ހިޒްބުﷲގެ ހަމަލާތަކުގައި އިސްރާއީލުގެ އެންމެގިނަ އާންމުން މަރުވިދުވަސް

ހިޒްބުﷲ މުޖާހިދުން އިސްރާއީލުގެ އުތުރުގެ ސަރަހައްދުތަކަށް މިއަދު ދިން ވަރުގަދަ ރޮކެޓް ހަމަލާތަކުގައި އިސްރާއީލު އާންމުންގެ 8 މީހުން މަރުވެ، އިތުރު އެތައް ބަޔަކު ޒަޚަމްވެއްޖެއެވެ.

މިއީ، ހިޒްބުﷲގެ ރޮކެޓް ހަމަލާތަކުގައި، އެއް ދުވަހެއްގައި އިސްރާއީލު އާންމުންގެ މިހާ ގިނަމީހުން މަރުވި ފުރަތަމަ ފަހަރު ކަމަށް ރިޕޯޓްތައް ބުނެއެވެ.

އިސްރާއީލުގެ މީޑިއާއިން ބުނެފައިވަނީ، ރޮކެޓް ހަމަލާތަކުގައި މެޓޫލާ ސިޓީން 7 މީހުން މަރުވެފައިވާއިރު، ހައިފާއިން އެކަކު މަރުވެފައިވާ ކަމަށެވެ.

އަޔަން ޑޯމްގެ މައްސަލަތައް ދިމާވެ، އިސްރާއީލު ސިފައިންނަށް މިހާރު، ހިޒްބުﷲއިން ފޮނުވާލާ ހުރިހާ ރޮކެޓްތަކެއް ވައްޓައެއް ނުލެވެއެވެ. އޭގެ ރޮކެޓްތައް އަމާޒަށް ވާސިލްގެ މީހުން މަރުވުމުގެ އިތުރުން، ތަންތަނުގައި އަލިފާން ރޯވެ ބޮޑެތި ގެއްލުންތައްވެސް ލިބެމުން ދެއެވެ.

ހިޒްބުﷲއިން ރެއަކާއި ދުވާލެއްގެ މައްޗަށް އިސްރާއީލުގެ ރަށްތަކަށް އެތައް ސަތޭކަ ރޮކެޓް ފޮނުވައި ހަމަލާ ދެމުން ގެންދާއިރު، އިސްރާއީލުގެ ބައެއް އަވަށްތައް މިހާރުވަނީ، އިސްރާއީލު ސިފައިން ޣައްޒާއަށް ޖައްސާފައިވާ ހާލު ޖެހިފައެވެ.

ހިޒްބުﷲގެ ހަމަލާތަކުގައި މީގެކުރިން އިސްރާއީލުގެ ރަށްތަކުން އާންމުންގެ އެތައްބަޔަކު ޒަޚަމްވެފައި ވެއެވެ.

ހިޒްބުﷲގެ ހަމަލާތައް މިހާރު މައިގަނޑުގޮތެއްގައި އަމާޒުކުރަމުން ގެންދަނީ އިސްރާއީލު ސިފައިންގެ ބޭސްތަކަށެވެ.

އެގޮތުން، މިސައިލާއި، ރޮކެޓާއި، ޑްރޯން ބޭނުންކޮށްގެން ވަރުގަދަ ހަމަލާތަކެއްދީ، އިސްރާއީލު ސިފައިންގެ އެތައް ބޭހެއް ގޮއްވާލާފައި ވެއެވެ. އިސްރާއީލު ސިފައިންގެ ވަރަށް މުހިންމު 2 ބޭހެއް އަލުން ބޭނުން ނުކުރެވޭ ވަރަށް ގޮއްވައި އަންދާލާފައި ވެއެވެ.

އަދި މި ހަމަލާތަކުގައި ސިފައިންގެ އެތައްބަޔަކު މަރުވެ، އެތައްބަޔަކު ޒަޚަމްވެފައިވެސް ވެއެވެ.