެ އިސްލާހާއެކު އައި ފާޑުކިޔުންތަކަށް އޭރު އެ ގާނޫނު އިސްލާހުކުރި ސުޕަމެޖޯރިޓީ އެމްޑީޕީގެ މެމްބަރުން ރައްދުދީ އެ މެމްބަރުންގެ ސަރުކާރުގެ ދިފާއުގައި ވާހަކަދައްކަވަމުން ދިޔަ އެވެ. އެއީ ރައީސްގެ ބާރުގެ ދަށުގައި އޮންނަން ޖެހޭ ކަމެއް ކަމަށާއި، ދައުލަތުގެ މުވައްޒަފުންގެ ކަންކަން ބަލަހައްޓަވާ ވެރިޔަކަށް ރައީސްގެ އިތުބާރު އޮތުން މުހިއްމު ކަމަށް އޭރު ހަރުއަޑުން ގޮވަމުން ދިޔައެވެ. އެއީ ކޮންމެހެން ކުރަންޖެހޭ ކަަމެއް ކަމަށާއި، އެކަން ނުކޮށްފިނަމަ ވެދާނެ ގޮތުގެ ވާހަކަތަކާއި، އެކަމުގެމުހިއްމު ކަމުގެ ވާހަކަ ކަރުން ލޭރަހަލާވަރަށް ބާރަށް ގޮވަމުން ދިޔައެވެ.

އެ ދުވަސް މާޒީއަށް ގޮސް، އާ ސަރުކާރެއްވެސް އައިސްފިއެވެ. މިއަދު މި އޮތީ އޭރު މަޖިލީހުގެ މެޖޯރިޓީ އޮވެ، ކުރިން މި ބުނި ޤާނޫނު އިސްލާހު ކުރި ޕާޓީއެއް ނޫނެވެ. އާ ސަރުކާރަށްފަހު، އިންތިޚާބުވެެގެން އައި އާ ރައްޔިތުންގެ މަޖިލީހުން މި ވަނީ މުހިއްމު ގާނޫނުތަކަށް އިސްލާހު ގެނައުމުގެ މަސައްކަތް ފަށާފަ އެވެ. އެގޮތުން އޭރު ސިވިލް ސާވިސް ގާނޫނަށް އެ ގެނައި އިސްލާހާ އެއްގޮތަށް، އެހެން މުއައްސަސާތަކުގެ ކަންކަން ވެސް އެއްގޮތް ކުރުމުގެ ވިސްނުމުގައި، މި ސަރުކާރުން އިސްލާހު ހުށަހެޅީ އެންޓި ކޮރަޕްޝަން ކޮމިޝަންގެ ގާނޫނަށާއި އިލެކްޝަންސް ކޮމިޝަންގެ ގާނޫނަށެވެ.

އެ ބިލުތަކުގައި ވާގޮތުން ކޮމިޝަންތަކުގެ ރައީސުންނާއި ނައިބުން އައްޔަނުކުރުމުގެ ބާރު ދެން ލިބޭނީ ރައީސުލްޖުމްހޫރިއްޔާއަށެވެ. އޭރު ވެސް ހުށަހެޅީ މި އިސްލާހެވެ. ހަމައެކަނި ތަފާތީ އިސްލާހު ހުށަހެޅި ގާނޫނެވެ.

އޭރު ސަރުކާރުގައި އޮވެ، ސިވިލް ސާވިސްގެ ގާނޫނު އިސްލާހުކުރިއިރު ދެއްކެވި ބަހަނާތަކާއި ދިފާއުތައް އިދިކޮޅުގައި މިހާރު ތިއްބެވި އެމްޑީޕީގެ މެމްބަރުންގެ ހަދާނަކު ނެތެވެ. ހަދާންނެތިގެން މި ދިޔައީވެސް ހާދަހާވާ އަވަހަށޭ، ހިތަށް އަރަމުން ދިޔައީ އެ މެމްބަރުން މިއަދު ދައްކަވަމުން އެ ގެންދަވާ ވާހަކަތަށް އަޑުއިވި ފެނުނީމައެވެ.

ކުއްލިއަކަށް ސަރުކާރުން މިނިވަން މުއައްސަސާތަކަށް އަތްގަދަ ކުރަނީ އެވެ. ބާރުތައް މަސްހުނި ކުރަނީ އެވެ. މިނިވަން މުސްތަގިއްލު މުއައްސަސާތަކުގެ ނަޒާހާތްތެރިކަން ނަގާލަނީ އެވެ. މިހެން ގޮސް، ނުދައްކާކަށް ވާހަކައެއް ނެތެވެ. އޭސީސީގެ ގާނޫނަށް ހުށަހަޅާފައިވާ އިސްލާހަށް މިއަދުގެ ރައްޔިތުންގެ މަޖިލީހުގެ ޖަލްސާގައި އިދިކޮޅު އެމްޑީޕީގެ މެމްބަރުން ދެއްކެވި ވާހަކަތަކަކީ މިއެވެ.

"ރައްޔިތުންގެ ބާރުތައް މަޑުމަޑުން ފެށިގެން މި އަންނަނީ ރައްޔިތުން އަތުން ބީވެގެންދާތަން މި ފެންނަނީ. އޭގެ ތެރެއިން އަނެއްކާ ވެސް މިއަދަކީ އެއިން ދުވަހެއް" އެމްޑީޕީގެ ޕީޖީ ލީޑަރު އިބްރާހީމް ނާޒިލް ވިދާޅުވި އެވެ.

19 ވަނަ މަޖިލީހުގައި ވެސް އިންނެވި ނާޒިލް މިއަދު ވިދާޅުވަނީ އޭސީސީގެ ބާރުތައް އަނެއްކާވެސް ވަކި ބޭފުޅެއްގެ އަތް މައްޗަށް ދަމައިގަންނަނީ" ކަމަށެވެ.

މެމްބަރު ނާޒިލް އެ ވިދާޅުވާ ގޮތަށް މިއަދު ކަންތައްތައް ހިނގާނަމަ، އޭގެ މާނައަކީ އެމްޑީޕީގެ ވެރިކަމުގައި 27،000 އަށް ވުރެ ގިނަ މުވައްޒަފުންގެ ބަލަދުއަރާ ސިވިލް ސާވިސް ކޮމިޝަންގެ ބާރުތައް އޮތީ އޭރުގެ ރައީސްގެ އަތްމަތީގައި ތޯއެވެ؟ މިއީ މިއަދު އެމޭރުމުން ވާހަކަދައްކަވާ މެމްބަރުންގެ ކިބައިން ރައްޔިތުން ޖަވާބު ހޯދަން ބޭނުންވާ ސުވާލެކެއެވެ.

މި އިސްލާހު ހުށަހަޅަން ޖެހުނު ސަބަބުތައް މިއަދުގެ ޖަލްސާގައި މަޖިލީހުގެ ނައިބު ރައީސް އަހުމަދު ނާޒިމް ތަފްސީލުކޮށްދެއްވި އެވެ.

އެންޓި ކޮރަޕްޝަން ކޮމިޝަންގެ ގާނޫނަށް ހުށަހަޅާފައިވާ އިސްލާހަށް އިޝާރާތް ކުރައްވައި މެމްބަރު ވިދާޅުވީ، އިދިކޮޅަށް އެކަމުގައި ފާޑުކިޔޭނެ ޖާގަ ނެތީ، ނިމިދިޔަ ވެރިކަމުގައި ސިވިލް ސާވިސް ކޮމިޝަންގެ ރައީސް އައްޔަނުކުރާ އިޖުރާއަތަށް ވެސް އެބަދަލު ގެނެސްފައިވާތީ ކަމަށެވެ. މިހެން ވިދާޅުވެ، ނިމިދިޔަ ފަސް އަހަރު ތެރޭގައި މިނިވަން މުއައްސަސާތަކާ މެދު ކަންތައްތައް ކުރެވިގެންދިޔަ ގޮތް ވެސް ނާޒިމް ފާހަގަކުރެއްވި އެވެ.

ނާޒިމް ގަބޫލުކުރައްވާ ގޮތުގައި މިހާރު ހުށަހަޅާފައިވާ އިސްލާހަކީ ކޮމިޝަންތަކުގެ ތެރޭގައި އުފެދޭ މައްސަލަތަކުގައި މެމްބަރުން އެކަހެރި ކުރާ މައްސަލަތައް ފެންމަތިވުން ހުއްޓުވުމަށް ވެސް މުހިއްމު ކަމެކެވެ.

އޭނާ އިޝާރާތް ކުރެއްވީ ނިމިދިޔަ ސަރުކާރުގައި އިލެކްޝަންސް ކޮމިޝަނުގެ ތެރޭގައި ޖެހުނު މައްސަލަތަކެއްގައި އެ ކޮމިޝަންގެ ރައީސް ފުއާދުއާ ދެކޮޅަށް އިތުބާރު ނެތްކަމުގެ މައްސަލައެއް ނަގާ މަގާމުން ވަކިކުރަން އުޅުނު މައްސަލައެވެ.

ދެ ސަރުކާރުން ވެސް ހަގީގަތުގައި މި ހުށަހެޅީ އެއް ކަހަލަ އިސްލާހެކެވެ. އޭރު ސިވިލް ސާވިސްގެ ގާނޫނަށް އެ އިސްލާހު ގެނައުމަށް އޭރު އެމްޑީޕީ މެމްބަރުން ތާއީދުކޮށް އެއީ ރައްޔިތުންގެ ހެވާ ލާބައަށް ކުރި ކަމެއް ކަމަށް ބުނި ނަމަވެސް، މި ސަރުކާރުން އެފަދަ އިސްލާހެއް ގެނައުމުން، އެ މެމްބަރުންގެ އާރާއި ބާރުނެތް ސަރުކާރެއް ވީމައި އެވީ ގޯހަށެވެ. އެމްޑީޕީ މެމްބަރުންގެ ވާހަކަތައް ހުރި ގޮތުން މިއަދު އެނގިގެން މި ދަނީ އެއީ އެއްވެސް އިރަކު ރައްޔިތުންނަށް ހެޔޮ އެދިގެން އުޅުނު ބައެއް ނޫން ކަމެވެ. ރަނގަޅު ކަމެއް ވިޔަސް، ކުރާ މީހާގެ ގޮތުން އެކަން ވެސް މުޅިން ގޯސްވެސް ވަނީ އެވެ.