ޢީދުދުވަސް ވީމާ އިސްރާއީލުގެ އަނިޔާވެރިކަން ދިޔައީ މައްޗަށް، 45 މީހުން ޝަހީދުކޮށްލިއިރު ގިނައީ ކުޑަކުދިން

މިސްރުން ހުށަހެޅި އައު ހުށަހެޅުމާއި، އޭގައި ހިމެނޭ ހުރިހާ ކަމަކަށް ހަމާސް އެއްބަސްވުމާއި، އިސްތިއުމާރީ އިސްރާއީލުންވެސް ހުށަހެޅުންތަކެއް ހުށަހަޅައިގެން އުޅޭތީ، ޣައްޒާގެ ގިނަ އާންމުން އުންމީދު ކުރަމުންދިޔައީ ފިތުރު ޢީދު ދުވަހުން ފެށިގެން އަނެއްކާވެސް ހަމަލާތައް ހުއްޓާލުމުގެ އެއްބަސްވުމަކަށް ގޮސްދާނެ ކަމަށެވެ.

ނަމަވެސް، ކަން ވެގެންދިޔައީ ދިމާ އިދިކޮޅަށެވެ. އިސްތިއުމާރީ އިސްރާއީލުގެ ޓެރަރިސްޓުން ޢީދު ވިލޭރޭގެ ފަތިހުން ފެށިގެން ވައިގެ ވަރުގަދަ ހަމަލާތަކެއް ޣައްޒާއަށް ދޭން ފަށާފައި ވެއެވެ.

އެގޮތުން، ޣައްޒާގައި އާންމުން ދިރިއުޅޭ ގެތަކާއި، އިމާރާތްތަކާއި، އަދި ގެދޮރު ގެއްލި މަގުމަތިވެފައިވާ އާންމުން ތިބި އެތައް ޓެންޓަކަށް ބޮންއަޅައި އެތައްބަޔަކު ޝަހީދު ކޮށްލާފައި ވެއެވެ.

ޣައްޒާ ހެލްތު މިނިސްޓްރީން ބުނެފައިވަނީ، ޢީދު ވިލޭރޭ ފަތިހުން ފެށިގެން ޣައްޒާއަށް ދެމުންގެންދާ ހަމަލާތަކުގައި 45 މީހުން ޝަހީދުވެފައިވާ ކަމަށެވެ. ޓެރަރިސްޓުންގެ ހަމަލާތަކުގައި ޝަހީދުވެފައިވާ މީހުންގެ ތެރޭގައ ގިނައީ ކުޑަކުދީންނެވެ.

ގިނަ ކުޑަކުދީން ޝަހީދުކޮށްލާފައިވަނީ ގޭގައި ނުވަތަ ފޭލިގޭގައި ނިދަން ތިއްބައެވެ.

ފިތުރު ޢީދު ދުވަހަށް އަލިވިލުން ބައެއް ކުދީންނަށް ނުފެނުނުއިރު، ބައެއް ކުދީންނަށް އީދު ހެދުމެއްހާ މިންވަރުވެސް ނުލިބި ތިބިއިރު ލިބުނީ ކަފުނެކެވެ.

ޚާން ޔޫނިސްގައި ފޭލިގެއަކަށް ބޮންއަޅައި ބައްޕައަކާއި އޭނާގެ ކުޑަ ތިން އަންހެން ކުދިން ޝަހީދުކޮށްލާފައި ވާއިރު، އެކުދީން ޝަހީދުކޮށްލާފައިވަނީ ފިތުރު ޢީދުގެ އުފާފާޅުކުރަން އީދު ހެދުމުގައި ތިއްބައެވެ.

ބައެއް ކުދީންނާއެކު އެކުދީންގެ އާއިލާތަކުގެ ހުރިހާ މެމްބަރުންވެސް ޝަހީދުކޮށްލާފައި ވެއެވެ.

ޣައްޒާގެ އުތުރާއި، ޣައްޒާގެ މެދުތެރެއާއި އަދި ޣައްޒާގެ ދެކުނުގެ އެކި ރަށްތަކަށް ވަރުގަދަ ހަމަލާތަކެއްދީފައި ވެއެވެ. ޢީދު ދުވަސްވީ އިސްރާއީލުން ހަމަލާތައް އިހުނަށްވުރެ ވަރުގަދަކުރިކަން އާންމުންވެސް ފާހަގަ ކުރެއެވެ.

ހަނގުރާމަތީ މަތިންދާ ބޯޓުތަކުން ބޮންއެޅުމުގެ އިތުރަށް، ޑްރޯން ބޭނުންކޮށްގެންވެސް ބޮންއަޅާފައިވާ ކަމަށާއި، އަދި ބޮޑުބަޑިންވެސް ވަރުގަދަ ހަމަލާތަކެއް ދީފައިވާ ކަމަށް ޚަބަރުތައް ބުނެއެވެ.