ޖައްވަށް ވިހަ ގޭސް ބޭރުވުމުގެ ސަބަބުން، އޯޒޯން ފަށަލައަށް ގެއްލުންވެ، ދުނިޔެ ހޫނުވާ ވާހަކައަކީ އައު ވާހަކައެއް ނޫނެވެ. ދުނިޔެ ހޫނުވުމުގެ ސަބަބުން ގަނޑުފެން ފަރުބަދަތައް ވިރި، ކަނޑުގެ ލޮނުގަނޑު އުފުލެމުން ދިޔުމުގެ ސަބަބުން، އެންމެ ނުރައްކާ ފައްތަރަކަށް ވެއްޓިފައި މިވަނީ ރާއްޖެ ފަދަ ކުދި ޖަޒީރާ ގައުމުތަކެވެ. އެހެންކަމުން، ޖައްވަށް ވިހަ މާއްދާތައް ބޭރުކުރުމުން ދުރުހެލިވުމުގެ ޒިންމާ އެންމެ ބޮޑީވެސް ޒަޖީރާ ގައުމުތަކަށެވެ.
މިޒިންމާ އަދާކުރުމަށް ކުރެވޭނެ އެންމެ މުހިންމު އެއް ކަމަކީ އިޔާދަކުރަނިވި ހަކަތައަށް ބަދަލުވުމެވެ. ޔޫއެން ފްރޭމްވޯކް ކޮންވެންޝަން އޮން ކްލައިމެޓް ޗޭންޖް ތަސްދީގުކުރާ ގައުމެއްގެ ހައިސިއްޔަތުން ރާއްޖޭން ހުށަހެޅި އެކްޝަން ޕްލޭން ނުވަތަ "ނެޝަނަަލީ ޑިޓަމައިންޑް ކޮންޓްރިބިއުޝަން (އެންޑީސީ)ގައި ބަޔާންކޮށްފައިވާ ގޮތުގައި ރާއްޖޭގައި ބޭނުންކުރާ ކަރަންޓުގެ 15 ޕަސެންޓަކީ އިއާދަކުރަނިވި ހަކަތަ ބޭނުންކޮށްގެން އުފައްދާ ކަރަންޓަަށް ހެދުމަކީ އަމާޒެކެވެ.
ސަރުކާރުގެ މިއަމާޒު ހާސިލުކުރުމަށް ހަމައެކަނި މަސައްކަތްކުރަންޖެހޭނީ ސަރުކާރުން ކަމަށް ވިސްނައިގެން ނުވާނެއެވެ. މިކަމުގައި، އަމިއްލަ ފަރުދުންނާއި ވިޔަފާރިތަކާއި، ޖަމްޢިއްޔާ/ ޖަމާައަތްތަކާއި ކައުހްސިލްތަކުގެ ދައުރުވެސް އެބަ އޮތެވެ. މިފަދަ މުހިންމު ލަނޑުދަނޑިއެއް ހާސިލުކުރެވޭނީ އިސްވެ ބަޔާންކުރެވުނު ފަރާތްތަކުގެ އެހީއާއި އެއްބާރުލުމާއެކުގައެވެ. ރާއްޖޭގެ ރަށްރަށަށް ބަލާއިރު، ބައެއް ރަށްރަށުން، ސަރުކާރުގެ މިއަމާޒަށް ވާސިލުވުމަށް އެއްބާރުލުންދީ ނަމޫނާ ދައްކަމުންދާ މަންޒަރު ފެނެއެވެ. އޭގެ ތެރެއިން އެއް ރަށަކީ 652 މީހުންގެ އާބާދީއެއް ނިސްބަތްވާ ރ. ވާދޫއެވެ.
ވާދޫ އެސޯސިއޭޝަންފޯ ފިޔުޗާ ޑިވެލޮޕްމެންޓް (ވަފްދު)އިން އެ ރަށުގައި ގާއިމުކުރި ސޯލަރ ޗާޖިން ސްޓޭޝަން -- ފޮޓޯ: ޒިދާން މުޙައްމަދު/ އަސްލު
ވާދޫގެ މަލަމަތިން ވެސް ފެންނަނީ އިޔާދަކުރަނިވި ހަކަތައަށް އިސްކަންދޭ މިންވަރެވެ. ޖައްވަށް ވިހަގޭސް ބޭރުކުރުން ހުއްޓުވުމުގެ އަމާޒުގައި ވާދޫ އެސޯސިއޭޝަންފޯ ފިޔުޗާ ޑިވެލޮޕްމެންޓް (ވަފްދު)އިން އެ ރަށުގައި ގާއިމުކުރި ސޯލަރ ޗާޖިން ސްޓޭޝަން ހުންނަނީ ވާދޫ ބަނދަރު ސަރަހައްދުގައި، ލަފާފުރާ މީހުންގެ ލޮލުގައި އަޅައިގަންނަ ހިސާބުގައެވެ. ވަރަށް ހިތްގައިމުކޮށް ގާއިމުކޮށްފައިވާ ސޯލަރ ޗާޖިން ސްޓޭޝަނަކީ ޔޫއެންޑީޕީގެ ޖީއީއެފް/އެސްޖީޕީ ސްމޯލް ގްރާންޓުގެ ހިލޭ އެހީގެ ދަށުން ވާދޫގައި ކުރިއަށްގެންދާ "އިއާދަ ކުރަނިވި ހަކަތައަށް ރައްޔިތުން ބަދަލުވުމުގެ" ޕްރޮޖެކްޓުގެެ ދަށުން ގާއިމުކޮށްފައިވާ ސްޓޭޝަނެކެވެ. މިއީ އަތޮޅުތެރޭގައި ގާއިމުކުރި މިފަދަ ފުރަތަމަ ސްޓޭޝަނެވެ.
ވަފްދުގެ ރައީސް އަޙުމަދު ޒިޔާއު ވިދާޅުވީ، އެތަނުގައި ގާއިމުކޮށްފައި ހުރި ސޯލާ ނިޒާމުން ޖުމްލަ ހަ ކިލޯވޯޓްގެ ކަރަންޓު އުފެއްދޭނެ ކަމަށެވެ. ވާދޫ ކައުންސިލްގެ ޒިންމާދާރުވެރިޔާގެ މަގާމުވެސް އަދާކުރައްވަމުންގެންދަވާ ޒިޔާއު ވިދާޅުވި ގޮތުގައި، ސޯލަރ ޗާޖިން ސްޓޭޝަނުން ވާދޫގެ ރަށްވެހިންނަށް ހިލޭ ޗާޖުކުރެވޭނެ އިންތިޒާމްވަނީ ހަމަޖެހިފައެވެ. މިމަޝްރޫއުގެ މަގުސަދަކީ ވާދޫގެ ރަށްވެހިންނަކީ އިއާދަކުރަނިވި ހަކަތައިން އޮޕަރޭޓްކުރާ ވެހިކަލް ގެންގުޅޭ ބަޔަކަށް ވުމަށް ބާރު އެޅުމެވެ. އަދި އެރަށަކީ ޖައްވަށް ވިހަގޭސް ބޭރުނުކުރާ ރަށަކަށް ހެދުމަކީވެސް މިމަޝްރޫއުގެ މަގުސަދެއް ކަމަށް އޭނާ ވިދާޅުވިއެވެ.
މި ޕްރޮޖެކްޓުގެ ދަށުން ވާދޫއަށް ވަނީ 14 މީހުންގެ ޖާގައިގެ އިލެކްޓްރިކް ބަހެއް ގެންގޮސްފައެވެ. ވަފްދުގެ އަމާޒަކީ މިބަހުގައި ސްކޫލު ކުދިންނަށާއި އާންމުނަށްވެސް ޕަބްލިކް ޓްރާންސްޕޯޓުގެ ހިދުމަތް ދިނުމެވެ. ނަމަވެސް، މިވަގުތު ބަހުގެ ޚިދުމަތްދެނީ މުޅި ބަސް ޗާޓަރކުރާ އުސޫލުންނެވެ. ދަތުރަކަށް 50 ރުފިޔާ ނަގާނެއެވެ.
ވާދޫއަކީ ތިމާވެއްޓާ ރަޢްޓެހި ރަށަކަށް ހެދުމަށް ކުރިއަށްގެންދާ މިޕްރޮޖެކްޓުގެ ދަށުން އެރަށުގައި ގާއިމްކުރި ސޯލާ ޗާޖިން ސްޓޭޝަނުގެ ކައިރީ ބެޓެރިން އޮޕަރޭޓްކުރާ ކުލީ ބައިސްކަލްތަކެއްވެސް ވަނީ ބަހައްޓާފައެވެ. މިބައިސްކަލުތައް ދޫކުރާނީ މިނިޓަކަށް ބައިރުފިޔާގެ ރޭޓުން ރަށަށް އަރާ މެހެމާނުންނަށާއި ވެހިކަލް ބޭނުންވާ އެރަށުގެ ރަށްވެހިންނަށެވެ.
މީގެ ކުރިން، ވަފްދުގެ ބޭފުޅުން ވަނީ ވާދޫ ކައުންސިލްގެ އިދާރާގެ ފުރާޅުގެ އިތުރުން ކުނިކޮށީގައި ސޯލާޕެނަލް ހަރުކޮށްފައެވެ. ކައުންސިލާއި ޔޫއެންޑީޕީ އަދި ހެޔޮއެދޭ އެހެނިހެން ފަރާތްތަކުގެ ދީލަތި އެހީގައި ވަފްދުން ގާއިމުކުރި ސޯލާ ނިޒާމުން ގާތްގަނޑަކަށް 25 ކިލޯވޯޓްގެ ކަރަންޓު އުފެއްދޭނެއެވެ.
މިކަރަންޓު ވާދޫގެ އިލެކްޓްރިކް ގްރިޑަށް ފޯރުކޮށްދޭނެ ކަމަށް ވަފްދުން މައުލޫމާތު ދެއެވެ.
