ޓީ ބިލް ވިއްކަން ހުޅުވާލައިފި

ސަރުކާރުގެ ހަރަދުތައް ހަމަޖެއްސުމަށްޓަކައި 1.1 ބިލިއަން ރުފިޔާގެ ޓީ-ބިލް ވިއްކުމަށް ފިނޭންސް މިނިސްޓްރީން ހުޅުވާލައިފިއެވެ.

މިއީ މިއަހަރުގެ ތެރޭގައި ޓީ ބިލް ވިއްކުމަށް އިޢުލާންކުރި ހަވަނަ ފަހަރެވެ.

މި ފަހަރު ވިއްކުމަށް ހަމަޖެހިފައިވާ ޓީ-ބިލްތަކުގެ ތަފްސީލަށް ބަލާއިރު:

އޭޕްރީލް 20 ގެ ނިޔަލަށް އަނބުރާ ދެއްކުމަށް ހަމަޖެހިފައިވާ 490 މިލިއަން ރުފިޔާގެ ޓީ-ބިލް.

ޖޫން 29 އަށް އަނބުރާ ދެއްކުމަށް ހަމަޖެހިފައިވާ 180 މިލިއަން ރުފިޔާގެ ޓީ-ބިލް.

ސެޕްޓެމްބަރު 21 އަށް އަނބުރާ ދެއްކުމަށް ހަމަޖެހިފައިވާ 35 މިލިއަން ރުފިޔާގެ ޓީ-ބިލް.

އަންނަ އަހަރުގެ މާޗް 22 އަށް އަނބުރާ ދެއްކުމަށް ހަމަޖެހިފައިވާ 423 މިލިއަން ރުފިޔާގެ ޓީ-ބިލް.

މި ޓީ-ބިލްތަކުގެ އިންޓްރެސްޓް ރޭޓް ހުރީ 3.50 އިންސައްތައާއި 4.60 އިންސައްތައާ ދެމެދުގައެވެ.

ސަރުކާރުން ހުޅުވާލާ މި ފުރުޞަތުގައި އާންމުކޮށް ޓީ-ބިލް ގަންނަނީ ޕެންޝަން ފަންޑާއި، ބޭންކުތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ބައެއް ކުންފުނިތަކުންނެވެ.

ޓީ-ބިލަކީ ސަރުކާރުން ކުރު މުއްދަތަށް ފައިސާ ހޯދުމަށް ބޭނުންކުރާ ސެކިއުރިޓީޒްގެ ބާވަތެކެވެ. ރާއްޖޭގައި ޓީ-ބިލް ވިއްކަނީ ދިވެހި ރުފިޔާ އިން، މޫނުމަތީ އަގަށްވުރެ ހެޔޮ (ޑިސްކައުންޓް) އަގެއްގައެވެ. އަދި މުއްދަތު ހަމަވުމުން ސަރުކާރުން އެ ފައިސާ އަނބުރާ ދައްކަނީ އޭގެ ފޭސް ވެލިއު ނުވަތަ ފުރިހަމަ އަގުގައެވެ.