5 މިލިއަން ގަސް އިންދުމުގެ މަޝްރުޢޫގެ ދަށުން މަތިވެރީގައި ގަސް އިންދުމުގެ ހަރަކާތެއް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން ކުރިއަށްގެންދާ "5 މިލިއަން ގަސް އިންދުމުގެ މަޝްރުޢޫ" ގެ ދަށުން އއ. މަތިވެރީގައި ގަސް އިންދުމުގެ ޚާއްޞަ ހަރަކާތެއް ބާއްވައިފިއެވެ.

މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީން މަޢުލޫމާތު ދެއްވާގޮތުގައި، މި ހަރަކާތަކީ އެ މިނިސްޓްރީއާއި މަތިވެރީ ކައުންސިލް އިދާރާ ގުޅިގެން ކުރިއަށް ގެންދިޔަ ހަރަކާތެކެވެ.

މި ހަރަކާތުގެ މަޤްޞަދަކީ ރަށުގެ ތިމާވެށި ރީތިކޮށް، ފެހިކަން އިތުރުކުރުމުގެ އިތުރުން މޫސުމީ ބަދަލުތަކުން ކުރާ ނޭދެވޭ އަސަރުތަކުން ރާއްޖޭގެ ރަށްތައް ސަލާމަތްކުރުމަށް ސަރުކާރުން ހިފާފައިވާ އަމާޒަށް ވާޞިލުވުމެވެ.

މަތިވެރީގައި ބޭއްވުނު މި ހަރަކާތުގައި އެ ރަށުގެ އެކި މުއައްސަސާތަކުގެ މުވައްޒަފުންނާއި، ގިނަ އަދަދެއްގެ ރައްޔިތުން ވަނީ ޢަމަލީގޮތުން ބައިވެރިވެ، ރަށުގެ އެކި ސަރަޙައްދުތަކުގައި ގަސް އިންދާފައެވެ. މި މަޝްރުޢޫގެ ދަށުން އިންދާ ގަސްތަކަކީ ރާއްޖޭގެ މާޙައުލާ ގުޅޭ، ހިޔާލިބޭ އަދި މޭވާލިބޭ ބާވަތްތަކުގެ ގަސްތަކެއްކަން މިނިސްޓްރީން ފާހަގަކުރެއެވެ.

5 މިލިއަން ގަސް އިންދުމުގެ މި ބޮޑު މަޝްރުޢޫއަކީ ރާއްޖޭގެ ތިމާވެށި ޙިމާޔަތްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ހަރުދަނާ ސިޔާސަތުގެ ދަށުން ފެއްޓެވި މުހިންމު މަސައްކަތެކެވެ.

މަތިވެރީގައި މި ބޭއްވުނު ހަރަކާތަކީ މި މަޝްރުޢޫ މުޅި ރާއްޖެއަށް ފުޅާކުރުމަށް ކުރެވޭ މަސައްކަތުގެ ތެރެއިން އެޅުނު އިތުރު ފިޔަވަޅެކެވެ.