އައްޑޫ ސިޓީ ކައުންސިލްގެ އެޑްވައިޒަރީ ކޮމިޓީތަކަށް ކުރިމަތިލުމުގެ ފުރުޞަތު ހުޅުވާލައިފި

އައްޑޫ ސިޓީ ކައުންސިލްގެ ފަސްވަނަ ދައުރުގެ މަސައްކަތްތަކަށް ލަފާދޭނެ އެޑްވައިޒަރީ ކޮމިޓީތައް އުފައްދައި، އެ ކޮމިޓީތަކަށް މެންބަރުން އައްޔަނުކުރުމަށްޓަކައި ކުރިމަތިލުމުގެ ފުރުޞަތު އާންމުކޮށް ހުޅުވާލައިފިއެވެ.

މި ނިންމުމަކީ ލޯކަލް ކައުންސިލްތަކުގެ އާންމު އިޖުރާއީ ޤަވާއިދުގެ 93 ވަނަ މާއްދާގެ (ހ)، (ށ) އަދި (ނ) ގެ ދަށުން، ކައުންސިލްގެ މަސައްކަތްތައް ހަރުދަނާކުރުމަށްޓަކައި ނިންމާފައިވާ ނިންމުމެކެވެ. މިގޮތުން ޖުމްލަ ހަ ދާއިރާއަކުން އެޑްވައިޒަރީ ކޮމިޓީތައް އުފެއްދުމަށް ވަނީ ހަމަޖެހިފައެވެ.

އުފެއްދުމަށް ހަމަޖެހިފައިވާ ކޮމިޓީތައް:

ކައުންސިލުން އިޢުލާނުކޮށްފައިވާ ގޮތުގައި އުފެއްދުމަށް ހަމަޖެހިފައިވާ ކޮމިޓީތަކަކީ ރިލިޖަސް އެޑްވައިޒަރީ ކޮމިޓީ، ޔޫތު އެޑްވައިޒަރީ ކޮމިޓީ، ފިޝަރީޒް އެންޑް އެގްރިކަލްޗަރ އެޑްވައިޒަރީ ކޮމިޓީ، ބިޒްނަސް އެންޑް ޓޫރިޒަމް އެޑްވައިޒަރީ ކޮމިޓީ، އެންވަޔަރަންމަންޓް އެޑްވައިޒަރީ ކޮމިޓީ އަދި ސޯޝަލް އެޑްވައިޒަރީ ކޮމިޓީއެވެ.

މި ކޮމިޓީތަކަށް ކުރިމަތިލުމަށް ބޭނުންވާ ފަރާތްތަކުން، ކުރިމަތިލާ ކޮމިޓީގެ ނަމާއި، އެ ދާއިރާއަކުން ހާސިލްކޮށްފައިވާ ތައުލީމާއި މަސައްކަތުގެ ތަޖުރިބާ ބަޔާންކޮށްދޭ ލިޔުންތައް ހުށަހަޅަންޖެހެއެވެ. ލިޔުންތައް ހުށަހެޅުމުގެ ސުންގަޑިއަކީ 29 ޖޫން 2026 ވާ ހޯމަ ދުވަހުގެ 12:00 އެވެ. އެޕްލިކޭޝަންތައް ފޮނުވަންޖެހޭނީ bureau@adducity.gov.mv އަށެވެ.

ކައުންސިލުން މަޢުލޫމާތު ދޭ ގޮތުގައި، ކޮމިޓީތަކަށް މެމްބަރުން އައްޔަނުކުރުމުގައި، ކަމާގުޅޭ ދާއިރާއިން ތައުލީމު ހާސިލްކޮށްފައިވާ އަދި މަސައްކަތުގެ ތަޖުރިބާ ހުރި ފަރާތްތަކަށް އިސްކަންދެވޭނެއެވެ. މިއީ ސިޓީގެ ތަރައްޤީއާއި އިޖުތިމާޢީ ކަންކަމުގައި އާންމުންގެ ބައިވެރިވުން އިތުރުކުރުމަށް އެޅޭ މުހިންމު ފިޔަވަޅެކެވެ.

މި އިޢުލާނާއި ގުޅިގެން އިތުރު މަޢުލޫމާތު ސާފުކުރެއްވުމަށް ބޭނުންވާ ފަރާތްތަކުން އައްޑޫ ސިޓީ ކައުންސިލްގެ ނަމްބަރު 6885003 އަށް ގުޅުއްވުމަށް ނުވަތަ ކައުންސިލްގެ ބިއުރޯއަށް މެއިލް ކުރެއްވުމަށް ކައުންސިލުން އެދެއެވެ.