ސިއްހީ ފިޔަވަޅުތައް އެޅުމުގައި ސައިންނާއި ހެއްކަށް ބިނާކޮށް ގޮތް ނިންމުމުގެ އާދަ އަށަގަންނުވަންޖެހޭ: ރައީސް

ސިއްހީ ފިޔަވަޅުތައް އެޅުމުގައި ސައިންނާއި ހެއްކަށް ބިނާކޮށް ގޮތް ނިންމުމުގެ އާދަ އަށަގަންނުވަންޖެހޭ ކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިކަމަށް ގޮވާލެއްވީ، ސޯޝަލް މީޑިއާ އާއި އާޓިފިޝަލް އިންޓެލިޖެންސް(އޭ.އައި)ގެ ސަބަބުން ހަގީގަތާ ޚިލާފު ދޮގު މައުލޫމާތު ފެތުރެމުންދާ މި ދަނޑިވަޅުގައި، ސައިންސަށް ބިނާކޮށް ގޮތް ނިންމުމަކީ ކުރިއަށްވުރެ ބޮޑަށް މުހިންމުވެފައިވާ ކަމެއްކަން ފާހަގަކުރައްވަމުން، ދުނިޔޭގެ ޞިއްޙަތު ދުވަހުގެ މުނާސަބަތުގައި ފޮނުއްވި މެސެޖުގައެވެ.

ދިވެހިރާއްޖެއަކީ ޒަމާނުއްސުރެ ހެއްކަށް ބިނާކޮށް ގޮތް ނިންމުމުގެ ސަގާފަތެއް ދަމަހައްޓަމުން އަންނަ ގައުމެއްކަން ކަށަވަރުކޮށްދެއްވިއެވެ.

ރާއްޖޭގެ ޞިއްޙީ ސިޔާސަތުތައް ބިނާވެފައިވަނީ ޒަމާނީ ސައިންސާއި، ޓެކްނޮލޮޖީ އަދި ސާބިތު ހެކިތަކުގެ މައްޗަށްކަން އެމަނިކުފާނު ފާހަގަކުރެއްވިއެވެ.

މި މޭރުމުން، ޞިއްޙީ ނިޒާމު ހަރުދަނާކޮށް، މުޅި ރާއްޖެއަށް ފެންވަރު ރަނގަޅު ހިދުމަތްތައް ފޯރުކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ ތަފްސީލު އެމަނިކުފާނު ހިއްސާކުރެއްވިއެވެ. އޭގެ ތެރޭގައި ޑިޖިޓަލް ހެލްތުގެ ޚިދުމަތް ފުޅާކުރުމާއި، ރާއްޖެއާއި ރާއްޖެއިން ބޭރުގެ ހޯދުންތަކާއި ހެކިތަކުގެ ބޭނުން ހިފުމާއި، ބަލިތައް ދެނެގަތުމާއި މޮނިޓަރކުރުމުގެ ފަންނީ އުސޫލުތައް ހަރުދަނާކުރުން ހިމެނެއެވެ.

މީގެ އިތުރުން ޞިއްޙީ މައުލޫމާތު ބެލެހެއްޓުމުގެ ނިޒާމު އެއްވިއުގައަކުން ގުޅާލުމާއި، ދުޅަހެޔޮ ދިރިއުޅުމުގެ އާދަތަކަށް ބާރުއެޅުމާއި، ދުރާލާ ބަލިތައް ދެނެގަތުމަށް އިސްކަންދިނުމުގެ އިތުރުން، ފަރުވާގެ ޚިދުމަތްތައް ހަރުދަނާކަންމަތީ ފޯރުކޮށްދިނުން ހިމެނޭކަން އެމަނިކުފާނު ފާހަގަކުރެއްވިއެވެ.

ދުނިޔޭގެ ޞިއްހަތު ޖަމުޢިއްޔާ (WHO) އާއި ބައިނަލްއަގުވާމީ އެހެނިހެން އިދާރާތަކާއެކު ރާއްޖެއިން ބާއްވާ ގާތް ގުޅުން ފާހަގަކުރައްވައި، މީގެ ސަބަބުން ޞިއްޙީ ދާއިރާގެ އެންމެ ފަހުގެ ހޯދުންތަކުގެ މަންފާ ރާއްޖެއަށް ލިބޭކަން ފާހަގަކުރެއްވިއެވެ.

ޞިއްޙީ ދިރާސާތަކަށް ކުރާ އިންވެސްޓްމަންޓް އިތުރުކުރުމަށާއި، ގައުމުތަކުގެ އަމިއްލަ ހާލަތާ ގުޅޭ ހެކިތައް ހޯދުމަށް އިސްކަންދިނުމަށް އެމަނިކުފާނު ގޮވާލެއްވިއެވެ. އަދި ގައުމީ ފެންވަރުގައާއި ބައިނަލްއަގުވާމީ ފެންވަރުގައި ކުރެވޭ ޞިއްޙީ މަސައްކަތްތަކަކީ ސާބިތުވެފައިވާ ސައިންސުގެ މައްޗަށް ބިނާވެފައިވާ ކަންކަންކަން ކަށަވަރުކުރުމަށްޓަކައި، ގައުމުތަކުގެ މެދުގައި އޮންނަ ގުޅުން މިހާރަށްވުރެ ބޮޑަށް ބަދަހިކުރުމަށް ވެސް އެމަނިކުފާނު އިލްތިމާސްކުރެއްވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލެއްވީ، މުޖުތަމަޢުގެ ދުޅަހެޔޮކަމާއި އުންމީދު ދެމެހެއްޓުމަށްޓަކައި މެދުކެނޑުމެއްނެތި މަސައްކަތްކުރައްވާ ހުރިހާ ފަރާތްތަކަށް ތަޙުނިޔާ ފޮނުއްވަމުންނެވެ. އަދި 'ޓުގެދަރ ފޮރ ހެލްތު، އެންޑް ޓު ސްޓޭންޑް ވިތު ސައެންސް' ނުވަތަ،'ސިއްހަތަށްޓަކައި އެކުގައި، ސައިންސާއެކު ސާބިތުވެ ތިބުމަށް ދިވެހި ރައްޔިތުންނަށާއި ބައިނަލްއަގުވާމީ މުޖުތަމަޢަށް އިލްތިމާސްކުރައްވަމުންނެވެ.

ދުވަހާ ގުޅިގެން ރައީސުލްޖުމްހޫރިއްޔާގެ އެކްސް އެކައުންޓުން ހިއްސާކުރެއްވި ޕޯސްޓެއްގައި މި ޝުއޫރުތައް ތަކުރާރުކުރައްވައި، 'ވަން ހެލްތު އިނީޝިއޭޓިވް' ކުރިއަށް ގެންދަންވާނީ ސައިންސަށް ބިނާވެފައިވާ އުސޫލުތަކުގެ މައްޗަށްކަން ބަޔާންކުރައްވައި އެކަމަށް ބާރުއަޅުއްވާފައިވެއެވެ.

ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވެސް ވަނީ އެކަމަނާގެ އެކްސް އެކައުންޓުން ކުރެއްވި ، ހެއްކަށް ބިނާވެފައިވާ ޞިއްޙީ ހައްލުތައް ހޯދުމަށާއި ދިރާސާތަކަށް ކުރާ ހޭދަ އިތުރުކުރުމަށް ރައީސުލްޖުމްހޫރިއްޔާ ގޮވާލެއްވި ގޮވާލެއްވުން ތަކުރާރުކުރައްވާފައެވެ. ޞިއްޙަތާއި ތިމާވެއްޓާ ދެމެދު އޮތް ގުޅުމުގެ މައްޗަށް އަލިއަޅުއްވާލައްވައި، މޫސުމީ ބަދަލުތަކާއި، ބޭހަށް ނުގުޑާ ބަލިތަކާއި، އަދި އަލަށް ފެންނަ ބަލިތައް ފަދަ، ގޮންޖެހުންތަކުން އަރައިގަތުމަށް ގައުމުތަކުގެ މެދުގައި އެއްބާރުލުން ބޭނުންވާކަމުގައިވެސް އެކަމަނާ ފާހަގަކުރެއްވިއެވެ. މީގެ އިތުރުން، ފާގަތި މުސްތަގުބަލެއް ބިނާކުރުމަށްޓަކައި، ދުޅަހެޔޮ ދިރިއުޅުމުގެ އާދަތައް ކުރިއެރުވުމަށް އެކަމަނާ ގޮވާލެއްވިއެވެ.

ކޮންމެ އަހަރެއްގެ އޭޕްރިލް މަހުގެ 7 ވަނަ ދުވަހަކީ ދުނިޔޭގެ ޞިއްޙަތު ދުވަހުގެ ގޮތުގައި ފާހަގަކުރާ ދުވަހެވެ.

މިއީ 1948 ވަނަ އަހަރު ދުނިޔޭގެ ޞިއްޙަތު ޖަމުޢިއްޔާ (ޑަބްލިއު.އެޗް.އޯ) އުފެދުނު ދުވަހެވެ.