އެސްޓީއޯ އިން ވިއްކާ އަސާސީ ކާބޯތަކެތީގެ އަގުތައް އެއްވަރެއްގައި ހިފެހެއްޓިފައި: އިކޮނޮމިކް މިނިސްޓްރީ

ރަމަޟާން މަހުގެ ގާތްގަނޑަކަށް މެދާ ހަމައަށް އައިއިރުވެސް، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ވިއްކާ އަސާސީ ކާބޯތަކެތީގެ ބާވަތްތައް ރާއްޖޭގެ ހުރިހާ ސަރަހައްދަކުންވެސް ހެޔޮ އަގުގައި ލިބެމުންދާ ކަމަށް އިކޮނޮމިކް މިނިސްޓްރީން ބުނެފިއެވެ.

އެ މިނިސްޓްރީން ބުނިގޮތުގައި މި ބަރަކާތްތެރި ރަމަޟާން މަހަށް ތައްޔާރުވުމުގެ ގޮތުން، ގަނޑުކޮށް މުދާ ހޯދުމާއި ރަށްރަށަށް މުދާ ފޯރުކޮށްދިނުމުގައި ދުރާލައި އެޅި ހަރުދަނާ ފިޔަވަޅުތަކުގެ ސަބަބުން، މުދަލަށް އޮތް ޑިމާންޑް ބޮޑުވި ނަމަވެސް ބާޒާރުގެ އަގުތައް ވަނީ އެއްވަރެއްގައި ހިފެހެއްޓިފައެވެ.

ވަކިން ޚާއްޞަކޮށް އަސާސީ ކާބޯތަކެތީގެ ލިސްޓަށް އިތުރުކުރެވުނު 23 ބާވަތާއެކު، ހަނޑޫ، ހަކުރު އަދި ފުށް ހިމެނޭހެން ޖުމުލަ 26 ބާވަތެއްގެ އަގު އިންތިހާއަށް އުފުލިގެން ނުދާނޭހެން އެސްޓީއޯއިން ކަނޑައަޅާފައިވާ ހެޔޮ އަގުތަކުގެ ސަބަބުން ބާޒާރުގައި ތަކެތީގެ އަގު ވަނީ ހިފެހެއްޓިފައި ކަމަށް އެ މިނިސްޓްރީން ވަނީ ބުނެފައެވެ.

އިކޮނޮމިކް މިނިސްޓްރީން ހާމަކުރިގޮތުގައި ކުރިއަށް އޮތް ހަފްތާތަކުގައިވެސް މުދާ މެދުނުކެނޑި ލިބޭނެކަން ކަށަވަރުކުރުމަށްޓަކައި، އެ މިނިސްޓްރީން ދަނީ ބާޒާރުގައި ތަކެތީގެ އަގުތައް ހުރި މިންވަރު މޮނިޓަރކޮށް، ކަމާބެހޭ ފަރާތްތަކާ ގުޅިގެން ކުރަންޖެހޭ އެންމެހައި މަސައްކަތްތައް ކުރަމުންނެވެ.

މިއީ ރައްޔިތުންނަށް މެދުކެނޑުމެއް ނެތި، ހެޔޮ އަގުގައި މުދާ ފޯރުކޮށްދީ، މި ރަމަޟާން މަހު ޢާއިލާތަކުން އުފުލަންޖެހޭ މާލީ ބުރަ ކުޑަކޮށްދީ، ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް ސަރުކާރުން ކުރާ މުހިންމު މަސައްކަތެއް ކަމަށް އިކޮނޮމިކް މިނިސްޓްރީން ބުނެއެވެ.