ވިލިމާލޭގައި 500 ހައުސިން ޔުނިޓް ގާއިމު ކުރުމުގެ މަސައްކަތް އޭޕްރިލް މަސް ތެރޭގައި ފެށިގެން ދާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މާލޭ މޭޔަރު އާއި ސިޓީ ކައުންސިލްގެ މެންބަރުން ހުވާ ކުރުމަށް ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ވިލިމާލޭގައި އެންމެ ބޮޑު މައްސަލައަކީ ހައުސިންގ އަށްވާތީ، ވިލިމާލޭގައި 500 ހައުސިންގ ޔުނިޓް ގާއިމު ކުރުމުގެ މަސައްކަތް މީގެ ކުރިން އެމަނިކުފާނު މާލޭގެ މޭޔަރަކަށް ހުންނަވައިގެން ކުރައްވަމުން އުޅުއްވުމުން އޭރުގެ ސަރުކާރުން ހުއްދަ ނުދިނުމުން ނުފެށި އޮތް ނަމަވެސް އެ މި ސަރުކާރުން މަސައްކަތް ފަށަން ހަމަޖެހިފައިވާ ކަމަށެވެ.
ރައީސް ވިދާޅުވި ގޮތުގައި މި މަސައްކަތް ފެށިގެންދާނީ މިއަހަރުގެ އޭޕްރިލް މަހުގެ ތެރޭގައެވެ. އަދި އެ މަސައްކަތް މި ފަސް އަހަރު ދުވަހުގެ ތެރޭގައި ނިންމާލައްވާނެ ކަމަށް ވެސް ރައީސް ވަނީ ވިދާޅުވެފައެވެ.
"ވިލިމާލޭގައި އެންމެ ބޮޑު މައްސަލައަކީވެސް ހައުސިންގއަށްވާތީ، ވިލިމާލޭގައި 500 ހައުސިންގ ޔުނިޓް ގާއިމުކުރުމުގެ މަސައްކަތްވެސް، ހުއްދަ ނުދިނުމުން ނުފެށި އޮވެފައި، މިހާރު އެވަނީ ފެށޭގޮތަށް ހަމަޖެހިފައި. އެ މަސައްކަތްވެސް، އަޅުގަނޑު ދެންމެ ދެންނެވި މުއްދަތުގައި އިރާދަކުރެއްވިއްޔާ ފެށިގެންދާނެ." ރައީސް ވިދާޅުވިއެވެ.
ރައީސް ވަނީ މާލޭގެ ރައްޔިތުންނަށް ކޮށްދެއްވަން ޖެހިވަޑައިގަންނަވާ މުހިންމު ކަންކަން ކުރުމުގައި މިސަރުކާރުން މަސައްކަތް ކުރައްވާނީ މާލޭ ކައުންސިލާއި ގުޅިގެންކަން ފާހަގަ ކުރައްވާފައެވެ. އަދި ކައުންސިލްގެ ފުރިހަމަ އެއްބާރުލުން ލިބިވަޑައިގެންފިނަމަ، އެކަންކަން ބާރަށް ކުރިއަށް ގެންގޮސް ނިންމައި، ހައްލު ކުރަން ޖެހޭ ކަންކަން ހައްލު ކުރެވޭނެ ކަމަށް ރައީސް ފާހަގަ ކުރެއްވިއެވެ.
