ވިލިމާލޭގައި މިސަރުކާރުން އަޅަން ނިންމާފައިވާ 100 އެނދުގެ ހޮސްޕިޓަލް އަޅަނީ ޗައިނާއިން ރާއްޖެއަށް ދޭ ހިލޭ އެހީގައިކަން އެނގިއްޖެއެވެ.
މާލެ އާއި ވިލިމާލެއާ ދެމެދު ސީ އެމްބިއުލާންސްގެ ހިދުމަތް ދިނުމަށްޓަކައި އެހިދުމަތް ލޯންޗު ހަވާލުކުރުމުގެ ރަސްމިއްޔާތުގައި ވާހަކަ ދައްކަވަމުން އިއްޔެ ސިއްހަތާ ބެހޭ ވަޒީރު ޑރ. އަބްދުﷲ ޚަލީލު ވިދާޅުވީ އެ ހޮސްޕިޓަލުގެ މަސައްކަތް ވަރަށް އަވަހަށް ނިމިގެންދާނެ ކަމަށާއި އެ ހޮސްޕިޓަލު އެޅުމަށް ބޭނުންވާ ފައިސާ އެހެން ގައުމަކުން ހަމަޖައްސައި ދީފައިވާ ކަމަށެވެ.
އެހެން ގައުމަކުން މިފައިސާ ހަމަޖައްސާފައިވާ ކަމަށް ވިދާޅުވިނަމަވެސް އެއީ ކޮންގައުމެއް ކަމެއް މިނިސްޓަރު ހާމައެއް ނުކުރައްވައެވެ.
"ވަގުތު" އަށް އެނގިފައިވާ ގޮތުގައި ވިލިމާލޭގައި އަޅަން ނިންމާފައިވާ ފައިސާ ހަމަޖައްސަދީފައިވަނީ ޗައިނާއިންނެވެ. މި ފައިސާއަކީ ލޯނު އުސޫލުގެ ދަށުން ރާއްޖެ ސަރުކާރަށް ދޭން ނިންމި ފައިސާއަށް ނުވާއިރު، މިއީ 100 އިންސައްތަ ހިލޭއެހީގެ ގޮތުގައި ދޭން ނިންމާފައިވާ ފައިސާކަންވެސް ވަނީ އެނގިފައެވެ.
ވިލިމާލޭގައި 100 އެނދުގެ ހޮސްޕިޓަލް ތަރައްގީ ކުރެވިގެންދާނީ ރައްޔިތުންނަށް ބޭނުންވާ ހުރިހާ ހިދުމަތްތަކެއް އެންމެ އެކަށީގެންވާ ގޮތުގައި ލިބިގެންދާ ގޮތަށް ކަމުގައި ވަޒީރު ވަނީ މީގެކުރިން ވިދާޅުވެފައެވެ. އަދި ހޮސްޕިޓަލް ތަރައްގީ ކުރެވިގެންދާނީ ތިމާވެއްޓާ ވެސް ރައްޓެހި ގޮތަކަށް ކަމަށް އޭނާ ވިދާޅުވިއެވެ.
"އެ މަސައްކަތުގެ ތެރެއިން މިހާރު ވިލިމާލޭގައި 100 އެނދުގެ ހޮސްޕިޓަލެއް، ޓާޝިއަރީ ފެންވަރުގައި ކުރިއަށް ގެންދަން، މިހާރު ޑިޒައިނިން މަރުހަލާ ކުރިއަށްދަނީ، މާ ލަސްތަކެއް ނުވެ ފެނިގެންދާނެ މި ފެށުނު އާ އަހަރު އެކަން ހަގީގަތަކަށް ވެގެންދާ މަންޒަރު" ޚަލީލު ވިދާޅުވިއެވެ.
