މިއަދު ދަރިވަރުންނަށް ލިބެމުންދާ ސްކޮލަރޝިޕްތައް ހަގީގަތަކަށް ވެގެން ދަނީ، އޮޅުމެއްނެތް ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ހިތްވަރުފުޅާއި މަސައްކަތްޕުޅުގެ ސަބަބުން ކަމަށާއި، އެކަމަށްޓަކައި އެ މަނިކުފާނަށް އައްސަރި ބަހާއި ސާބަސް ދަންނަވައި، ޝުކުރުގެ ޖިޒީއެއް އަރިސްކުރައްވާ ކަމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއިބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
ތުރުކީއިން ރާއްޖެއަށް ފަހިކޮށްދީފައިވާ ސްކޮލަޝިޕްގެ ފުރުސަތުގައި މިހާތަނަށް ހޮވުނު 14 ދަރިވަރުންނަށް ބޭއްވި ޚާއްސަ ހަފްލާގައި ވާހަކަފުޅު ދައްކަވަމުން މިނިސްޓަރު ވިދާޅުވީ، މިއަދު ދިވެހިންނަށް މަތީ ތައުލީމުގެ ފުރުސަތުތައް އިތުރުވެފައި މިވަނީ ރައީސް ޑރ. މުއިއްޒު ތައުލީމަށް ދެއްވާ އިސްކަމުގެ ތެރެއިން އެމަނިކުފާނުގެ މިންނެތް މަސައްކަތްޕުޅުން ކަމަށެވެ.
އެ މަނިކުފާނު ރާއްޖޭގެ ރިޔާސަތާ ހަވާލުވެ ވަޑައިގަތުމަށް ފަހު، ރައީސުލްޖުމްހޫރިއްޔާގެ ހައިސިއްޔަތުން އެންމެ ފުރަތަމަ، ތުރުކީއަށް ކުރެއްވި ރަސްމީ ދަތުރުފުޅުގައި މި ސްކޮލަރޝިޕްތަކުގެ ފުރުސަތު ދިވެހި ދަރިވަރުންނަށް ހޯއްދަވައި ދެއްވީ. ތުރުކީ އާއި އަޅުގަނޑުމެންގެ މި ލޮބުވެތި ވަޠަނާއި ދެ ގައުމުގެ ގުޅުން އިތުރަށް ބަދަހިކުރައްވައި، ދިވެހި ދަރިވަރުންނަށް، ތައުލީމީ އިތުރު ފުރުސަތުތަކަށް މަގުފަހިކޮށްދެއްވީ އެ ދަތުރުފުޅުގައި. މި ސްކޮލަރޝިޕްތައް ހަގީގަތަކަށް ވެގެން މި ދަނީ، އޮޅުމެއްނެތް ގޮތުގައި، އެމަނިކުފާނުގެ ހިތްވަރުފުޅާއި މަސައްކަތްޕުޅުގެ ސަބަބުންކަން ފާހަގަކުރަން. އެހެންކަމުން، އެ މަނިކުފާނަށް އައްސަރި ބަހާއި ސާބަސް ދަންނަވައި،ޝުކުރުގެ ޖިޒީއެއް އަރިސްކުރަން. ޝުކުރިއްޔާ ރައީސް! - މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއިބެހޭ ވަޒީރު ޑރ. މަރިޔަމް މާރިޔާ
އެކަމަނާގެ ވާހަކަފުޅުގައި ވިދާޅުވީ، އެ މަގުން ހިނގައި، މިހާ ހިސާބަށް އާދެވުނީ، މިކަމުގައި ވަރަށް ގިނަ ފަރާތްތަކެއްގެ ޝާމިލުވުން ވެސް ހިމެނިގެން ކަމަށެވެ. އެގޮތުން މިނިސްޓަރ އޮފް ފޮރިން އެފެއަރޒާއި، އެ މިނިސްޓްރީގެ އެކި ފެންވަރުގެ ބޭފުޅުން، ތުރުކީވިލާތުގައި ހުންނަވާ ދިވެހިރާއްޖޭގެ އެމްބެސެޑަރ ލެފްޓިނަންޓް ޖެނެރަލް (ރިޓަޔރޑް) ޢަބްދުއްރަޙީމް ޢަބްދުއްލަޠީފާއި އެމަނިކުފާނުގެ މިޝަންގެ މުވައްޒަފުން، ސްރީލަންކާގައި ހުންނަ، ތުރުކީވިލާތުގެ އެމްބަސީ، ތުރުކީގެ ހަޔަރ އެޑިޔުކޭޝަން ކައުންސިލް، އަދި އެ ގައުމުގެ މިނިސްޓްރީ އޮފް ކަލްޗަރ އެންޑް ޓޫރިޒަމާއި، އެ މިނިސްޓްރީގެ ޓަރކްސް އެބްރޯޑް އެންޑް ރިލޭޓެޑް ކޮމިޔުނިޓީސް ޑިޕާރޓްމަންޓަށް ބެލި ނަމަވެސް މިއިން ކޮންމެ ފަރާތަކަށް ވެސް ހިތުގައި އޮތީ ޝުކުރުވެރިކަން ކަމަށް މިނިސްޓަރު މާރިޔާ ވިދާޅުވިއެވެ.
އޭގެ އިތުރުން މިނިސްޓަރު ވަނީ އެ މިނިސްޓްރީގެ ހަޔަރ އެޑިޔުކޭޝަން ފެސިލިޓޭޓިންގ ޑިޕާޓްމަންޓްގެ ސްކޮލަރޝިޕް ސެކްޝަނާއި، އިންޓަނޭޝަނަލް ރިލޭޝަންސް ސެކްޝަނާއި އެހެނިހެން ސެކްޝަންތަކުގެ މުވައްޒަފުންގެ މިންނެތް މަސައްކަތް ވެސް ފާހަގަ ކުރައްވާފައެވެ.
އެ މިނިސްޓްރީން އިއުލާންކުރި ތުރުކީ ސްކޮލަރޝިޕްތަކަށް މިނިސްޓްރީން ނަން ހުށަހެޅި ދަރިވަރުންގެ ތެރެއިން ސްކޮލަރޝިޕަށް މިހާތަނަށް ހޮވިފައިވާ 14 ދަރިވަރުންނަށް ބޭއްވި ހާއްސަ ހަފްލާގައި ބައިވެރިވީ ތުރުކީއަށް ދިޔުމަށް ވިސާއާއި އެހެނިހެން ކަންކަން ހަމަޖެހިފައިވާ 11 ދަރިވަރުންނެވެ.
މި ސްކޮލަޝިޕަތަކަށް ދަރިވަރުންގެ ނަން ހުށަހެޅުމުގައި، ރާއްޖެއަށް މީހުން ބިނާކުރަން ބޭނުންވާ ދާއިރާތައް ކަމަށް ކަނޑައަޅާފައިވާ "ޓްރެއިނިންގ ނީޑްސް" ލިސްޓްގައި ހިމެނިފައިހުރި ދާއިރާތަކުން މަތީ ތަޢުލީމު ހާސިލުކުރުމަށް ހުށަހަޅާފައިވާ ދަރިވަރުންނަށް ވަނީ އިސްކަންދީފައެވެ.
ތަފާތު އެތައް ދާއިރާތަކަކުން ކުރިއަށް ދިޔުމަށް ހުޅުވައިލި މި ސްކޮލަޝިޕް ފުރުސަތުގައި، ބެޗްލަރސް ޑިގްރީއާއި މާސްޓަރސް ޑިގްރީއާއި ޑޮކްޓޯރަލް ޑިގްރީއަށް ކިޔެވުމުގެ ފުރުސަތުތައް ހިމެނެއެވެ.
ދިވެހިންނަށް ކުރިޔަށްދެވޭނެ ފުރުސަތުތައް ފުޅާކުރުމުގެ ގޮތުން ހާއްސަ ފަންނުތަކުން ދިވެހީންނަށް ކުރިޔަށް ދެވޭނެ އިންތިޒާމް ހަމަޖައްސައި ގައުމީ ތަރައްޤީގައި ދިވެހިން ޝާމިލްވުމުގެ ފުރުސަތު ފަހިކޮށްދެއްވުމަކީ ރައީސުލްޖުމްހޫރިއްޔާގެ ވަޢުދުފުޅުގެ ތެރޭގައި ހިމެނޭ ކަމެކެވެ.
