އީދާ ދިމާކޮށް މޯލްޑިވިއަން އިން އިތުރު ދަތުރުތަކެއް

ކުރިއަށް އޮތް ފިތުރު އީދު ބަންދާ ދިމާކޮށް، މޯލްޑިވިއަން އެއާލައިނުން އިތުރު ދަތުރުތަކެއް ޝެޑިއުލްކޮށްފި އެވެ.

މޯލްޑިވިއަން އިން ބުނިގޮތުގައި އެ އެއާލައިނުން އީދާ ދިމާކޮށް 11 ރަށަކަށް ދަތުރުތައް އިތުރުކުރުމަށް ވަނީ ނިންމާފަ އެވެ. އެ ދަތުރުތައް ކުރާނީ މި މަހުގެ 29 ވަނަ ދުވަހުން ފެށިގެން އަންނަ މަހުގެ 5 ވަނަ ދުވަހާ ހަމައަށެވެ.

އެގޮތުން މިހާރު ޝެޑިއުލްކޮށްފައިވާ ދަތުރުތަކުގެ އިތުރަށް ފުވައްމުލަކާއި، ގަން، ހދ. ހއ. ށ. ލ. ގދ. އަދި ގއ އަތޮޅަށް ވެސް ދަތުރުތައް ކުރުމަށް ވަނީ ހަމަޖެހިފަ އެވެ. އޭގެ ތެރެއިން އެންމެ ގިނަ ދަތުރުކުރަނީ ގަމަށެވެ. އެއީ އަށް ދަތުރެވެ.

ކޮންމެ އަހަރަކު ވެސް އީދާ ދިމާކޮށް މޯލްޑިވިއަން އިން ކޮންމެ އަހަރަކު ވެސް އެކި ސަރަހައްދުތަކަށް ދަތުރުތައް އިތުރުކުރާއިރު މި އަހަރު އީދާ ދިމާކޮށް ބ. އަތޮޅަށް ސީ ޕްލޭން ދަތުރުކުރުމަށް ވެސް ވަނީ ހަމަޖައްސާފަ އެވެ.

މީގެ އިތުރަށް ރަމަޟާން މަހުގެ ފަހު 10 ގައި ލިބޭ ބަންދުގައި ވެސް ދަތުރުތައް އިތުރުކުރަމުން އަންނަ އިރު މި މަހުގެ 23 ވަނަ ދުވަހު ވެސް ފުނަދޫ ހޯރަފުށި އަދި ފުވައްމުލަކަށް އިތުރު ދަތުރުކުރުމަށް ވަނީ ހަމަޖެހިފަ އެވެ.