ޣާލިބަށް ތާއީދުކުރާ ކަމަށް ބުނާ ވާހަކަ ރައީސް ދޮގުކުރައްވައިފި

ހުޅުމާލެ ދެކުނު ދާއިރާގެ އެމްޑީޕީ ކެންޑިޑޭޓަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތާއީދުކުރައްވާ ކަމަށް ދެކެވޭ ވާހަކަތައް އެމަނިކުފާނު މިއަދު ދޮގުކުރައްވައިފިއެވެ.

ރައީސް މިކަން ހާމަކުރެއްވީ ހުޅުމާލެ ދެކުނު ދާއިރާގައި ކުރިއަށްދިޔަ "ދޮރުން ދޮރަށް" ހަރަކާތުގެ ތެރެއިން ނޫސްވެރިންނާ ބައްދަލުކުރައްވައި ވާހަކަދައްކަވަމުންނެވެ. ރައީސް ވިދާޅުވި ގޮތުގައި، އެ ދާއިރާގެ ގޭގެއަށް ޒިޔާރަތްކޮށް އެމްޑީޕީގެ ކެންޑިޑޭޓް ދޮގު މައުލޫމާތު ފަތުރަމުންދާ ކަމަށާއި، އޭގެ ތެރޭގައި ރައީސްގެ ތާއީދު އޭނާއަށް އޮތް ކަމަށް ބުނުން ހިމެނޭ ކަމަށެވެ.

ހުޅުމާލެ ދެކުނު ދާއިރާއަށް އެމްޑީޕީގެ ފަރާތުން ވާދަކުރައްވަނީ އަޙްމަދު ޣާލިބެވެ. އޭނާއަކީ ރައީސް މުޢިއްޒުގެ އާއިލީ ބޭފުޅެއްގެ އިތުރުން، މީގެކުރިން ރައީސްގެ އަރިހުގައި މަސައްކަތްކުރެއްވި ބޭފުޅެއް ނަމަވެސް، ފަހުން ވަނީ އެމްޑީޕީއާ ގުޅިވަޑައިގެންފައެވެ.

ރައީސް ސަރުީހުކޮށް ވިދާޅުވީ، އެމަނިކުފާނުގެ ފުރިހަމަ ތާއީދު އޮތީ ހަމައެކަނި ޕީއެންސީގެ ކެންޑިޑޭޓުންނަށް ކަމަށެވެ. ހުޅުމާލެ ދެކުނު ދާއިރާއަށް ޕީއެންސީގެ ޓިކެޓުގައި އަޙްމަދު ޢުބައިދު (އުބޭ) ވާދަކުރައްވާއިރު، އަމިއްލަ ގޮތުން ނޮޅިވަރަމް ދާއިރާގެ ކުރީގެ މެންބަރު މުޙައްމަދު ނަޝީދު (މޮސްޓާ) ވެސް ވާދަކުރައްވައެވެ.

ރައީސް ޣާލިބް އަށް ތާއީދު ކުރައްވާ ވާހަކަ ދޮގުކުރައްވާފައިވާއިރު ޕީއެންސީގެ ޕީޖީ ލީޑަރު އިބްރާހީމް ފަލާޙް ވެސް ވަނީ އެ ޕާޓީގެ ރަސްމީ ކެންޑިޑޭޓުން ފިޔަވައި އެހެން އެއްވެސް މިނިވަން ކެންޑިޑޭޓަކަށް ޕާޓީގެ ތާއީދު ނޯންނާނެކަން މީގެކުރިން ހާމަކުރައްވާފައެވެ.