އިޓަލީގައި ފެން ބޮޑުވުން: މިހާތަނަށް 14 މީހުން މަރުވެއްޖެ!

އިޓަލީއަށް އައި ތޫފާނެއްގެ ސަބަބުން އެ ޤައުމުގެ އެމީލިއާ- ރޮމަގްނާ ސަރަހައްދުގައި އާދަޔާ ޚިލާފަށް ފެންބޮޑުވެ ގިނަ ބަޔަކު މަރުވެެއްޖެއެވެ.

މީޑިޔާ ރިޕޯޓްތައް ބުނާގޮތުން އިޓަލީއަށް އައި ތޫފާނުގެ ސަބަބުން އެމީލިއާ- ރޮމަގްނާ ސަރަހައްދުގެ ގިނަ ކޯރުތަކެއް ފުރިގެން ބަންޑުންވެފައިވާއިރު، މަގުތަކާއި ގެތައް ވެސް ވަނީ ފެނުގެ އަޑީގަ އެވެ. އިއްޔެގެ ނިޔަލަށް 14 މީހުންގެ ހަށިގަނޑު ފެނުތެރެއިން ހޯދާފައިވާކަމަށް ރިޕޯޓްތައް ބުނެއެވެ.

ރޮމަގްނާ ސަރަހައްދު މިހާރު ވަނީ ފެނުގެ އަޑީގައެވެ. އެތައް ބަޔެއްގެ ގެދޮރާއި ހިފާ ގެންގުޅޭ މުދާ ހަލާކުވެ ކައްކާ ކެވޭ އެއްވެސް ގޮތެއް ނެތެވެ. ތޫފާނުގެ ސަބަބުން ހާލުގައި ޖެހުނު މީހުންގެ އަދަދު އެތައް ހާހަކަށް އަރާފައިވާއިރު، ލިބުނު ގެއްލުންތަކުގެ އަދަދު 20 މިލިއަން ޔޫރޯއަށް ވުރެ މައްޗަށް އަރާކަމަށް ރިޕޯޓްތައް ބުނެއެވެ.

އެސަރަހައްދު އިމަޖެންސީ ހާލަތަށް ގެނެވިފައިވާއިރު ބޯކޮށް ވާރޭވެހި ފެންބޮޑުވުމުގެ އިތުރުން ބިންގަނޑު ކަނޑައިގެން ދިއުމުގެ ހާދިސާތައްވެސް ވަނީ ގިނަވެފައެވެ. އެ ސަރަހައްދުގައި ބާއްވަން ހަމަޖެހިފައި އޮތް ފޯމިއުލާ ވަންގެ ރޭސް ވެސް މި ތޫފާނުގެ ސަބަބުން ކެންސަލްވެފައިވާއިރު، ޓޫރިސްޓުން އެ ހިސާބަށް ދަތުރު ނުކުރުމަށް ގައުމުތަކުން ދަނީ ޓްރެވަލް އެޑްވައިޒަރީ ވެސް ނެރެމުންނެވެ.

މޫސުމާ ބެހޭ އިދާރާތަކުން ލަފާކުރާ ގޮތުގައި އިޓަލީއަށް މި އަންނަމުންދާ ތޫފާނަކީ ދުނިޔެ ހޫނުވުމާއެކު މޫސުމަށް އަންނަމުންދާ ބަދަލުތަކުގެ ސަބަބުން ހިނގަމުންދާ ކާރިސާތަކުގެ ބައެކެވެ.