އަންނަ އަހަރަށް ލަފާކުރާ ދައުލަތުގެ ބަޖެޓު ހުށަހަޅަން މިއަދު ހެނދުނަށް ތާވަލުކުރި ރައްޔިތުންގެ މަޖިލީހުގެ ޖަލްސާ މެންދުރުފަހު އެކެއް ޖަހާއިރަށް ފަސްކޮށްފި އެވެ.
ދައުލަތުގެ ބަޖެޓު ހުށަހެޅުމަށްޓަކައި މިއަދު ބާއްވާ ޖަލްސާ އެންމެ ފުރަތަމަ ތާވަލުކުރީ މިއަދު ހެނދުނު 09:00 ގަ އެވެ. އެކަމަކު، މަޖިލީހުގެ އިދާރާއިން ވަނީ މިއަދު އެ ޖަލްސާ ބާއްވާ ގަނޑި މެންދުރުފަސް 1 އަށް ފަސްކޮށްފަ އެވެ. އެހެން ނަމަވެސް ޖަލްސާ ފަސްކުރި ސަބަބެއް ހާމައެއް ނުކުރެ އެވެ.
މިއަދުގެ ޖަލްސާއަށް ބަޖެޓު ހުށަހެޅުމުގެ އިތުރުން، 4 ވޯޓެއް ނެގުމަށް ވެސް އެޖެންޑާގައި ހިމަނާފައިވެ އެވެ. އެއީ:
- ދިވެހިރާއްޖޭގެ އެކްސްޕޯޓް އިމްޕޯޓުގެ ގާނޫނަށް އިސްލާހުގެ ގެނައުމުގެ ބިލު
- މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލް
- ޓޫރިޒަމާ ބެހޭ ގާނޫނު އިސްލާހުކުރުމުގެ ބިލު
- ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސް އާއި ފީ ނެގުމާ ބެހޭ ގާނޫނު އިސްލާހުކުރުމުގެ ބިލު
ގާނޫނުއަސާސީގެ 96 ވަނަ މާއްދާފެ (ހ) ގައި ބަޔާންކޮށްފައިވާ ގޮތުގެ މަތިން އެންމެ ލަސްވެގެން ކޮންމެ އަހަރެއްގެ ނޮވެމްބަރު މަހުގެ 1 ވަނަ ދުވަހުގެ ކުރިން އެ އަހަރެއްގެ ދައުލަތުގެ ބަޖެޓު ރައްޔިތުންގެ މަޖިލީހުގެ ޖަލްސާއަށް ފިނޭންސް މިނިސްޓަރު ހުށަހަޅުއްވަންވާނެ އެވެ.
