މީގެ 36 އަހަރު ކުރިން 1988 ވަނަ އަހަރު ދިވެހިރާއްޖޭގެ ގުޅުން ޕްރައިވެޓް ލިމިޓެޑްގެ ނަމުގައި ކުންފުންޏެއް ރާއްޖޭގައި ރަޖިސްޓްރީކުރީ އެ އަހަރުގެ މޭ މަހުގެ 16 ވަނަ ދުވަހުގައެވެ. ރާއްޖޭގެ ފުރަތަމަ ޓެލެކޮމިއުނިކޭޝަންގެ ކުންފުނީގެ ޚިދުމަތްތައް އުފަންކޮށް، އެ ދާއިރާއަށް އިންގިލާބެއް ގެނުވައި މި ކުންފުނިން މުވާސަލާތީ ޚިދުމަތް ދޭން ފެށީ ހަމަ އެ އަހަރުގެ އޮކްޓޯބަރު އެއްވަނަ ދުވަހުއެވެ. 1996 ވަނަ އަހަރު ދިވެހި ނެޓުގެ ނަމުގައި ރާއްޖެއަށް ފުރަތަމަ އިންޓަނެޓް ތައާރަފުކޮށް ހޯދި ކާމިޔާބީއާއެކު ފެންނަން ފެށީ ދިރާގުން ކާމިޔާބީއަކަށް ފަހު ކާމިޔާބީއެއް ހާސިލުކޮށް މުޅި މި ގައުމު ގުޅާލަދިން މަންޒަރެވެ.
1997 ވަނަ އަހަރު މޯބައިލް ފޯނުގެ ޚިދުމަތް ތައާރަފުކުރުމުން ފެށިގެން ގޮސް، މި އަހަރު އޭޝިއަން ޓެލެކޮމް އެވޯޑްސް 2024ގައި މޯލްޑިވްސް ބްރޯޑްބޭންޑް ޓެލެކޮމް ކޮމްޕެނީ އޮފް ދަ އިޔާ އެވޯޑު ވެސް ދިރާގުން ވަނީ ހޯދާފައެވެ. ކާމިޔާބީގައި ދިރާގާ އަޅާކިޔާލެވޭނެ ކުންފުންޏެއް މަދުވާނެއެވެ. ޚާއްސަކޮށް މިއަދު ދިވެހި ސަރުކާރުން 55 އިންސައްތަ ހިއްސާވާ މި ކުންފުނި، 36 އަހަރުގެ ތެރޭގައި މުޅި ގައުމު ފަޚުވެރިކޮށްދީފިއެވެ.
ފޮނި ކާމިޔާބީތަކެއް ހޯދާފައިވާ މި ކުންފުނި މިހާ ހިސާބަށް ގެނައުމުގައި އެތައް ބައެއްގެ ބުރަ، މިންނެތް މަސައްކަތްތަކެއް ވާނެކަން ޔަގީނެވެ. ދިރާގުގެ 36 އަހަރުވީ މާޒީއަށް ބަލާއިރު 1989 ވަނަ އަހަރު މާލޭގައި ކޭބަލް އަޕްގްރޭޑް ކުރެވުނެވެ. އަދި އޭގެ ދެ އަހަރު ފަހުން 1991 ވަނަ އަހަރުގައި ފުރަތަމަ ފަހަރަށް ރާއްޖެއަށް ޕޭޖިންގެ ޚިދުމަތް ތަޢާރަފުކުރިއެވެ. އޭގެ އަހަރުތަކެއް ފަހުން 1996 ވަނަ އަހަރުގައި އެންމެ ފުރަތަމަ ފަހަރަށް ރާއްޖޭގައި އިންޓަރނެޓްގެ ޚިދުމަތް ތަޢާރަފުކުރީ "ނެޓް ލިންކް"ގެ ނަމުގައެވެ. އެހެން ނަމަވެސް ފަހުން މިނަން ދިވެހިނެޓްގެ ނަމަށް ވަނީ ބަދަލުކޮށްފައެވެ.
މުއާސަލާތީ ގޮތުން ރާއްޖެ ގުޅާލުމަށް ދިރާގުން ކުރަމުންދާ މަސައްކަތުގެ ދަށުން އެ ކުންފުނިން އަންނަނީ ބޮޑެތި އިންވެސްޓްމަންޓުތަކެއް ކޮށްގެން މަސައްކަތްތަކެއް ކުރަމުންނެވެ. އޭގެ ތެރޭގައި ރާއްޖޭގެ ރަށްތައް މުއާސަލާތީ އެއް ވިއުގައަކުން ގުޅުވާލުމަށް ސްރީލަންކާއާ އާއި ރާއްޖެއާ ދެމެދު ސަބްމެރިން ކޭބަލެއް ދިރާގުން ވަނީ އަޅާފައެވެ. މި ކޭބަލް އެޅުމުން ރާއްޖޭގެ މުއާސަލާތީ ހިދުމަތް އެތައް ގުނައެއް ފުރިހަމަވެގެން ދިޔައެވެ. ހަމަ މިއާއެކު ޓެލެކޮމިއުނިކޭޝަން ދާއިރާގެ އެންމެ ފަހުގެ ޓެކްނޮލޮޖީތައް ކަމަށްވާ 3ޖީ އައި 4ޖީ ވެސް ދޭން ފެށިއެވެ. ދިރާގުގެ ޚިދުމަތްތައް ކުރިއެރި މިންވަރަށް ބަލާއިރު 2018 ވަނަ އަހަރު އައިއިރު ރާއްޖޭގެ ހުރިހާ ރަށަކަށް 4ޖީ ކަވަރޭޖް ލިބެއެވެ. ޖެހިގެން އައި އަހަރު 5ޖީ ޚިދުމަތް ތައާރަފުކުރި އިރު، މުޅި ދެކުނު އޭޝިއާ ސަރަހައްދުން ވެސް އެޚިދުމަތް ފުރަތަމަ ތައާރަފުކުރީ ދިރާގުން ރާއްޖެއަށެވެ. އޭގެ އިތުރުން އެންމެ ފަހުގެ ގްލޯބަލް ސުޕަ ހައިވޭ ކަމަށްވާ ބައިނަލްއަގުވާމި ސީމީވީ 6 ސަބްމެރިން ކޭބަލް ދިވެހިރާއްޖެއާ ގުޅާލުމުގެ މަސައްކަަތް ވެސް އަންނަނީ ކުރަމުންނެވެ.
ދިރާގުން ބުނާ ގޮތުގައި މިއީ ރާއްޖޭގެ މުވާސަލާތީ ތާރީހުގައި ބައިނަލްއަގުވާމީ ސަބްމެރިން ކޭބަލް ސިސްޓަމް ކޮންސޯޓިއަމްގެ ފުރިހަމަ މެމްބަރެއްގެ ގޮތުގައި ރާއްޖޭގެ ޑިޖިޓަލް ހިދުމަތް ދޭ ކުންފުންޏެއް ބައިވެރިވާ ފުރަތަމަ ފަހަރު ކަމަށްވާއިރު އެ މަސައްކަތް 2026 ގެ ކުރީކޮޅު ނިންމާލެވޭނެ ކަމަށް އަންދާޒާ ކުރެއެވެ. ސީމީވީ-6 ސަބްމެރިން ކޭބަލް ސިސްޓަމަކީ ދެކުނު އިރުމަތީ އޭޝިއާ، މެދުއިރުމަތި އަދި ހުޅަނގު ޔޫރަޕް ގުޅުވާލަދޭ ގްލޯބަލް ސުޕަހައިވޭއެކެވެ. އެންމެ ފަހުގެ ކަނޑުއަޑީގެ ކޭބަލް ޓެކްނޮލޮޖީން ފަރުމާކޮށްފައިވާ މި ސިސްޓަމް ސިންގަޕޫރުން ފެށިގެން ފަރަންސޭސިވިލާތާ ދެމެދު 11 ގައުމެއްގައި ޖައްސާނެއެވެ.
ދިރާގުން ހޯދާފައިވާ ރަން އަކުރުން ފަވާލެވޭ ކާމިޔާބީތަކުގެ އިތުރުން މުޖުތަމައު ބިނާ ކުރުމަށްޓަކައި އަދި މީހުން ތަމްރީނުކޮށް އިޖްތިމާއީ ދުޅަހެޔޮކަން ކުރިއެރުވުމަށްޓަކައި ވެސް އެ ކުންފުނިން ފާހަގަކޮށްލެވޭ މަސައްކަތްތަކެއް ދަނީ ކުރަމުންނެވެ. ވަކިން ޚާއްސަކޮށް، ދިރާގުގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު)ގެ ދަށުން ގައުމުގެ ތަރައްގީއަށާއި މުޖުތަމައުގެ އުފަލާއި ތިމާވެށީގެ ދުޅަހެޔޮކަމަށް ދަނީ އެތައްކަމެއް ކޮށްދެމުންނެވެ. ޕާލޭ މޯލްޑިވްސްއާ ގުޅިގެން ދިރާގުން މިދިޔަ އަހަރު ވަނީ "މޯލްޑިވްސް ފޯ ދި އޯޝަން"ގެ ނަމުގައި ގޮނޑުދޮށްތައް ސާފު ކުރުމުގެ ހަރަކާތެއް ކުރިއަށް ގެންގޮސްފައެވެ. މި ހަރަކާތުގައި ރާއްޖޭގެ އެކި ސަރަހައްދުތައް ސާފުކުރި އިރު، ދިރާގުގެ 65 ވޮލެންޓިއަރުން ބައިވެރިވެފައިވެއެވެ. އޭގެ އިތުރުން ރާއްޖޭގެ އެންޖީއޯއެއް ކަމަށްވާ ސްޕާކްހަބާ ގުޅިގެން ދިރާގުން މިދިޔަ އަހަރު ވަނީ އަމިއްލަ މަސައްކަތް ކުރާ 47 ޒުވާނުންނަށް ސެޝަންތަކެއް ބާއްވާ އެމީހުންގެ މަސައްކަތުގައި ބޭނުންވާނެ އެއްޗެހި ހަދިޔާކޮށްފައެވެ.
ދިރާގުން މި ފަޚުރުވެރި ކާމިޔާބީތަކާ ގައުމު ކުރިއެރުވުމަށް ކޮށްދީފައިވާ އަގުނުކުރެވޭ މަސައްކަތަކުގެ ލިސްޓު ކިޔައި، އެކުންފުންޏަށް ކިތަންމެ ވަރަކަށް ވެސް ތައުރީފު ކުރެވިދާނެއެވެ. ހަމަ ހަގީގަތުގައި ވެސް އެ ކުންފުންޏަށް އެ ތައުރީފު ހައްގެވެ. މިއަދު ދިރާގުގެ 99 އިންސައްތަ މުވައްޒަފުންގެ ގޮތުގައި ދިވެހިން ތިބިއިރު، މިއީ އެކުންފުނީގެ ކާމިޔާބީގެ ސިއްރުގެ ގޮތުގައި ގިނަ ބަޔަކު ސިފަކުރެއެވެ. ދިވެހިންނަކީ ކަންކަމުގައި ހިކުމަތްތެރި، މޮޅު އަދި ހީވާގީ ބައެކެވެ.
