ފިނޭންސް މިނިސްޓްރީން ތައްޔާރުކޮށް ހުށަހަޅާ ބަޖެޓު އެކުލަވާލުމާއި ތަންފީޒުކުރުމުގެ މަރުހަލާތަކަށް އިސްލާހީ ބަދަލުތައް ގެނައުމަށް ގިނަގުނަ މަސައްކަތްތަކެއް ފެށިފައިވާ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓު ހުށަހަޅުއްވަމުން މިނިސްޓަރު ވިދާޅުވީ ބަޖެޓު ބައިކޮށް ފާސްކުރާ ގޮތާ، ބަޖެޓު ތަންފީޒުކުރާއިރު ބަޖެޓުގެ އެއްބައިން އަނެއް ބަޔަށް ބަދަލުގެނައުމުގެ އުސޫލުތައް ކަނޑައަޅައި، އަންނަ އަހަރު ޤާނޫނީ އޮނިގަނޑަށް ބަދަލު ގެނައުމަށް ނިންމާފައިވާ ކަމަށެވެ. އަދި ދައުލަތުގެ ޕްރޮކިއުމަންޓު ނިޒާމު ހަރުދަނާކޮށް، މިނިޒާމުގެ ތެރޭގައި ހުރި ނާޖާއިޒު އަދި ނުހައްގު މަންފާތައް ހޯދުމަށް ހުރި ފުރުސަތުތައް ހަނިކޮށް، މުޅި ނިޒާމުގެ ތެރެއިން ހިނގާ އިސްރާފުތައް ކުޑަކުރަން ޤާނޫނަށް ގެންނަންޖޭހޭ ބަދަލުތައް ވެސް ގެނައުމަށް ނިންމާފައިވާނެ ކަމަށް މިނިސްޓަރު ޒަމީރު ވިދާޅުވިއެވެ.
އަންނަ އަހަރަށް ލަފާކޮށް ހުށަހަޅާފައިވަނީ 56,647,600,859 (ފަންސާސް ހަ ބިލިއަން، ހަސަތޭކަ ސާޅީސް ހަތް މިލިއަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ. އަންނަ އަހަރަށް ލަފާކޮށް ހުށަހެޅި ބަޖެޓުގައި ހިލޭ އެހީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ލަފާކޮށްފައިވެ އެވެ. ހަރަދަށް 49.2 ބިލިއަން ރުފިޔާ ކަނޑައަޅާފައިވާއިރު ހިންގުމުގެ ހަރަދަށް 35.9 ބިލިއަން ރުފިޔާ ކަނޑައަޅާފައިވެ އެވެ. ކެޕިޓަލް ހަރަދުގެ ގޮތުގައި 13.3 ބިލިއަން ރުފިޔާ ހިނގާނެ ކަމަށް ލަފާކޮށްފައިވެ އެވެ.
މި ޚަރަދުތަކުގެ އިތުރުން، ބަޖެޓުގައި މައިގަނޑު ގޮތެއްގައި ހިމެނެނީ ދައުލަތުގެ ދަރަނި އަދާކުރުމަށް ބޭނުންވާ 3.9 ބިލިއަން ރުފިޔާއާއި، ސަރުކާރު ކުންފުނިތަކަށް ކެޕިޓަލް ދޫކުރުމާއި އެހެނިހެން އިންވެސްޓްމަންޓްތައް ކުރުމަށް ހިނގާނެ 378 މިލިއަން ރުފިޔާއާއި، ސަރުކާރުން ލޯނު ދޫކުރުމަށް ކަނޑައަޅާފައިވާ 3.2 ބިލިއަން ރުފިޔާ އެވެ. މީގެ ތެރޭގައި 5 އިންސައްތަ އިންޓްރެސްޓުގައި ގެދޮރުވެރިކަމުގެ ލޯނު ދޫކުރުމަށް 1 ބިލިއަން ރުފިޔާ ވެސް ހިމެނެ އެވެ.
މިއީ ފަހުގެ ތާރީހެއްގައި އެންމެ ޑެފިސިޓް ކުޑަ ބަޖެޓުވެސް މެ އެވެ. އެގޮތުން މި ބަޖެޓު ޑެފިސިޓްވާނެ ކަމަށް ސަރުކާރުން ލަފާކުރަނީ 9.4 ބިލިއަން ރުފިޔާއިން ނެވެ. މި ހިނގާ 2024 ވަނަ އަހަރުގެ ބަޖެޓު ވެސް 13.7 ބިލިއަނުން ޑެފިސިޓް ވެ އެވެ.
