ގައުމެއްގެ ތަރައްޤީއަށް އިންސާނީ ވަސީލަތް ބޭނުންވެއެވެ. މިކަން ފަހިވާން އަންނަނީ ފެންވަރު ރަނގަޅު ތަޢުލީމަކާއި ތަމްރީނެއް ދެވޭނެ ނިޒާމެއް އޮވެގެންނެވެ. ދިވެހިރާއްޖޭގައި މިދާއިރާގެ އެންމެ ބޮޑު ޒިންމާއެއް މަތިވެފައި ވަނީ މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓަށެވެ. ރައީސް ޑރ. މުހައްމަދު މުޢިއްޒުގެ މިވެރިކަމުގެ ފުރަތަމަ 365 ދުވަސް ފާއިތުވެފައިވާއިރު މިނިސްޓަރ ޑޮކްޓަރ މަރްޔަމް މާރިޔާގެ މޭސްތިރިކަމުގައި މިވަނީ މިދާއިރާއިން އިންގިލާބީ ހެޔޮ ބަދަލުތަކެއް ގެނެސްފައެވެ.
މިސަރުކާރުގެ ފުރަތަމަ އެއް އަހަރު ދުވަހުގެ ތެރޭގައި ދިވެހި ދަރީންނަށް މަތީ ތައުލީމްގެ ފުރުސަތުތައް ފަހިކޮށްދިނުމަށް ވަނީ ގިނަ ގުނަ މަސައްކަތްތަކެއް ކޮށްދެއްވާފައެވެ. މިގޮތުން ރާއްޖެއާއި ރާއްޖޭން ބޭރުން ސްކޮލަރޝިޕްގެ ފުރުސަތުތައް ފަހިކޮށްދިނުން ފާހަގަކޮށްލަން ޖެހެއެވެ. މިގޮތުން ސްޕެޝަލް އެޑިއުކޭޝަންގެ ކޯސްތަކަށް ދިން ސްކޮލަރޝިޕްގެ ފުރުސަތުތަކާއި ރާއްޖޭން ބޭރުން މެލޭޝިއާ އާއި، އިނގިރޭސިވިލާތް، ތުރުކީވިލާތް، ޕާކިސްތާން ފަދަ ގައުމުތަކުން މަތީ ތައުލީމް ފުރިހަމަކުރުމަށް ހުޅުވާލި ސްކޮލަރޝިޕްގެ ފުރުސަތުތައް ފާހަގަކޮށްލެވެއެވެ. މިއަހަރު ހައި އެޗީވާސް ސްކޮލަރޝިޕް 117 ދަރިވަރަކަށް އަދި ރައީސްގެ ހާއްސަ ސްކޮލާރޝިފް 19 ދަރިވަރަކަށް ދީފައިވެއެވެ.
ހިލޭ ޑިގްރީ ޕްރޮގްރާމަކީ މާލީ ތަނަވަސްކަން ނެތުމުގެ ސަބަބުން މަތީ ތައުލީމް އުނގެނުމުން މަހުރޫމްވެފައި ތިބި އެތައް ދަރިއަކަށް އެ ފުރުސަތު ފަހިވެގެންދިޔަ ކަމަކަށްވާއިރު، ހިލޭ ޑިގްރީ ޕްރޮގްރާމް އިތުރަށް ހަރުދަނާކޮށް ދަރިވަރުންނަށް ހުރި ދަތިތަށް ފިލުވައިދިނުމަށް ސަރުކާރުން ވަނީ ގިނަ ފިޔަވަޅުތަކެއް އަޅާފައެވެ. އަދި އަތޮޅުތެރެއިން މާލެއަށް އަންނަ ދަރިވަރުންނަށް ހުރި ދަތިތަކަށް ރިއާޔަތްކޮށް ސްޓައިޕެންޑްގެ ގޮތުގައި މަހަކު 6،000 ރުފިޔާ ލިބޭ ލޯނެއް ދޭން ވަނީ ނިންމާފައެވެ. ސަރުކާރުން ވަނީ ހިލޭ ޑިގްރީގެ ދަށުން ކިޔެވުމަށް ރާއްޖޭގެ ދެ ޔުނިވާސިޓީ އަށާއި ނުވަ ކޮޖެލަކަށް ފައިސާ ދޫކޮށްފައެވެ.
މަތީ ތައުލީމް ހާސިލުކުރުމަށް ބޭނުންވާ ދިވެހި ދަރީންނަށް މާލީ ގޮތުން ހުރި ގޮންޖެހުންތަކުން އަރައިގަތުމަށް ސްޓޫޑެންޓް ލޯންގެ އެތައް ފަހި ފުރުސަތެއް ސަރުކާރުން ވަނީ ލިއްބައިދީފައެވެ. އެންމެ ފާހަގަކޮށްލެވޭ ކަމަކީ މިލޯންތައް ދޫކޮށް ދަރިވަރުންގެ ލޯނުގެ ފައިސާގެ ބެކްލޮގް ވަނީ ހުސްކޮށްފައެވެ. ބޭރުގައި ކިޔަވަން ތިބި ދަރިވަރުންނާއި ފުރަން ވެފައި ތިބި ދަރިވަރުންގެ ލޯނުގެ ހާލަތު ރައީސް ޑރ. މުހައްމަދު މުއިއްޒު ވަރަށް ގާތުން ބައްލަވަމުން ގެންދަވައެވެ. މިއަހަރު ލޯނަށް ހުޅުވާލި 500 ފުރުސަތަށް އެދި 1،709 ދަރިވަރަކު ކުރިމަތިލި އެވެ. ހަޔާ އެޑިއުކޭޝަން މިނިސްޓްރީން ނިންމާފައި ވަނީ އެ ހުރިހާ ދަރިވަރުންނަށް ލޯނު ދޭށެވެ. އޭގެ ތެރޭގައި އަމިއްލަ ހަރަދުގައި ބޭރުގައި ކިޔަވަމުންދިޔަ ބައެއް ދަރިވަރުން ވެސް ލޯނަށް އެދި ކުރިމަތިލުމުން ޝަރުތު ހަމަވާ ކަމަށް ނިންމައި ލޯނު ދޭން ވަނީ ނިންމައިފައެވެ.
ރާއްޖޭގައި މަތީ ތައުލީމް ފޯރުކޮށްދޭ މަރުކަޒުތަކުގެ ފެންވަރު ރަނގަޅުކުރުމަށްވެސް ސަރުކާރުން އަންނަނީ ގިނަގުނަ މަސައްކަތްތަކެއް ކުރަމުންނެވެ. ފާއިތުވި 365 ދުވަހުގެ ތެރޭގައި އެންމެ ފާހަގަކޮށްލެވުނު އެއް ކަމަކީ ރާއްޖޭގެ ކޮލެޖްތައް ޔުނިވާސިޓީއަކަށް ބަދަލުކުރުމަށް ހުރި ޤާނޫނީ ހުރަސްތައް ނައްތާލުމަށް ސަރުކާށުން ފެށި މަސައްކަތްތަކެވެ. މަތީ ތައުލީމުގެ ގާނޫނުގައި މިހާރު އޮންނަ ގޮތުން ޔުނިވާސިޓީއެއްގެ ދަރަޖަ ދޭނީ، ކޮލެޖެއް ގޮތުގައި މެދުނުކެނޑި 20 އަހަރު ވަންދެން ހިންގުމުންނެވެ. ނަމަވެސް، ކޮލެޖެއްގެ ގޮތުގައި، މެދުނުކެނޑި ހިންގާތާ 15 އަހަރު ވެފައިވާ ނަމަ ޔުނިވާސިޓީއަކަށް ބަދަލުކުރެވޭ ގޮތަށް ހަދަން ރައްޔިތުންގެ މަޖިލީހަށް ވަނީ އިސްލާހު ހުށަހަޅާފައެވެ. ކޮލެޖުގައި ލެވެލް ހަތަކުން ފެށިގެން މަތީ ކޯސްތަކުގައި މަދުވެގެން 1،000 ދަރިވަރުން ކިޔަވަމުން ދާން ޖެހޭނެ ކަމަށް ވެސް އެ އިސްލާހުގައި ވެ އެވެ. އެ ބިލްގައި ހިމެނޭ އިތުރު ބައިތަކުގައިވާ ގޮތުން، ކޮލެޖެއްގައި އާޓްސް އެންޑް ހިއުމަނިޓީޒް އާއި އިންޖިނިއަރިން އެންޑް ޓެކްނޮލޮޖީ އާއި ލައިފް ސައިންސް އެންޑް މެޑިސިން އާއި ނެޗުރަލް ސައިންސާއި ސޯޝަލް ސައިންސް ފަދަ ދާއިރާތަކުގެ ތެރެއިން ލެވެލް ހަތެއް އަދި ނުވައެއްގެ މަދުވެގެން ތިން ދާއިރާއަކުން އަމިއްލަ ނުވަތަ ބޭރުގެ ޔުނިވާސިޓީއެއްގެ ޕްރޮގްރާމްތައް ކޮލެޖުގައި ހިންގަން ޖެހެއެވެ.
މީގެ އިތުރުން، ވަގު ސެޓްފިކެޓްގެ މައްސަލައާއި އެސެސްމަންޓް ގަނެވިއްކުމުގެ މައްސަލަ ހަރުދަނާ އުސޫލުތަކެއްގެ ތެރެއިން ހައްލުކުރުމަށް ސަރުކާރުން ވަނީ ފުރަތަމަ އަހަރުގެ ތެރޭގައިވެސް ގިނަ މަސައްކަތްތަކެއްކޮށްފައެވެ. އަދި އިންސާނީ ވަސީލަތް ބިނާކުރުމަށް ކުރު ކޯސްތަކާއި ތަމްރީންތައް ހިންގޭ ގޮތަށް ޕޮލިޓެކްނިކްތައް ގާއިމުކުރުމާއި މިހާރު ހުރި ޕޮލިޓެކްނިކް މަރުކަޒުތަކުގެ ފެންވަރު ރަނގަޅުކުރުމަށްވެސް ސަރުކާރުން ވަނީ ގިނަ ގުނަ މަސައްކަތްތަކެއްކޮށްފައެވެ. ރާއްޖޭގެ ސަގާފަތާއި ތަރިކަ ރައްކާތެރިކޮށް، އުފެއްދުންތެރި ވިޔަފާރިވެރިންނަށް ފުރުސަތުތައް ފަހިކޮށް ޒުވާނުން ސަގާފީ ކަންކަމަށް ހޭލުންތެރިކުރުވަން އާޓްސް އެންޑް ކަލްޗާ ސެންޓަރެއް ގާއިމްކުރަން ޕޮލިޓެކްނިކަށް ވަނީ ހަވާލުކޮށްފައެވެ.
މިސަރުކާރުން ދެނީ ދައުލަތުގެ ހަރަދުގައި ރާއްޖެ އިން ބޭރުގައި ކިޔަވާ އެއްވެސް ދަރިވަރެއްގެ ތައުލީމަށް ބުރޫއަރާ ފަދަ ކަމެއް ވިޔަނުދޭނެ ކަމުގެ ޔަގީންކަމެވެ. މި ސަރުކާރުން ދެނީ ރާއްޖޭގައި ތިބެގެން ފެންވަރު ރަނގަޅު ތައުލީމެއް ހާސިލުކުރުމުގެ ފަހި ފުރުސަތުތައް ފޯރުކޮށްދޭނެކަމުގެ ޔަގީންކަމެވެ. ސަރުކާރުގެ ފުރަތަމަ 365 ދުވަހުންވެސް ފެނުނީ އިންސާނީ ވަސީލަތް ބިނާކުރުމަށް ގެނައި އިންގިލާބީ ހެޔޮ ބަދަލުތަކެވެ.
