ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަސައްވުރުކުރައްވަނީ މިހާރު ވަޒީރުންގެ މަޖިލީހުން ފާސްކުރައްވާފައިވާ އިކޮނޮމިކް ރިފޯމް އެޖެންޑާ ތަންފީޒުކުރުމުގެތެރެއިން، ދިވެހިރާއްޖޭގެ ޖީޑީޕީ 2028 ވަނަ އަހަރު 10 ބިލިއަން ޑޮލަރާ ހަމައަށް ގެންދިއުން ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
މިއަދު މި ހުށަހަޅާ 2025 ވަނަ އަހަރަށް ލަފާކުރާ ދައުލަތުގެ ބަޖެޓުގައި، ދައުލަތުގެ މާލިއްޔާއަށް ދިމާވެފައިވާ މުހިންމު ފިސްކަލް މައްސަލަތައް ހައްލުކުރުމަށް ގިނަގުނަ ފިޔަވަޅުތަކެއް އެޅުމަށް ހިމަނާފައިވާނެ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓު ހުށަހަޅަން މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މިނިސްޓަރު ވިދާޅުވީ މިއަދު ހުރިހާ ކަމެއް އަލުންބަލުން ފަށަން ޖެހިފައިވާ ކަމަށެވެ. އެގޮތުން އިގުތިސާދީ ގޮތުން ބެލިކަމުގައި ވިޔަސް އަދި އިޖުތިމާއީ ގޮތުން ބެލިކަމުގައި ވިޔަސް، އަދި މީގެއިތުރުން އަންހެނުންނާއި ޒުވާނުންނާއި އެންމެހައި ރައްޔިތުންގެ ހާލަތަށް ފަރުދީ ނަޒަރަކުން ބެލިކަމުގައި ވިޔަސް، ފެންނާން އޮތީ ހަމަ މި ހަގީގަތް ކަމަށް މިނިސްޓަރު ވިދާޅުވިއެވެ.
މިނިސްޓަރު ޒަމީރު ވިދާޅުވީ މިހާރު އުފައްދާފައިވާ އެތައް ނިޒާމީ މައްސަލަތަކަށް އެދެވޭ ހައްލުތަކެއް ހޯދައިގެން ނޫން ގޮތަކަށް މިގައުމު މިއެދޭ މިނިވަން، އިންސާފުވެރި، ތިޔާގި އަދި ރައްކާތެރި ދިވެހީންގެރާއްޖެއާ ހަމައަށް ވާސިލުވެވޭކަށް ނެތް ކަމަށެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަސައްވުރުކުރައްވަނީ މި ދަންނަވާލި ކަންކަން ހައްލުކުރުމަށް މިހާރު ވަޒީރުންގެ މަޖިލީހުން ފާސްކުރައްވާފައިވާ އިކޮނޮމިކް ރިފޯމް އެޖެންޑާ ތަންފީޒުކުރުމުގެތެރެއިން، ދިވެހިރާއްޖޭގެ ޖީޑީޕީ 2028 ވަނަ އަހަރު 10 ބިލިއަން ޑޮލަރާ ހަމައަށް ގެންދިއުން. އިގުތިސާދީ ހަރަކާތް މިހާރު އެތުރިފައިވާ ގޮތް އަލުން ރުކުރުވައިލައި، ރާއްޖޭގެ އުތުރާއި ދެކުނަކީ މި ރިޔާސީ ދައުރު ނިމޭއިރު އިގުތިސާދީ މައި މަރުކަޒުތައް ކަމުގައި ހެދުމަކީ ސަރުކާރުގެ އަމާޒެއް. - ފިނޭންސް މިނިސްޓަރު މޫސާ ޒަމީރު
މީގެއިތުރުން، ރާއްޖޭގެ އެކި ކަންކޮޅުތަކުގައި އަރބަން ސެންޓަރުތައް ގާއިމުކޮށް، ސަރަހައްދީ ތަރައްގީއަށް މަގުފަހިކުރުމަކީވެސް މި އެޖެންޑާގައި ތަސައްވުރުކޮށްފައިވާ ކަމެއް ކަން ފާހަގަކުރައްވާ މިނިސްޓަރު ވިދާޅުވީ ދިވެހިރާއްޖެއަކީ ތާއަބަދަށް ތެޔޮ އިމްޕޯޓުކޮށްގެން ރައްޔިތުންނަށް ބޭނުންވާ ކަރަންޓާއި އެހެނިހެން އަސާސީ ހިދުމަތްތައް ފޯރުކޮށްދޭ ގައުމެއްގެ ގޮތުގައި އޮންނަ އޮތުން ނިމުމަކަށް ގެނެސް، އިއާދަކުރަނިވި ހަކަތައާއި ދިމާއަށް ދިވެހިރާއްޖޭގެ ހަކަތައިގެ ވިއުގަ އަނބުރައިލުމަކީ ހާސިލުކުރަންޖެހޭ މުހިންމު ލަނޑުދަނޑިއެއް ކަމަށެވެ.
މިނިސްޓަރު ވިދާޅުވީ އަންހެނުންނާއި ޒުވާނުންނަށް ވަކިން ހާއްސަކަމެއް ދީގެން ތައުލީމާއި ވިޔަފާރީގެ އިތުރު ފުރުސަތުތައް ހުޅުވައިލުމުގެ ތެރެއިން ދިވެހީންނަކީ ފަންނުވެރި ބަޔަކަށް ހަދައި، ދިވެހީންގެ އުފެއްދުންތަކާއި ހިދުމަތްތައް ދުނިޔޭގެ ބާޒާރަށް ނެރުމަކީ ވެސް އަމާޒެއް ކަމަށެވެ. އަދި ރައީސުލްޖުމްހޫރިއްޔާ ތަސައްވުރުކުރައްވާ އިގުތިސާދީ ކުރިއެރުމަކީ އެންމެހައި ރައްޔިތުންނަށް އޭގެ މަންފާ ހަމަހަމަކަމާއެކު ލިބޭނެފަދަ ކުރިއެރުމަކަށް ހެދުމަށް ދިވެހީން ގެދޮރުވެރިވުން ކޮންމެހެން މުހިންމު ކަމަށް މިނިސްޓަރު ޒަމީރު ވިދާޅުވިއެވެ.
ފާއިތުވި ސަރުކާރުތަކުން ދިވެހީން ގެދޮރުވެރިކުރުވުމަށް މަސައްކަތްތަކެއް ކޮށްފައިވީނަމަވެސް، އަދާއި ހަމައަށް މި މައްސަލައަށްވަނީ އެދެވޭ ހައްލެއް ނުލިބޭކަން ފާހަގަކުރައްވަމުން މިނިސްޓަރު ވިދާޅުވީ މި ބަޖެޓަކީ، ދިވެހި ރައްޔިތުން ގެދޮރުވެރިކުރުވާނެ ބަޖެޓެއް ކަމަށެވެ. ރައީސްގެ މި ތަސައްވުރު ހާސިލުކުރުމަށް އޮތް އެންމެ ބޮޑު ގޮންޖެހުމަކީ ހީނަރުވެފައިވާ ފިސްކަލް ހާލަތް ކަމަށް ވެސް މިނިސްޓަރު ވިދާޅުވިއެވެ.
އަދިި ސަރުކާރުގެ ޚަރަދު ކުޑަކުރަން ފިޔަވަޅު އެޅުން އަހަރުތަކެއް ވަންދެން ފަސްކޮށް، ބޮޑެތި އަދަދުތަކުން ޑެފިސިޓް ބަޖެޓުތައް ތަންފީޒުކުރަމުން ގޮސްފައިވުމުގެ ނަތީޖާއަކީ، ދައުލަތުގެ ދަރަނި އިތުރުވެ، ދައުލަތުގެ އާމްދަނީއާ ބައްދަލު މިންވަރަކަށް ޚަރަދުތައް ކުޑަކުރުމަށް އެކީ އެއްފަހަރާ ގިނަ ނިޒާމީ ބަދަލުތަކެއް ގެންނަން މަޖުބޫރުވުން ކަމަށެވެ. 2025 ވަނަ އަހަރަށް ލަފާކުރާ ދައުލަތުގެ ބަޖެޓުގައި، ދައުލަތުގެ މާލިއްޔާއަށް ދިމާވެފައިވާ މުހިންމު ފިސްކަލް މައްސަލަތައް ހައްލުކުރުމަށް ގިނަގުނަ ފިޔަވަޅުތަކެއް އެޅުމަށް ހިމަނާފައިވާނެ ކަމަށް ވެސް މިނިސްޓަރު ވިދާޅުވިއެވެ.
