ކިޔެވުމުގައި ރަމގަޅު ނަތީޖާއެއް ނެރެވޭނީ ހަމައެކަނި އަބަދު " ފޮތެއްގެ ތެރޭގައި" އުޅެގެން ކަމަށް ދެކެވަޑައިނުގަންނަވާ ކަމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާއި ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
ތުރުކީއިން ރާއްޖެއަށް ފަހިކޮށްދީފައިވާ ސްކޮލަޝިޕްގެ ފުރުސަތުގައި މިހާތަނަށް ހޮވުނު 14 ދަރިވަރުންނަށް ބޭއްވި ޚާއްސަ ހަފްލާގައި ދަރިވަރުންނާ މުޚާތަބުކުރައްވާ މިނިސްޓަރު ވިދާޅުވީ، ފުރިހަމަ ތައުލީމަކީ ހަމައެކަނި ފޮތުން ހޯދޭނެ އެއްޗެއް ނޫން ކަމަށާއި، އެއީ އުޅޭ މާހައުލާއި، ކުރެވޭ އައު ތަޖުރިބާތަކުން ތިމާގެ ރޫހަށާއި ޖިސްމަށް ލިއްބައިދޭ ހަމަޖެހުންވެސް ޝާމިލުވެގެން ހޯދޭނެ އެއްޗެއް ކަމަށެވެ.
ހަމައެކަނި ފޮތް ކިޔުމުގެ އިތުރުން، އިތުރު ހަރަކާތްތަކަށް ވެސް ވަގުތު ހޭދަކުރަން ޖެހޭކަން މިނިސްޓަރު ފާހަގަ ކުރެއްވިއެވެ. އެއީ ކިޔަވައި ނިމި، ޚިދުމަތަށް ނިކުންނައިރު މީހާއަކީ ހުރިހާ ގޮތަކުން ގާބިލުކަން އިތުރުވެފައިވާނެ މީހަކަށް ވެގެންދާނެ ކަމެއް ކަމަށްވެސް މިނިސްޓަރު މާރިޔާ ވިދާޅުވިއެވެ.
މި ލިބުނު ޚާއްސަ ފުރުސަތުގެ ބޭނުން، އޭގެ އެންމެ މަތީ ދަރަޖައިގައި ހިފުން. ވީހާވެސް، މޮޅު އެކަޑެމިކް ނަތީޖާ ހޯދަމުން ދިޔުމަށް ގަދައަޅައި މަސައްކަތްކުރުން. މިކަން ޙާޞިލުވޭނީ ކޮންމެހެން އަބަދު "ފޮތެއްގެ ތެރޭގައި" އުޅެގެންކަމަކަށް އަޅުގަނޑެއް ނުދެކެން. ތިމާގެ ވަގުތުގެ ފައިދާ އެންމެ މޮޅަށް ނަގަން ދަސްކުރުމަކީ މިކަމުގެ އެންމެ މުހިންމު ފިޔަވަޅުކަމަށް އަޅުގަނޑު ދެކެން. އެ ވަގުތު ބަހާލަން އަޅުގަނޑަށް ފެންނަނީ ތިމާގެ ޖިސްމާއި ރޫޙަށް ފައިދާކުރަނިވި ކަންކަމުގެ މައްޗަށް. ފިޒިކަލް އަދި މެންޓަލް އެކްޓިވިޓީއަށް ވަގުތު ދޭންވާނެ. ގިނަ ޢިލްމާއި ހުނަރު އުނގެނިވަޑައިގަތުމަށް އެއިރުން މަގު ފަހިވެދާނެކަމަށް އަޅުގަނޑު ދެކެން.: މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާއި ބެހޭ ވަޒީރު ޑރ. މަރިޔަމް މާރިޔާ
ޑރ. މާރިޔާގެ ވާހަކަފުޅުގައި، ދަރިވަރުން ސަމާލުކަންދިނުމަށް އެކަމަނާ އެދިވަޑައިގަންނަވާ މުހިންމު ކަންކަން ފާހަގަ ކުރެއްވިއެވެ.
ކޮންމެ ތަނެއްގައި ހުއްޓަސް ތިމާ މީ ދިވެއްސެއް ކަމާއި މުސްލިމެއްކަން ހަނދާން ބެހެއްޓުމަށް އެކަމަނާ އިލްތިމާސް ކުރެއްވިއެވެ. އަދި ތިމާއަށް ލިބޭ މިންވަރުން ދެކޮޅު ޖައްސައިގެން އަބުރުވެރި ދިރިއުޅުމެއް އުޅުމަށް ވެސް އެކަމަނާ ދަރިވަރުންނަށް އިލްތިމާސް ކުރެއްވިއެވެ.
ކިޔެވުމުގެ ދުވަސްވަރު، އޭގެ އެންމެ ފައިދާކުރަނިވި ގޮތުގައި ހޭދަކުރުމަށް ނަސޭޙަތްތެރިވެވަޑައިގެން އަދި ޖިސްމާއި ރޫޙަށް ފައިދާކުރަނިވިގޮތުގައި ވަގުތުތައް ހޭދަކުރުމަށް އެދިވަޑައިގަތެވެ.
މި އަދުގެ ހަފްލާގައި މިނިސްޓަރު މާރިޔާގެ އިތުރުން އެ މިނިސްޓްރީގެ އިސް ބައެއް ވެރިންނާއި މުވައްޒަފުންނާއި، މިނިސްޓްރީ އޮފް ފޮރިން އެފެއަރޒްގެ އިސް ބައެއް ވެރިންނާއި، ތުރުކީ ވިލާތުގައި ހުންނަވާ ދިވެހި ސަފީރު ބައިވެރިވެވަޑައިގަތެވެ.
މި ހަފްލާގައި، މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރްޔަމް މާރިޔާއާއި، މިނިސްޓްރީ އޮފް ފޮރިން އެފެއަރޒްގެ ސެކްރެޓަރީ ބައިލެޓަރަލް އެމްބެސެޑަރ ޑރ. ހާލާ ޙަމީދު ވާހަކަފުޅު ދެއްކެވިއެވެ. އަދި ސްކޮލަރޝިޕް ލިބުނު ދަރިވަރަކު ވެސް ވާހަކަ ދެއްކިއެވެ.
