ތިލަފުށީ ޕޯޓުގައި ކާގޯ ކްލިއަރެންސްގެ ޚިދުމަތް އަންނަ އޮކްޓޯބަރު މަހު ފަށަނީ

ތިލަފުށީގައި ތަރައްގީކުރަމުން އަންނަ ވިޔަފާރި ބަނދަރުގައި ކާގޯ ކްލިއަރެންސްގެ ޚިދުމަތް އަންނަ އޮކްޓޯބަރު މަހުގެ ތެރޭގައި ފެށުމަށް ތައްޔާރުވަމުން އަންނަ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފިއެވެ.

މީޑިއާއަށް ދެއްވި އިންޓަރވިއުއެއްގައި އެމްޕީއެލްގެ ސީއީއޯ ހުސައިން ޝަފީގު ވިދާޅުވީ، ކުރިއަށް އޮތީ ރާއްޖޭގެ ފަތުރުވެރިކަމުގެ ޕީކް ސީޒަނާއި އަދި ބަރަކާތްތެރި ރަމަޟާން މަސް ކަމަށްވާތީ، މި ދުވަސްވަރާ ދިމާކޮށް ރާއްޖެއަށް އެތެރެކުރާ މުދަލުގެ އަދަދު ވަރަށް ބޮޑަށް އިތުރުވެގެންދާނެ ކަމަށެވެ. އެހެންކަމުން، ތިލަފުށީގައި ޕޯޓް އޮޕަރޭޝަންތައް ފެށުމަކީ މާލޭ ވިޔަފާރި ބަނދަރު ތޮށްޖެހުމުގެ މައްސަލައަށް ދާއިމީ އަދި އަވަސް ހައްލެއް ލިބިގެންދާނެ ކަމެއް ކަމުގައި އޭނާ ފާހަގަކުރެއްވިއެވެ.

އަންނަ މަހުގެ ތެރޭގައި މި ޚިދުމަތް ރަސްމީކޮށް ފެށުމަށްޓަކައި ވާންޖެހޭ އެންމެހައި ތައްޔާރީތައް މިހާރު ދަނީ ވަރަށް ބާރަށް ކުރެވެމުންނެވެ. މިގޮތުން އެ ސަރަހައްދުގައި ޕޭވިންގ ހެދުމުގެ މަސައްކަތާއި، އެމްޕީއެލްގެ މުވައްޒަފުން ތިބުމަށް ހަމަޖެހިފައިވާ އެކޮމޮޑޭޝަނާއި ކެއިންބުއިމުގެ އިންތިޒާމުތައް ފުރިހަމަކުރުމުގެ މަސައްކަތް އެ ކުންފުނީގެ މުވައްޒަފުން އަންނަނީ ކުރަމުންނެވެ.

އެމްޕީއެލްއިން އަމާޒު ހިފާފައިވަނީ މި ހިނގާ ސެޕްޓެމްބަރު މަހުގެ ނިޔަލަށް، ނުވަތަ އަންނަ އޮކްޓޯބަރު މަހުގެ ފުރަތަމަ ހަފުތާގެ ތެރޭގައި މި ހުރިހާ ތައްޔާރީތަކެއް އެއްކޮށް ނިންމައި، ތިލަފުށީ ބަނދަރުން ކާގޯ ކްލިއަރެންސްގެ ޚިދުމަތް އާންމުކޮށް ފޯރުކޮށްދޭން ފެށުމަށެވެ. މިއާއެކު ވިޔަފާރިވެރިންނަށް މުދާ ކްލިއަރ ކުރުމުގައި ބޮޑެތި ލުއިފަސޭހަތަކެއް ލިބިގެންދާނެ ކަމަށް އެ ކުންފުނިން ދެކެއެވެ.