ޣައްޒާގައި އދއިން ހިންގާ ކްލިނިކަކަށް ބޮންއަޅައި 19 މީހުން ޝަހީދުކޮށްލައިފި، އޭގެތެރޭގައި 9 ކުޑަކުދިން ހިމެނޭ

ޣައްޒާގެ އުތުރުގައި ހުރި އދގެ ރެފިއުޖީ އޭޖެންސީގެ ކްލިނިކަށް، ޓެރަރިސްޓުން ބޮންއެޅުމުގެ ސަބަބުން 19 މީހުން ޝަހީދުވެއްޖެއެވެ.

ހަމަލާ ދީފައިވަނީ، ފަލަސްތީނު ރެފިއުޖީންނާބެހޭ އދގެ އޭޖެންސީ، އަންރުވާއިން ޣައްޒާގެ އުތުރުގެ ޖަބަލިއާ ރެފިއުޖީ ކޭމްޕްފައި ހިންގާ ކްލިނިކަކަށެވެ. މިއީ، ގެދޮރުނެތި ހާލުގައި ޖެހިފައިވާ އެތައް އާންމުން ހިމާޔަތް ހޯދައިގެންވެސް ތިބި ކްލިނިކެކެވެ.

އިސްތިއުމާރީ ޓެރަރިސްޓުން ކްލިނިކަށްދިން އުދުވާނީ ހަމަލާގައި އިތުރު އެތައްބަޔަކު ޒަޚަމްވިއެވެ.

ޣައްޒާ ހެލްތު މިނިސްޓްރީގެ ޑިރެކްޓަރ ވިދާޅުވީ، ޝަހީދުވި 19 މީހުންގެ ތެރޭގައި 9 ކުޑަކުދިންވެސް ހިމެނޭ ކަމަށެވެ.

ކްލިނިކަށް ދިން ހަމަލާގައި ޝަހީދުވި 19 މީހުންނާއެކު، އިސްތިއުމާރީ ޓެރަރިސްޓުން ޣައްޒާގެ ހުރިހާ ރަށަކަށް ދެމުންގެންދާ ޓެރަރިސްޓު ހަމަލާތަކުގައި މިއަދު އިރުއެރިފަހުން ޝަހީދުވި މީހުންގެ އަދަދު މިހާރުވަނީ 42 އަށް އަރާފައެވެ.

ޓެރަރިސްޓު ސިފައިން ޣައްޒާއަށް ދެމުންގެންދާ ވައިގެ ހަމަލާތައް ވަރަށް ބޮޑަށް ފުޅާކޮށް، އާންމުން މެރުން އިތުރުކޮށް، ގެތަކާއި އިމާރާތްތަކަށް ބޮންއެޅުން ފުޅާކޮށްފައިވާއިރު، އެއްގަމުމަގުން އަރައި ހިންގާ އުދުވާނުތައްވެސް މިހާރު ގެންދަނީ ފުޅާކުރަމުންނެވެ.

އިސްރާއީލުގެ ޓެރަރިސްޓު ޑިފެންސް މިނިސްޓަރު މިއަދު ބުނެފައިވަނީ، ޣައްޒާއަށް ވައިގެމަގުންނާއި، އެއްގަމުމަގުން އަދި ކަނޑުމަގުންދޭ ހަމަލާތައް އިތުރު ކުރަމުންގެންދަނީ ހަމައެކަނި ހަމާސްއަށް ޕްރެޝަރ ކުރުމަށް ނޫން ކަމަށާއި، ހަމަލާތައް ފުޅާކުރަމުންގެންދަނީ ޣައްޒާއިން ހަމާސް ބޭރުކުރަން ޣައްޒާގެ އާންމުންނަށް މަޖުބޫރު ކުމުގެގޮތުންވެސް ކަމަށެވެ.