މޯލްޑިވްސް ކަރެކްޝަނަލް ސަރވިސް (އެމްއެސީއެސް) ގެ ހުޅުމާލެ ޖަލުގައި އާއިލާ ބައްދަލު ކުރާތަން ތަރައްގީ ކުރުމަށް ފަހު ރަސްމީކޮށް ހުޅުވައިފިއެވެ.
ހޯމަދުވަހު ބޭއްވުނު ރަސްމިއްޔާތުގައި ރަސްމީކޮށް އެ ގެ ހުޅުވާދެއްވީ ކެލާ ދާއިރާގެ މެމްބަރު އަބްދުﷲ ޝަރީފެވެ.
މީގެ ކުރިން ހުޅުމާލެ ޖަލުގައި ޢާއިލާއާއި ބައްދުލުކުރުމަށް ކަނޑައަޅާފައިވާ ތަނަކީ ފަހަރަކު އެއް ޢާއިލާއަށް ބައްދަލުވުން ފޯރުކޮށްދެވޭހާ ޖާގައިގެ ގޮތުން ކުޑަ ތަނަކަށްވީ ނަމަވެސް މި ގެއަކީ ޖާގައިގެ ގޮތުން ތަނަވަސް ތަނެކެވެ.
ފަހަރަކު 3 މީހަކަށް އެ މީހެއްގެ އާއިލާއާއި ބައްދަލުކުރުމުގެ ފުރުސަތު ލިބިގެންދާނެ ތަނެއް ކަމަށް ކަރެކްޝަންސް އިން މައުލޫމާތު ދީފައިވެއެވެ. އަދި އޭސީކޮށްފައިވާކަމަށް ވެސް ކަރެކްޝަންސް އިން ވިދާޅުވެފައިވެއެވެ.
ކަރެކްޝަންސްއިން ބުނީ މި ގޭގައި، ބައްދަލުވުމަށް އާއިލާއާއެކު ޖަލަށް އަންނަ ކުޑަކުދިންނަށް ވާހަކަ ކިޔުމާއި ކުޅުމަށް ހާއްސަ ކިޑްސް ކޯނަރ އެއް ގާއިމްކޮށްފައިވާނެ ކަމަށެވެ. އަދި ބައްދަލުކުރާ ގެއާއެކު އިންވެގެން އޭސީކޮށްފައިވާ ވެއިޓިންގ ރޫމްއެއް ވެސް ގާއިމްކޮށްފައި ވެއެވެ.
މި ވެއިޓިންގ ރޫމަކީ ޢާއިލާއިން ބައްދަލުކުރުމަށް ހާޒިރުވާ މީހުން މަޑުކުރުމަށާއި އެހެނިހެން ކަންކަމުގައި ޖަލަށް ޒިޔާރަތްކުރާ މީހުން މަޑުކުރުމަށް ތައްޔާރުކޮށްފައިވާ ތަނެކެވެ.
